Son dönəmlərdə nəticələri ilə dünya futbol ictimaiyyətinin diqqətini cəlb edən “Əl-Hilal”ı, nəhayət, dayandıran tapıldı.
Tanınmış portuqaliyalı mütəxəssis Jorje Jezuşun çalışdırdığı Səudiyyə Ərəbistanı təmsilçisi hələ martın 12-də adını futbol tarixinə yazdırmışdı. Həmin vaxt “Əl-Hilal” Asiya Çempionlar Liqasının 1/4 final mərhələsinin cavab oyununda “Əl-ittihad”ı səfərdə 2:0 məğlub etmişdi. Bununla da Ər-Riyad təmsilçisi rəsmi matçlarda ardıcıl 28-ci qələbəsini qazanaraq peşəkar klublar arasında yeni dünya rekordçusuna çevrilmişdi. Əvvəlki rekordu 2016-cı ildə ardıcıl 27 qələbə qazanan Uels təmsilçisi TNS müəyyənləşdirmişdi. Heyətində Bunu, Kulibali, Neveş, Milimkoviç-Saviç, Mitroviç, Malkom və Neymar kimi tanınmış ulduzların yer aldığı “Əl-Hilal” həmin tarixdən sonra daha 6 qələbə qazanaraq rekordu 34 oyuna çatdırdı. Amma hər seriyanın bir sonu olduğu kimi, bu möhtəşəm seriya da başa çatdı. Aprelin 17-də “Əl-Hilal” Asiya ÇL-in yarımfinalının ilk oyunu çərçivəsində BƏƏ təmsilçisi “Əl-Əyn”in qonağı oldu. Əsas qol silahı zədəli Mitroviçsiz oynamaq məcburiyyətində qalan qonaqlar böyük bir şok yaşayaraq hələ fasiləyə qədər 3 cavabsız top buraxdılar.
Mərakeşli Sufyan Raimi 2-si penaltidən olmaqla 38 dəqiqəyə 3 qol vurdu! Maraqlıdı ki, meydan sahibləri ikinci hissədə daha bi penalti qazandılar. Bu dəfə isə zərbəni “Kaku” ləqəbli paraqvaylı Alexandro Romero yerinə yetirdi. Qonaqlar bu 4 topdan yalnız ikisinin əvəzini çıxa bildilər. Beləliklə, “Əl-Hilal” təxminən 8 aydan sonra ilk dəfə bir rəsmi oyunda qələbəyə həsrət qaldı. Komanda sonuncu qələbəsiz oyununu sentyabrın 21-də Səudiyyə Ərəbistanı çempionatının 7-ci turunda səfərdə “Damak”a qarşı keçirmişdi (1:1). Qeyd edək ki, “Əl-Hilal” “Ginnesin Rekordlar Kitabı”na düşən bu 34 oyunluq seriyada qələbələrdən 20-ni daxili çempionatda, 9-nu Asiya ÇL-ində, 3-nü ölkə kubokunda və 2-ni ölkə superkubokunda əldə etmişdi. Komandanın bu müddətdəki məhsuldarlığı və top fərqi də göz-oxşayır. Belə ki, “Əl-Hilal” bu 34 qarşılaşmada 97 qol vurduğu halda, öz qapısından cəmi 15 top buraxdı (bunlardan 7-si son 6 oyuna təsadüf edib). Bu mövsüm artıq superkuboku qazanan və daxili çempionatda da çempionluğun biraddımlığında olan Jezuşun kollektivinin ÇL-də finala yüksəlmək şansı bir qədər çətinləşdi. Cavab oyunu aprelin 23-də baş tutacaq. Yeri gəlmişkən, “Əl-Əyn” daxili çempionatda o qədər də uğurlu mövsüm keçirməsə də, ÇL-də ardıcıl 2-ci dəfə Səudiyyə Ərəbistanı nəhəngini mübarizədən kənarlaşdıra bilər. Yaxın keçmişin tanınmış argentinalı forvardı Ernan Kresponun çalışdırdığı bu kollektiv əvvəlki mərhələdə penalti seriyasında Kriştiano Ronaldonun şərəfini qoruduğu “Əl-Nəssr”i üstələmişdi. “Əl-Əyn” BƏƏ çempionatında son 4 turda qələbəyə həsrət qalıb və 18 oyuna topladığı 36 xalla lider “Əl-Vəsl”dən 15 xal geridədi.