Avrokuboklara vəsiqə şansını kubokun ümidinə saxlamaq istəməyən “Zirə” ilə qarşısına ilk “altılığ”a düşmək hədəfi qoyulmuş “Səbail” 3 xal üçün vuruşacaqdı.

Doğrusu, hədəfləri nəzərə aldıqda qəsəbə təmsilisinin daha iddialı çıxış edəcəyi gözlənilirdi. Çünki “dənizçilər” qalib gələcəyi təqdirdə belə “altılığ”a düşmək şansları “Turan Tovuz”dan asılı idi. 5-ci dəqiqədə artıq ilk aqressivlik özünü büruzə verdi. “Dənizçilər”in kapitanı Adilin ötürmə zamanı yol verdiyi kobud səhvdən sonra əks-hücuma keçən Utziqin qarşısını Mehremiç qaydanı pozmaqla aldı. Davamında isə cərimə zərbəsini yerinə yetiən Qismət azca hədəfdən aralı düşdü. Cəmi 3 dəqiqə sonra meydan sahibləri ən real qol vəziyyətini yaratdı. Baxımlı kombinasiyanın ardından cərimə meydançasına daxil olan Sadıqovun yetirmələri hesabı açmağa çox yaxın oldu. Belə ki, Utziqin ötürməsindən sonra rəqib oyunçularının diqqətindən yayınan Salifunun zərbəsi Yusifə toxunaraq qapı tirinə tuş gəldi. İkinci cəhddə isə qayıdan topu Utziq başla “çərçivə”yə göndərmək istədi, lakin Səlahət gözəl seyvlə bunun qarşısını almağı bacardı. İlk 10 dəqiqə gərgin mübarizə şəraitində keçsə də, hissənin sonrakı dəqiqələrində yaddaqalan hadisə baş vermədi. İkinci yarıda qapıya ilk zərbə qonaqlardan gəldi. Alluş səliqəli şəkildə Qismətdən sıyrılmağı bacarsa da, “çərçivə”yə vuruşu qokiper üçün heç bir təhlükə yaratmadı. 53-cü dəqiqədə Ramalinqomun iti bucaq altından zərbəsini Fuad kritik müdaxilə ilə qapıdan uzaqlaşdırdı. Buna baxmayaraq, hücumun davamında Quetanın qapı önünə hava ötürməsini premyer-liqanın məhsuldar oyunçularından olan Aleksandr başla qapıya yönəltdi. Fəqət bu zərbə də Tyaqo üçün heç bir problem yaratmadı. Diniyevin yetirmələrinin təzyiqini dəf edən qəsəbə təmsilçisi 57-ci dəqiqədə hesabı açdı. Utziqin sol cinahdan cərimə meydançasına göndərdiyi ötürməni Qismət qola çevirdi – 1:0. Hesabda geri düşən “dənizçilər” var qüvvəsiylə bərabərlik qolunu vurmaq üçün irəli atıldı. Bu üzdən də müdafiədə boşluqlar yarandı, meydan sahibləri də bundan istifadə edərək əks-hücumlara çıxırdı. Belə vəziyyətlərin biri də 67-ci dəqiqəə təsadüf etdi. Rəhim meydanın özlərinə aid hissəsində götürdüyü topu komanda yoldaşı Rüstəmə ötürdü. Gənc futbolçu topu ram etsə də, zərbəsi birbaşa qapıçıya tuş gəldi. 70-ci dəqiqədən etibarən azlıqda qalmağına baxmayaraq, qonaqlar böyük qüvvə ilə irəli atılmışdı. 85-ci dəqiqədə Adilin başla zərbəsi təhlükəli alındı. Amma qolkiper sayıqlığı əldən vermədi.

Beləliklə, son dəqiqələrə qədər mübarizə aparan və ən azı bərabərlik qolu üçün irəli atılan “Səbail” ardıcıl 5-ci məğlubiyyətlə ilk “altılıq” hədəfindən kənarda qaldı. “Zirə” isə həm tarixinin ən yaxşı nəticəsini (“qartallar” 2015/16 mövsümündə də 2-ci olmuşdu) təkrarladı, həm də Avropa Liqasına vəsiqə qazandı.

Gözdən qaçmadı
* Oyunun həm 1-ci, həm də 2-ci hissəsi gec başladı.
* “Dənizçilər” tribunada yox idi.
* 7-ci dəqiqədə Adil topu uzaqlaşdırmaq istəyərkən zərbəsi media sektoruna tuş gəldi.

KAMAL SƏFƏR