“Doğrusu, bu qərarı öyrəndikdə təəccübləndim. Çünki bizdə Barış Şimşək kimi hakimlər komitəsinin sədri, Türkiyədə VAR sahəsində tanınan mütəxəssis var. Azərbaycana gələndən sonra da VAR-la bağlı yerli hakimlərə bir sıra təlimlər keçib. Yəqin belə qərar yerli hakimlərə etibarsızlıqdan irəli gəlir. Çempionatın sonuna iki tur qalıb. Öz hakimlərimiz işə daha məsuliyyətli və ciddi şəkildə yanaşardılar. Əcnəbi hakimlərin çempionat oyunlarına müdaxilə etməsi bizim vaxtımızda da olmuşdu. Heç yadımdan çıxmaz, hətta oyunların birində baş hakimi meydanda elan etdilər. Bizə də dedilər ki, siz gedə bilərsiz. O hadisə özümüzə də psixoloji cəhətdən təsir etmişdi. Ki, biz qala-qala, başqa ölkədən gəlib oyun idarə edirlər. Bu qərar mənim üçün qaranlıq qaldı. Avropadan referi gətir, onun üçün artıq vəsait xərclə… Məncə, bu, düzgün yanaşma deyil”.

“Hakim necə azdı? Bəs hakimlər üçün bu qədər vəsait hara ayrılır? Xaricdən hakimlər komitəsinə sədr təyin olunur. Deməli, ölkədə hakim yetişməlidi. Azərbaycanda o qədər qətiyyətli, gənc hakimlərimiz var. Onları üzə çıxarmaq lazımdı. Əsasən də regionlarda. Yenə baxıram ki, İnqilab Məmmədovdu, Rauf Cabbarovdu, Əliyar Ağayevdi, Rəvan Həmzəzadədi. Rəvan o vaxt köməkçi hakim idi. Onu önə çəkdik və indi görürəm ki, ən yaxşı hakimlərdəndi. Bəs son 10 ildə bunlar hansı işlə məşğul olub ki, indi də deyirlər hakim azdı. Hər şey planlı şəkildə getməlidi. 10 ilə yaxındı hakimlər komitəsinin sədri əcnəbilərdi. Əvvəl Avstriyadan gəldi, 5-6 il ölkəmizdə vaxt keçirəndən sonra getdi. İndi də türk qardaşımız bir neçə ildi burdadı, VAR-ı təkmilləşdirmək istədi, alınmadı. Buna görə də xaricdən hakim gətirilir. Belə durum inamsızlıq yaradır. Hakimlərimiz də psixoloji cəhətdən sarsılır. Özüm də o dönəmdə belə hadisəyə görə “sındım”. Doğrudu, məni 4-cü hakim kimi saxladılar. Səhv etmirəmsə, Tofiq Bəhramov adına Respublika stadionunda keçirilən “İnter” - “Neftçi” görüşündə son anda elan etdilər ki, oyunu idarə edəcək hakimlər Almaniyadandı. Baş hakim isə köməkçi gedə bilər. Bilirsiz, adama nə qədər təsir edir? Həmçinin indi də. Artıq ilin yekunudu, komandalar kimi, hakimlərimiz də əziyyət çəkib. Yoxsa indi əcnəbi hakim gələcək, 5-3 manat da artıqlamasıyla cibinə qoyulacaq. Oyun ərzində də VAR-da baxılmalı bir-iki epizod olacaq, ya olmayacaq. Sonra da deyiləcək ki, əcnəbi hakimlər gəldi, ədaləti qorudu. Hələ yaxşı ki, bizim premyer-liqada 16-18 komanda yoxdu. Cəmi 10 komandadı, 10 hakim yetişdirib, ortaya çıxara bilmirik. Uzun illər bu sahənin içində olmuşam. Buna görə də mənə təsir edir. Neçə illərdi əcnəbilər hakimlər komitəsinin sədri təyin edilir, N qədər də vəsait xərclənir. İlin yekununda onları divara dirəyib hesabat almaq lazım deyilmi ki, il ərzində neçə hakim yetişdirmisiz? Belə şeyləri həmin komitə sədrlərindən vaxtında soruşmaq lazımdı. Ki, sənə bu qədər maliyyə ayrılıb, nə etmisən, nəyə xərcləmisən? Sonra da çempionatın bitməsinə 2 tur qalmış gedib əcnəbi gətirirsiz. Özü də VAR üçün. Bu baxımdan mən hakim qıtlığıyla bağlı səslənən fikirlərdən tam narazıyam. Hakim kasadlığını yaradan elə özümüzük”.