“2” alan Alleqri qovuldu
İtaliya kubokunun finalı ciddi insidentlə sona çatıb.
“Football-plus.az” xəbər verir ki, “Atalanta” – “Yuventus” oyunundan (0:1) sonra qalmaqal yaşanıb.
“Yuventus”un baş məşqçisi Massimiliano Alleqri “Tuttosport” qəzetinin baş redaktoru Qvido Vakiqonun üstünə hücum çəkib. 56 yaşlı mütəxəssis ona bu cümlələri ünvanlayıb:
“Bəli, redaktor! Bəli, siz pis rejissorsunuz. Öz qəzetinizdə cəmiyyətin sizə diktə etdiyini yox, həqiqəti yazın! Oxucuları aldatmağı dayandırın”.
Vakiaqo ona cavabında qəzetdə həmişə yalnız doğru xəbər və şərhlərin yazıldığını bildirib:
“Tuttosport”da həmişə həqiqəti yazmışıq. Bəyənsəniz də, bəyənməsəniz də”.
Qeyd edək ki, Alleqri matçın son dəqiqələrində hakim Fabio Mareskanın qərarından narazılığını kəskin şəkildə bildirdiyi üçün texniki zonadan qovulub. Yerli federasiya buna görə ona 2 oyunluq cəza kəsib. Baş məşqçiyə verilən cəza yalnız ölkə kubokunun oyunlarında tətbiq ediləcək.
Yeri gəlmişkən, “Yuventus” bir müddətdi danışıq apardığı “Bolonya”nın çalışdırıcısı Tyaqo Mottaya 3 illik müqavilə təklif edib. Bu barədə insayder Fabritsio Romano məlumat yayıb. Braziliya əsilli italiyalı mütəxəssis 2022-ci ildən başçılıq etdiyi “Bolonya”dakı uğurlu işi ilə digər klubların da diqqətini cəlb edib. A seriyasında mövsümün sonuna 2 tur qalmış “Yuventus”u qabaqlayaraq 3-cü yeri tutan “Bolonya” 60 illik fasilədən sonra Çempionlar Liqasına vəsiqə qazanıb. Tyaqo Mottanın fevral ayından bəri danışıq apardığı turinlilərə hansı cavab verəcəyi hələlik məlum deyil. Romanonun xəbərində “Yuventus” rəhbərliyinin Alleqrini istefaya göndərəcəyi də da qeyd olunub. Bu iddia artıq təsdiqini tapıb. Turin klubu cümə günü onu istefaya göndərib.
Digər xəbərlər
