“Azərbaycan millisində oynamaq istəyirdim” - Yusuf Mehtiyevin pasport problemini həll etmək mümkün olmayıb
Tiflis “Dinamo”sunun əvəzedici heyətində yer alan, əslən azərbaycanlı olan Yusuf Mehtiyev bəzi sənəd problemləri üzündən Azərbaycan pasportu ala bilməşdi.
Bu üzdən gənc oyunçu Azərbaycan millisinin formasını geyməyəcək. Bu ayın əvvəlində Gürcüstanın U-19 yığmasına dəvət olunan hücumçu indi də U-18-ə kömək edir. O, Laşa Pirtsxalaişvilinin çalışdırdığı komandanın heyətində Portuqaliyaya yollanıb. Bəs Mehtiyevin Azərbaycan yığmasının formasını geyməsi niyə alınmadı? Bu suala cavab tapmaq üçün Yusufla əlaqə saxladıq:
“Sənədləşmə işləri deyəndə ki, pasport məsələsiylə bağlı problem var idi. Onda da AFFA mənə Azərbaycan pasportu vermədi. Azərbaycan millisində oynamaq istəyirdim. Məni milliyə ilk dəfə Aqil Nəbiyev təklif etmişdi. Ancaq bəzi problemlərə görə baş tutmadı”.
Yusuf AFFA-nın adını çəksə də, bizdə olan bilgiyə görə, Azərbaycan əsilli futbolçulara, idmançılara pasport verilməsi üzərində artıq bu qurum yox, Gənclər və İdman Nazirliyi (AGİN) çalışır. AGİN rəhbərliyi isə belə hesab edir ki, aşağı yaş qrupları üçün futbolçular məhz Azərbaycanda yetişməlidi, kənardan kimisə gətirməyə ehtiyac yoxdu. Bir sözlə, nazirlik bu məsələdə mövqeyini sərtləşdirib. Daha milli pasport əvvəllər olduğu kimi ucdantutma hər kəsə verilməyəcək. Yusufa isə artıq Gürcüstan publikasını oyunu ilə sevindirmək qalır.
KAMAL SƏFƏR
Digər xəbərlər
