Nadal: “Qorxunu dəf etməyin zamanı gəldi”
Dünya tennisinin ispaniyalı ulduzu Rafael Nadal fiziki durumu haqda fikirlərini bölüşüb.
“Football-plus.az” xəbər verir ki, “Böyük dəbilqə” turnirlərinin 22 qat qalibi mayın 8-də Romada start götürən “Masters” seriyalı turnirin ilk mərhələsində belçikalı Ziza Berqsə qalib gəlib (4:6, 6:3, 6:4):
“Bütün gücümü kortda qoymağın vaxtı gəldi. Bu heç də asan deyil. Ona görə ki, bəzi zərbələri vurarkən qorxu hissini dəf etmək lazım gəlir. Məsələn, Brisbendə ötən il əməliyyat olunduğum nahiyədə əzələm yırtıldı. Belədə qonşu əzələlər daha artıq yükün, gərginliyin öhdəsindən gəlməli olur. Bütün bu əzələlərin bədənin yeni koordinasiyasına uyğunlaşması üçün vaxt lazımdı. Mənim isə bu qədər vaxtım yoxdu. Bax, problem bundan ibarətdi, reallıq belədi”.
37 yaşlı ispaniyalı ulduz onu da əlavə edib ki, sağlıq durumu ilə bağlı istənilən nəticəyə hazırdı:
“Cəmi iki həftə sonra “Rolan Qarros” başlayacaq, bu üzdən... Elə bir an yetişib ki, özüm-özümə sual verirəm: maksimum bacarığımı ortaya qoymağa, məni irəlidə gözləyən sınaqlara hazırammı?”
Xatırladaq ki, “Rolan Qarros” turniri bu il mayın 26-da start götürəcək, iyunun 9-na qədər davam edəcək.
Yeri gəlmişkən, yuxarıda xatırladılan Berqslə oyun Nadalı daha bir göstəricidə tennis tarixinə salıb. O, torpaq kortda 200 qələbə qazanan ilk tennisçidi.
Digər xəbərlər
