Misli premyer-liqasının 35-ci turunda “Qarabağ” “Turan Tovuz”u 4:3 hesabıyla məğlub edib.

“Football-plus.az” xəbər verir ki, matçdan sonra “köhlən atlar”ın baş məşqçisi Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:

- Azərbaycanlı məşqçilər xarici ölkələrdə təcrübə keçir. Maraqlıdı, başqa ölkələrdən sizin yanınızda təcrübə keçmək istəyən olub?
- Xaricdən gələnlər olub, yəqin məlumatınız var. Polşadan, Rusiyadan gəliblər.

- AFFA İcraiyyə Komitəsinin iclasından sonra infrastrukturla bağlı problemdən söz açmışdız İnfrastrukturu formalaşdırmaq üçün ən azı nə qədər vaxt lazımdı?
- Vaxt demək düzgün çıxmaz. Mütləq yaxşılaşdırmaq lazımdı. Klublar böyüsə, stabil iş prinsipləri olsa, elə də vaxt lazım deyil. Bizim öz bazamızı ərsəyə gətirməyə maksimum iki il vaxt getdi. Məncə istək olsa, elə də uzun vaxt aparmaz. İnfrastruktur ən vacib amillərdən biridi.

- "Qarabağ"la müqaviləniz nə vaxt bitir?
- Hələ komanda ilə birllik müqaviləm var.

- Portuqaliya mətbuatının yazdığına görə, Leandro Andrade ilə "Fənərbaxça" və "Beşiktaş" maraqlanır. Bu, nə dərəcədə doğrudu?
- Bizdə belə məlumat yoxdu.

- Son iki turun bir neçə oyununda əcnəbi VAR hakimi olacaq? Sizcə, buna ehtiyac var?
- Mən heç xoş qarşılamadım. Hamımız öz sahəmizdə aktiv olmağa çalışmalıyıq. Səhvlər olur. Bilmirəm VAR sistemi nə dərəcədə qəlizdi. Cavan kadrlardı, ola bilər ki, haradasa səhv edərlər. Bizim hakimimiz Əliyar Ağayev Yunanıstan çempionatında oyun idarə edir. Bizdən ora gedirlərsə, deməli güvənirlər. Hakimlərimiz elə etməlidi ki, başqalarına şans verilməsin.

- Hakimlər özləri günahkardı?
- Mütləq. Daha çox aktiv olmalıdılar.