Bu oyuna hədsiz böyük maraq var idi.

Meydan sahiblərinin qələbədən başqa hədəfi yox idisə, elitadan gedişi rəsmiləşəndən sonra ardıcıl üç qələbə qazanan qonaqlar da xal üçün döyüşəcəkdi. Stadionda əsl futbol ab-havası var idi. Belə ab-havada “Sumqayıt” dərhal hesabı açmağa çalışdı. Rezabalanın uzaqdan birbaşa qapıya zərbəsini Rəşad Əzizli çətinliklə dəf etməyi bacardı. 26-cı dəqiqədə topa yiyələnən Eşqin bir rəqibdın yayınsa da, uğursuz zərbə ilə yadda qaldı. “Kimyaçılar” növbəti şansı 36-cı dəqiqədə yaxaladı, amma Cordan imkanı asanlıqla əldən verdi. 42-ci dəqiqədə Kamran fərqlənməyə yaxın olsa da, Rəşad Əzizli bu dəfə də təslim olmadı. Hissənin sonuna qədər başqa təhlükəli vəziyyət olmadı. İkinci hissə “Sumqayıt”ın kəskin təzyiqiylə başladı və ilk yarı ilə müqayisədə daha canlı keçdi. 52-ci dəqiqədə “Sumqayıt” qol istəyinə çatdı. Tələsik yerinə yetirilən kornerin ardından Dossonun cərimə meydançasına ötürməsini Sorqa bir toxunuşla tora qovuşdurmaq istəsə də, son toxunuş “Qəbələ”nin futbolçusu Afrikodan gəldi. Ancaq qol moldovalı futbolçunun ayağına yazıldı - 1:0. 66-cı dəqiqədə “Qəbələ” bərabərlik qolunu vurmağa yaxın oldu. Bauk topu komanda yoldaşı Allaşa ötürdü. 26 yaşlı belçikalı yarımmüdafiəçi uzaqdan qapıya zərbə vursa da, top qapıdan yan keçdi. Ruhdan düşməyən “qırmızı-qaralar” ardıcıl hücumlar qursa da, qələbəni əldən verməyən “kimyaçılar” Konfrans Liqasına vəsiqə qazandı.

Gözdən qaçmadı
* Oyundan əvvəl “Sumqayıt” azarkeşlərini alqışladığı təqdirdə “Qəbələ”nin futbolçuları şəkil çəkdirirdi.
* 10-cu dəqiqədə projektorlar işə düşdü.
* Oyunun 20 dəqiqəsinin arxada qalmasına baxmayraq, azarkeşlər tribunalara axışırdı.
* 90-cı dəqiqədə Samir Abasov azarkeşləri daha ucadan dəstək verməyə səsləyirdi.

ƏSƏD SEYİDOV