Cümə axşamı Ukrayna çempionatından 6-cı turdan təxirə salınan “Zarya” – “Dinamo” oyunu keçirildi.

"Football-plus.az" xəbər verir ki, məhz luqansklıların üç sabiq oyunçusunun vurduğu qollar “Dinamo”ya qələbə qazandırdı. Kiyevlilər bu qələbə sayəsində turnir cədvəlində 3-cü pilləyə yüksəlməklə yanaşı, liderlərə də çox yaxınlaşdı.

Oyun başdan sona qədər “Dinamo”nun ssenarisi altında keçdi. Yetərincə tez yekun nəticənin necə olacağı bilindi. Kiyevlilərə hesabı açmaq üçün cəmi 7 dəqiqə lazım gəldi. Çurkonun cərimə meydançasının xətti üzərində yol verdiyi səhvdən sonra başlayan üçgedişli kombinasiya Andriyevskinin dəqiq zərbəsiylə bitdi. Hissənin ortalarında hesab artıq 2:0 idi. Sol cinahdan mərkəzə meyillənən Kabayev orta məsafədən yaxın “9-luğ”a qarşısıalınmaz zərbə vurdu. Əlbəttə, irəlidə oyunun axarını dəyişmək üçün vaxt çox idi. Ancaq “Zarya” bütün klubdaxili problemlər fonunda “Dinamo”dan iki top geriliyin əvəzini çıxmağa qadir olan komanda deyil. Odu ki, bütün 2-ci hissə yalnız nominal meydan sahiblərinin (oyun “Dinamo”nun arenasında keçirildi) böyükhesablı məğlubiyyətdən yaxa qurtara bilib-bilməyəcəyi sualına cavab axtarışında keçdi. “Zarya” bunu bacarmadı – 67-ci dəqiqədə Brajko künc zərbəsindən sonra fərqi darmadağın həddinə çatdırdı.

Arıq “Şaxtyor”la “Dinamo”nun oyun sayı eynidi. Deməli, sona qədər çempionluq mübarizəsinin məhz bu iki komanda arasında gedəcəyini güman etmək olar. Hazırda “şaxtaçılar” kiyevliləri cəmi 2 xal qabaqlayır.

6-cı turdan təxirə salınan oyun
Zarya – Dinamo 0:3
Andiyevski, 7. Kabayev, 22. Brajko, 67.
Dinamo: Buşan, Dyaçuk, Vivçarenko, Popov, Tımçik, Voloşin (Yarmolenko, 60), Brajko, Andriyevski, Şaparenko (Ponomarenko, 76), Kabayev (Diallo, 76), Vanat (Benito, 76).
1-2. Şaxtyor, Krivbass – 46, 3. Dinamo – 44... 12. Zarya – 22...
Bombardir: Vanat (Dinamo) – 11.