“Fənərbaxça” superliqadan çəkiləsi olmadı
Aprelin 2-də “Fənərbaxça” camiəsində böyük maraqla gözlənilən toplantı baş tutdu.
"Football-plus.az" xəbər verir ki, “Ülkər” stadionunda keçirilən və klubun 23 minə yaxın rəsmi üzvünün qatıldığı toplantıda İstanbul nəhənginin bundan sonra atacağı addımlar müzakirə olunacaqdı. Bilindiyi kimi, bu toplantını başqan Əli Koç Trabzonda yaşanan son olaylara etiraz əlaməti kimi keçirdi. Burda komandanın çempionatdan çəkilməsi, eləcə də başqa vacib məsələlər səsə qoyulmalıydı.
Əli Koçun, eləcə də Acun Ilıcalının sərt açıqlamalar verdiyi toplantıda qorxulan olmadı. Yəni “Fənər”in çempionatdan çəkilməsi məsələsi 3 ay sonra keçiriləcək növbəti toplantıya təxirə salındı. Koç bununla bağlı belə dedi:
“Superliqadan çəkilmək məsələsini 3 aylığa gündəmdən çıxarırıq. İndi “Fənərbaxça”nın idman fəaliyyətini dayandırması müzakirə olunmayacaq. Çünki buna əvvəlcədən hazırlaşmaq lazımdı. Fəaliyyəti dayandırmaq yenidən hər şeyə aşağı və həvəskar liqalardan başlamaq deməkdi. Bəlkə də bunun öhdəsindən gələ və hansısa klubla birləşə bilərik. Bu hallar daha öncə bizim futbolda yaşanıb. Amma bütün bunları ətraflı şəkildə götür-qoy etmək lazımdı. Xaricdə lazımi əlaqələri qurmadan bununla bağlı hansısa addım atmaq düzgün deyil. Çempionata davam edəcəyik. Ona görə də superliqa matçlarına U-19 komandası ilə çıxmağın heç bir mənası yoxdu. Kapitanlarımız Cekoya, Tadiçə və Mərt Hakan Yandaşa səslənirəm: çıxın, nə lazımdısa, edin və o çempionluğu bizə gətirin!”
Amma toplantıda bir mühüm qərar qəbul olundu. Belə ki, klubun rəsmi üzvləri tərəfindən idarə heyətinə verilən səlahiyyətlər müəyyənləşdi. Bura superkubok matçına çıxmamaq və ya U-19 komandası ilə çıxmaq, növbəti iki mövsümdə ölkə kubokuna qatılmamaq və ya U-19 komandası ilə qatılmaq, komandanın xaricdə başqa bir milli çempionata keçirilməsi ilə bağlı addımlar həyata keçirmək, eləcə də komandanın haqlarını FİFA və UEFA nəzdində qorumaq kimi məqamlar daxildi. Yəni artıq bu məsələlərin hər birinə “Fənər”in idarə heyəti müstəqil şəkildə qərar verə biləcək. İndi aktuallığını qoruyan bir nömrəli məsələ “sarı-lacivərdlilər”in aprelin 7-də Şanlıurfada “Qalatasaray”a qarşı baş tutacaq superkubok matçına çıxıb-çıxmayacağıdı. Əli Koç toplantıda bu məsələyə aid diqqətçəkən açıqlamalar verdi:
“İki variantımız var. Biri superkubok matçına çıxmamaq. Digəri isə U-19 komandası ilə çıxmaq. Camiənin öndə gələn isimləri ilə keçirdiyim görüşlərdə hamısı mənə “ciddi bir dəyişiklik ediləcəksə, buna superkubok ilə başlamaq lazımdı” dedilər. Mən də bu fikirlə tam razıyam. Başqalarına lazım olanda oyun tez təxirə salınır. Amma bizə lazım olanda “rəqibiniz qəbul etmədi” deyərək tələbimiz geri çevrildi. Fanatlarımıza 2 aprel axşamına qədər Şanlıurfa ilə bağlı planlar qurmamağı məsləhət görmüşdüm. İndi aprelin 2-dəyik və yenə eyni şeyi deyirəm. Lütfən plan qurmayın. Superkubok oyunu üçün heç bir rezervasiya etdirməyin”.
Bu sözlərdən də belə başa düşmək olar ki, “Fənərbaxça”nın oyuna çıxmamaq planı yetərincə ciddidi. İstanbul nəhəngi oyuna çıxmayacağı təqdirdə həm federasiya tərəfindən çəkilən bütün xərcləri, həm də veriləcək para cəzalarını ödəməlidi. Bundan başqa, komanda növbəti mövsüm ölkə kubokuna buraxılmayacaq. Eləcə də bu mövsüm çempion olsa belə, növbəti superkubokda iştirakına icazə verilməyəcək. Amma ümumi götürəndə bunların heç biri qorxulu cəzalar deyil. Maraqlıdı ki, “Fənərbaxça” lap oyuna çıxmayacağını əvvəlcədən açıqlasa belə, “Qalatasaray” mütləq üzərinə düşəni etməlidi. Yəni komanda aprelin 7-də Şanlıurfada meydana çıxmalıdı. Əks təqdirdə “sarı-qırmızılar”a da cəza veriləcək. Təsadüfi deyil ki, “Cim-Bom”un baş məşqçisi Okan Buruk “Hatayspor”la matçın ardından “biz tələb olunan saatda, tələb olunan yerdə olacağıq” ifadəsini işlədib.
