Misli premyer-liqasında 29-cu tur geridə qaldı. “Araz-Naxçıvan” – “Kəpəz” oyunundan sonra növbəti istefa reallaşdı. Artıq Azər Bağırov naxçıvanlıların “sükanı arxasından” çəkilib.

Onları mövsümün qalan oyunlarına “Qəbələ”nin sabiq çalışdırıcısı Elmar Baxşıyev çıxaracaq. Əlbəttə, köməkçiləriylə birgə. Baxşıyev Xaqani Məmmədovla Rasim Ramaldanovu da özüylə “qırmızı-ağlar”ın düşərgəsində aparıb. Hər halda, uğurlar arzulayırıq.

Sözümüzün canına keçid alaq. Komanda hazırda 32 xalla turnir cədvəlinin 8-ci pilləsindədi. Buna qədər daha yüksək sıralarda olan naxçıvanlılar xal itirdikcə aşağı endi. Təbii ki, başverənlərin günahkarlarını vurğulamaq, hər birinə bir neçə sual ünvanlamaq lazımdı. Axı Azər Bağırovun istefası bütün günahların məhz onda olması demək deyil! Bu məqam futboldan azca anlayışı olan hər kəsə yaxşı məlumdu. Xatırlayırsızsa, hələ mövsüm başlamamış “Araz-Naxçıvan” rəhbərliyində baş verən dəyişikliklərdən yazmış, yeni İdarə Heyətinin Azər Bağırovun qarşısına qoyduğu məqsədi diqqətinizə çatdırmışdım. Müəllifi olduğum “Reallıqla uzlaşmayan arzu” yazısında bir məqamı xüsusi vurğulamışdım. Yada salaq: “Araz Naxçıvan”ı növbəti mövsümün sonunda Avropada görmək istəyən rəhbərlik istəyinə çatmasa, qüsuru kimdə axtaracaq? Komandanın ev oyunlarını “doğma divarlar” arasında keçirməsi üçün şərait yaratmayan, yerli və legioner futbolçularla rahat danışıq aparmayıb transfer prosesini həftələrlə gecikdirən əvvəlki rəhbərlikdə? Bunu zaman göstərəcək. O bəllidi ki, “Araz Naxçıvan” ilk “dördlük” arzusunda gecikib…”

Ötən ilin iyulunda bəhs etdiyim məqam indi üzə çıxır. Özü də sabiq rəhbərliyin buraxdığı səhvləri düzəltmək əvəzinə daha betərini edən yarıtmaz idarəçilər üzündən! “Araz-Naxçıvan” ev oyunlarını bir neçə aydı Bakıda keçirir. Nə yeni stadion tikilir, nə də əvvəlki idman qurğusu təmir olunur. Azı 500 min nəfər əhalisi olan respublikanı təmsil edən komandanın ev oyunlarında heç 500 azarkeş iştirak etmir. Əlbəttə, bu yöndə məsuliyyət birbaşa rəhbərliyin üzərindədi. “Yuxarıların” növbəti səhvi qış fasiləsində heyəti gücləndirməməkdi. Maraqlıdı, pul yox idi? Onda niyə büdcə çatışmazlığıyla bağlı xəbərləri “şayiə” adlandırırsız? Futbolçu tapa bilmədiz? Bəs “Səbail”, “Zirə”. “Turan Tovuz” hətta “Qəbələ” necə tapdı? Başqa səhv isə premyer-liqa debütantından avrokubok tələbidi. Vallah, bu istək o qədər absurddu ki, adam şərh vermək istəmir! Ona görə ki, bunun üçün komanda və məşqçilər korpusuna lazımi şərait yaradılmayıb!

Azər Bağırova gəlincə, gənc mütəxəssis istefa verməklə “günahını yudu”. Amma onun “sudan quru çıxdığını” desək, yanılarıq. İstəksiz Orxan Əliyev, tələskən Turan Manafov, qeyri-dəqiq Məhəmməd Kadiri, sönmüş ulduz Miço Kuzmanoviç, yarıtmaz sabiq kapitan Neman Kurdiç, meydanda hiss olunmayan İsmail Azzaui, Aksel Nqando, Vanderson Melo, Nuno Rodriges, Elvis Maşike kimi legionerlər Azər Bağırovun əl işidi. Eləcə də son 18 turda qazanılan 2 qələbə! Formul çox sadədi. Hər şeyi “Araz-Naxçıvan”ın mövsümə uğurlu başlamasına bağışlamaq mümkün deyil. Sadəcə, rəqiblər debütantı ciddiyə almadı ki, bu üzdən sillələndi. Nəticədə həm Azər Bağırov, həm də komandası ciddi təhlil edildi və lazımi tədbirlər görüldü. Bununla da nağıl bitdi. İndi nələrisə dəyişmək lazımdısa, bunu rəhbərlik edəcək. Ən azı ilkin səhvlər aradan qaldırılmalıdı. İndiki şərtlər daxilində isə Elmar Baxşıyevdən də fərqli nəsə gözləməyə dəyməz!

KƏNAN BAHADIR