Misli premyer-liqasının 23-cü turunun təxirə salınmış oyununda "Qəbələ" "Qarabağ"ı qəbul edib - 0:4.

"Football-plus.az" xəbər verir ki, oyundan sonra qonaqların çalışdırıcısı Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:

- "Neftçi" ilə matçda "Bayer"lə oyunun heyətini meydanda görə bilərik?
- Ola bilər. Çox ehtiyat edirik. Futbolçularda yorğunluq var. Çox güc sərf ediblər. "Neftçi" və "Bayer"lə oyuna kimi hamı bərpa olacaq.

- Juninyonun durmu ciddidi?
- Tam ciddi deyə bilmərəm. Amma böyük ehtimalla problem olacaq. Sabah dəqiq bilinəcək.

- Kaxaber Sxadadzeni illər sonra görmək sizdə hansı təəssüratları yaratdı?
- Onu görmək maraqlı və çox xoş oldu. Onun komandalarına qarşı hazırlaşmaq üçün həmişə çox vaxt sərf etmişəm. İlk hissədə göründü ki, o qədər də asan olmayacaq.

- Nəriman Axundzadənin daha da inkişaf etməsi üçün onu Avropaya göndərmək olar?
- Mənim təcrübəm onu deyir ki, gənc futbolçuların "Qarabağ"da oynaması onların inkişafını tezləşdirir. Başqa mentalitetdə olan futbolçulardı. Bu gün Avropaya getməkləri tezdir. Getsələr, onların inkişafı dayana bilər. 2-3 il burada böyük oyunlarda iştirak edib Avropaya getsələr, daha yaxşı olar.

- Mahir Emreli təcrübəsini nəzərdə tutursuz?
- Tək Mahir yox. Musa da, Ramil də gedib. Çox futbolçu "Qarabağ"da daha çox inkişaf edir, nəinki Avropa klublarında. Legioner həyatı yaşamaq hər futbolçu üçün asan deyil. Onların tələblərinə, yaşam tərzinə uyğunlaşmaq çətindi.

- Bəhlul Mustafazadənin yayda Avropaya gedəcəyi deyilir. Siz bu haqda nə deyə bilərsiniz?
- Yazılar yazılır, mənim məlumatım yoxdu. Dəfələrlə demişəm ki, insan öz işini düzgün dəyərləndirməlidi. Gedəndən sonra 1-2 ay partlayış olur, sonra zəifləyirlər. Onların daim oynaması lazımdı. Futbolçular olub ki, "Qarabağ"da çıxış edəndə milli komandanın əsas üzvü idilər, gedəndən sonra 10-15 dəqiqə oynayırlar. Tək oyunçu yox, onun yaxınları da düzgün qərar qəbul etməlidi. Biz özümüz də belə hallara məsuliyyətlə yanaşmalıyıq. Çünki, onlar Azərbaycan futbolunun simalarıdılar.

- Sizcə, premyer-liqadan düşmək ləğv olunmalıdı, yoxsa idman prinsipləri qorunmalıdı?
- Komanda sayını artırmayacaqlarsa, qaydalara riayət etmək lazımdı. Əvvəllər mən İcraiyyə Komitəsinin üzvü olanda da bu məsələ müzakirə olunmuşdu. Mən o fikirdə qaldım ki, idman prinsipləri qorunmalıdı. Birdəfəlik sistem qurmaq lazımdı. Hamı bilməlidi ki, nə üçün mübarizə aparır. Aşağı liqanı da yaxşılaşdırmaq lazımdı.