Bu gün futbol üzrə ölkə çempionatının 1-ci liqasında sonuncu – 27-ci turun oyunları keçiriləcək. Eyni saata başlayacaq oyunlar PFL-in “1-ci liqa/2-ci liqa” “yutub” kanalında canlı yayınlanacaq.

İlk matçda MOİK “İmişli”ni qəbul edəcək. Hadisələr fərqli yöndə cərəyan etsə, iddialı komandaların oyununu başqa cür dəyərləndirə bilərdik. Lakin hər ikisi həlledici məqamlarda büdrədiyi üçün sadəcə, 3-cü pillə uğrunda gərgin mübarizə izləyəcəyik. Həm Qəzənfər Abbasov, həm də Əsgər Abdullayev komandasını məhz bu məqsədlə motivasiya etməlidi. Tərəflərin güc nisbəti, demək olar ki, eynidi. Matçın “doğma divarlar” arasında keçirilməsi üzündən MOİK-in daha şanslı olduğunu deyə bilərik. İş orasındadı ki, mümkün “sülh” “İmişli” üçün qaneedici nəticədi.

İkinci oyunda “Şamaxı” “Araz Saatlı”nı sınağa çəkəcək. Liderlə autsayderin qarşılaşması çempionun adına aydınlıq gətirəcək. Ötən həftə ən iddialı rəqibini – “Qaradağ Lökbatan”ı məğlub edən “şirlər”in işi nisbətən asandı. Buna baxmayaraq, oyunun evdə keçirilməsi, rəqibin 1-ci liqanı tərk edəcəyi rəsmiləşən komanda olması çempion olmaq və premyer-liqaya yüksəlmək istəyiylə alışıb-yanan kollektivi arxayınlaşdırmamalıdı. Çünki “Araz Saatlı” mövsümün sonuncu sınağından üzüağ çıxmaq, 1-ci liqanın “qapısını möhkəm çırpmaq” istəyə bilər. Hər halda, Ramiz Məmmədov ən incə detalları belə nəzərə alacaq.

Üçüncü görüşdə “Mingəçevir” “Qaradağ Lökbatan”la üz-üzə gələcək. “Nur şəhəri”nin təmsilçisi son 8 turda yalnız “İrəvan”ı məğlub edib. Bu, ortabablar sırasında qərarlaşan komandada bəzi çatışmazlıqların olduğuna işarədi. Görünür, Ədəhim Niftəliyev hansısa turnir hədəfi qalmayan komandanı “kökləməkdə” əziyyət çəkir. Aran derbisindən məğlub ayrılan (0:1) “Mingəçevir” doğma meydanda qələbə qazanmaqla azarkeşlərini sevindirməlidi. Bunun asan olmayacağı isə dəqiqdi. Çünki qonaqlar “Şamaxı”nın büdrəmək ehtimalını nəzərə alıb var gücüylə qələbəyə can atacaq. “Şirlər”i çempion elan edənlər çox olsa da, qarşıdakı oyunların final fiti çalınmadıqca nəyəsə əmin olmamalıyıq.

“İrəvan” – “Karvan”, “Difai Ağsu” – “Zaqatala” matçları formal xarakter daşıyacaq. Ona görə ki, bu komandalar üçün mövsüm faktiki başa çatıb.”Karvan” 5-ci pilləylə qane olubsa, “Difai Ağsu” 2-ci liqaya düşməmək üçün pley-off sınağından üzüağ çıxmalıdı. “İrəvan” və “Zaqatala” isə turnir cədvəlinin qonşu pillələrindədi. Bir-birini üstələmələri o qədər də önəm daşımır.

22 may
MOİK – İmişli 2:1
Ramil Orucov, 32. Nihad Qurbanlı, 83 - Maqsud Ələkbərov, 39
Binə. Qəsəbə stadionu. Saat 16.00.

Şamaxı – Araz Saatlı 3:1
Davud Mahmudov, 9. Bəhruz Teymurov, 57. Emin Zamanov, 90+6 - Abdullah Seydəhmədov, 61
Qırmızı vərəqə: Lamin Çam, 81.
Şamaxı. Şəhər stadionu. Saat 16.00.

Mingəçevir – Qaradağ Lökbatan 2:2
Elvin Əlizadə, 57, 90+5 - Xəlil Bəşirov, 11. Mehdi Tahirov, 27.
Mingəçevir. Yaşar Məmmədzadə adına şəhər stadionu. Saat 16.00.

İrəvan – Karvan 3:8
Vüsal Əsgərov, 19-p. Fərid Kərimzadə, 45, 67 - Peter Kinqs, 9, 78. Emil Qasımov, 24, 40, 48. Ruslan Süleymanov, 28. İsmael Sanoqo, 80, 88.
Bakı. “ASK Arena”. Saat 16.00.

Difai Ağsu – Zaqatala 1:1
Kamil Hüseynov, 87 - İbrahim Qədirzadə, 82
Ağsu. Şəhər stadionu. Saat 16.00.

Xal durumu: Şamaxı – 57, Qaradağ Lökbatan – 54, MOİK – 49, İmişli – 47, Karvan – 44, Zaqatala – 31, İrəvan – 27, Mingəçevir – 27, Difai Ağsu – 23, Araz Saatlı – 13.
Bombardirlər: Elmir Rəhimzadə (MOİK) – 16, Elşad Tağıyev (Şamaxı) – 15.

KƏNAN BAHADIR