“Burda məni ən çox cəlb edən bazanın və stadionun gözəlliyi, eləcə də fanatların kluba bağlılığı oldu. Bu azarkeşlər nəinki superliqaya, hətta Çempionlar Liqasına da layiqdi. Bundan başqa, İzmir inkişaf etmək potensialına malik olan gözəl bir şəhərdi. Biz də “Sport Republic” olaraq, bu potensialdan yararlanmaq istədik və burda uğurlu bir komanda qura biləcəyimizə inandıq. Planımızın ilk hissəsini tamamladıq. İndi isə ikinci addımı atmağa hazırlaşırıq. Superliqada oynamaq bizim üçün böyük bir meydan oxumaq fürsətidi. Sürətli addımlar atmaq heç kimə fayda gətirməyəcək. Yavaş-yavaş inkişaf edib potensialımızı açmağa çalışacağıq. Bir il uğur qazanıb növbəti mövsüm ortadan itən klublardan olmaq istəmirik. Sabitlik yaxalamağa çalışan bir “Göztəpə” yaradacağıq. İlk növbədə fanatlarımıza təşəkkür edirəm. Bizi gözəl dəstəkləyirlər. Futbolda nəyəsə söz vermək və sonra da onun arxasında durmaq ən çətin şeylərdən biridi. “Göztəpə”nin hər ötən gün daha da güclənəcəyinə və İzmirin çox önəmli bir təmsilçisi olacağına inanıram. Superliqa birinci liqadan fərqli turnirdi. Yeni mövsümlə bağlı çalışmalara başlamışıq. Hər kəsə hörmətlə yanaşacağıq. Təvazökar olacağıq. Amma eyni zamanda meydana öz gücümüzə inanaraq çıxacağıq. Ən yaxşı nəticələri qazanmağa səy göstərəcəyik. Fikrimcə, 2024/25-də bir çoxlarını təəccübləndirəcəyik. Əvvəlki başqan Mehmet Sepili klubun fəxri prezidenti elan edəcəyik. Məhz onun dönəmində güclü “altyapı”nın təməlləri qoyulub və baza tikilib. Bunlar olmadan bugünkü uğurları əldə etmək mümkün olmazdı. Eyni zamanda o olmadan biz bu klubu ələ keçirib bugünkü günlərə qədər gəlib çıxa bilməzdik. “Sport Republic”in Afrika da daxil olmaqla bir çox yerlərdə oyunçu izləyən komitəsi var. Gənc istedadları tapıb ortaya çıxarmaq hədəfimiz var. Onları tapmağa və Türkiyəyə gətirərək “Göztəpə”yə qazandırmağa çalışacağıq. Transferdə isə ada yox, potensiala önəm verəcəyik. Çünki futbolda dünən yoxdu, gələcək var. Futbolçunun dünən nə etdiyi artıq önəm daşımır. Bundan sonra komandaya nə verə biləcəyi önəmlidi. Türkiyə futbolunda bir çox klub problemləri transferlərlə yoluna qoymağa çalışır. Bu, düzgün deyil. Lap tutaq ki, bir neçə yaxşı futbolçunu bir komandaya topladın. Ortada düzgün bir plan yoxdusa, o zaman uğur qazana bilməyəcəksən. Səbirli olmaq, komanda üçün doğru oyunçuları və doğru məşqçini tapmaq lazımdı. Türkiyədə səbr məsələsi, bütün dünyada olduğu kimi, bir qədər qəlizdi. “Sport Republic”in tabeliyində olan “Sauthempton” da premyer-liqaya vəsiqə uğrunda mübarizə aparır. Pley-offların başlamasını gözləyirik. Ümid edirəm ki, “Göztəpə”nin uğurunu “Sauthempton” da təkrarlayacaq. Bu iki klub arasında oyunçu mübadiləsinin olacağını istisna etmirəm”.