"Skandinaviyalılar həmişə güc futboluna üstünlük verir. Lakin dünən "Qarabağ" "Molde"yə öz oyununu oynamağa imkan vermədi. Ümumiyyətlə, "Tofiq Bəhramov"da "Qarabağ" gücündən asılı olmayaraq, istənilən komandaya qarşı yaxşı oyun nümayiş etdirir. "Molde" ilə də komandamız ən yaxşı oyunlarından birini keçirdi. Əminəm ki, növbəti görüşlərdə də "Qarabağ" layiqincə oyun göstərib, qrupdan çıxmağı bacaracaq. Fikrimcə, oyunun ədalətli hesabı 1:0 yox, 3:0 idi. Təəssüf ki, əlimizə düşən imkanlardan maksimum yararlana bilmədik. Həmişə demişəm ki, "Qarabağ"ın özünəməxsus, dəyişməyən oyun üslubu var. Rəqibdən asılı olmayaraq, komanda öz oyununu diqtə etməyi bacarır. Dünən də 90 dəqiqə ərzində üstün olan "Qarabağ" əsl komanda oyunu göstərdi. Bunu oyundan sonrakı açıqlamalarında "Molde"nin baş məşqçisi də vurğuladı. Təbii ki, qrupun favoriti "Bayer"di. Düşünürəm ki, "Qarabağ" bu qrupu 2-ci yerdə başa vuraraq mərhələni keçəcək".