“O, bir neçə il əvvəl premyer-liqada (“Sumqayıt”, “Xəzər Lənkəran”, “Kəpəz”, “Zirə”, “Səbail” – red.) çıxış edib. Deməli, hansısa səbəb olub ki, bu komandalardan ayrılıb. Mən də həmin səbəbləri görüb özüylə danışmışam. Ümumiyyətlə, belə bacarıqlı futbolçunun diviziona qədər düşməsinin səbəbləri var. Bəzən insanın səhvini deyəndə yanlış anlayır. Ya qısqanclıq kimi başa düşür, ya da səndən ağıllı olduğunu zənn edir. Belə deyil. Məşqçi, dost futbolçuya nəsə tövsiyə verə bilər. İnsan bunu başa düşmürsə, artıq onun öz problemidi”.

“Azər müəllimin hansı səbəbləri nəzərdə tutduğunu mən də bilmirəm. Əvvəlki komandalardan ayrılmağım ya müqavilə müddətimin bitməsiylə bağlı olub, ya da şəxsi məsələlərlə. Heç bir klubla problem yaşamamışam. Azər müəllimə həmişə hörmət etmişəm. Kömək lazım olanda özüylə danışmışam, dediklərinə əməl etmişəm. Aramızda söz-söhbət olmayıb. Dəfələrlə Azər müəllimə zəng edib uğur arzulamaq istəsəm də, dəstəyi qaldırmayıb. Bu, mənə hörmətsizlik deyil? Bəli, son vaxtlar oyunum alınmır. O demək deyil ki, üzərimdə çalışmıram, ya nəyisə qəsdən edirəm. Komandama dəstək olmaq üçün çox əziyyət çəkmişəm. Çalışqanlığım haqda heç kim mənə irad bildirə bilməz. Azər müəllimlə həm dost, həm də məşqçi - futbolçu münasibətim olub. İndi düşmən olduq?”

“Maaş haqda danışmaq istəmirəm. Məlumatı təsdiq etmirəm, amma bu, olsa belə, problem deyil. İndi elə zəmanədi ki, AFFA, FİFA və UEFA bu barədə ciddi tədbirlər görə bilir. Kiminsə pulu verilməyəndə məsələni həll etmək olur. “Araz-Naxçıvan”la müqaviləm var. Bilirəm ki, maaş gec də olsa, veriləcək. Müddətin elə də fərqi yoxdu. Elmar Baxşıyevə gəlincə, o, çox yaxşı insan və məşqçidi. Fəlsəfəsini bizə aşılamağa çalışır. Sadəcə, qələbə qazana bilməməyimiz mənfi təsir göstərir. Bütün çatışmazlıqların aradan qalxacağına inanıram”.