Növbəti mövsüm “Qəbələ” 1-ci liqada, “Şamaxı” isə elitada mübarizə aparacaq.

“Şirlər” noyabrın sonuna qədər Vüqar Əsgərlinin rəhbərliyi altında oynasa da, 9-cu turda evdə “Karvan”dan alınan acı məğlubiyyət onun istefasına səbəb oldu. Ramiz Məmmədov isə komandanı hədəfinə çatdırdı. Görəsən, sabiq çalıçdırıcının bütün bu hadisələrə münasibəti necədi? Bunu öyrənmək üçün Vüqar Əsgərli ilə danışdıq.

- “Şamaxı”nın bir il sonra premyer-liqaya dönüşünü necə şərh edərdiz?
- İlk dəfə görürük ki, premyer-liqadan düşən komanda ilk ilindəcə 1-ci liqada çempion olub elitaya qayıda bildi. Bu da sübut olundu ki, öncə klub kimi inkişaf etmək lazımdı.

- “Şamaxı”dan gedəndən sonra futbolçularla əlaqəniz qalıbmı, çempionluq münasibətilə kimisə təbrik etdiz?
- Futbolçularla yoldaş kimi hal-əhval saxlamışıq. Təbii ki, çempion olandan sonra da münasibətimin olduğu adamları təbrik etdim.

- “Şamaxı” ötən mövsümün son turlarına qədər yerli futbolçularla yola davam etdi. Amma bu acı sonla bitdi. Eyni prinsipin təkrarlanmasını doğru sayırsız?
- Məncə, normal və maraqlı strategiyadı. Xeyli yerli futbolçu inkişaf etdi, üzə çıxdı. Bundan sonra olacaqlar haqda isə mənim nəsə deməyim düz çıxmaz. Yəqin ki, rəhbərlik hər şeyi götür-qoy edib bəlli bir strategiya hazırlayacaq.

- “Qəbələ” 1-ci liqaya düşəcək. Amma əksəriyyət elitada qalmasını istəyirdi. Belə olsaydı, “Şamaxı”ya haqsızlıq olardı?
- Düşünürəm ki, çempionatın daha maraqlı olması üçün mütləq sonuncu yeri tutan komanda liqani tərk etməlidi.

- Ümumiyyətlə “Qəbələ” növbəti mövsüm “Şamaxı” ilə bağlı ssenarini təkrarlaya bilər?
- İnanıram ki, “Qəbələ” də gələn mövsüm premyer-liqaya qayıda biləcək.

- “Sektor 56” uğursuzluğun ardından “Şamaxı”nı boykot etmişdi. Yalnız yaxınlarda stadiona döndülər. Bununla bağlı nə deyərdiz, bölgə azarkeşlərini necə görmək istərdiz?
- Azarkeşlər öz komandasından daim qələbə gözləyirlər. Bəzən belə inciklik ola bilir. Onlara öz komandalarının arxasında durmağı və dəstək olmağı arzulayıram.

- Son vaxtlar Ramiz Məmmədovun istefaya göndəriləcəyi ilə bağlı şayiələr dolaşır. Buna münasibətiniz?
- Bu barədə bir söz deyə bilməyəcəm. Çünki klub daxilində gedən proseslərdən xəbərsizəm. Hər halda, klub üçün xeyirli bir qərar olar.

RÖYANƏ OĞUZ