“İmişli"nin çempionluq arzusu və alınmayan cəhdi - Əsgər Abdullayev aydınlıq gətirdi
Futbol üzrə ölkə çempionatının 1-ci liqasında gərgin mübarizə gedir.
Hazırda bu turnirdə də fasilədi, 19-cu turun oyunları martın 28-29-da keçiriləcək.
Turnir cədvəlinin ilk "dördlüy"ündə ciddi rəqabət hökm sürür. Çempionluq uğrunda mübarizə aparan komandalardan biri də "İmişli"di. Bölgə təmsilçisi mövsümün birincisi olmaq istəyirsə, son 9 turda maksimum nəticə əldə etməlidi. Bəs buna nə dərəcədə nail olmaq mümkündü?
Bu sualla "İmişli"nin baş məşqçisi Əsgər Abdullayevə müraciət etdik. Onun "Football-plus.az"a söylədikləri:
"1-ci liqada bir çox məqam fərqlidi. Qeyd etdiyiniz kimi, yuxarı pillələrdə xal fərqi çox deyil. Buna görə növbəti 9 oyunun hər birini sonuncu şans kimi dəyərləndirib meydana çıxacağıq. Məqsədə çatmaq istəyiriksə, bütün matçlarda final imiş kimi çıxış etməliyik. Təbii ki, bunun üçün güclü psixoloji və fiziki hazırlıq lazımdı. Martın 18-də bir araya gəlmişik ki, məşq edək. İndiyə qədər hər şey yaxşı gedir. Zədəlimiz yoxdu. Öz aramızda oyunlar keçiririk. "Kür-Araz"la yoldaşlıq görüşü keçirmək istəyirdik. Lakin martın 24-də onların oyunu olduğundan (2-ci liqanın 18-ci turunda "Şahdağ Qusar"a qarşı - red.) alınmadı. Məqsədimiz bəllidi. Çempion olmaq istəyirik. Vəziyyət elədi ki, 1-ci liqada zəif rəqib yoxdu. Kim daha çox çalışırsa, o da qalib gəlir".
Əsgər bəy baş məşqçi vəzifəsindən ayrılacağıyla bağlı yayılan iddialara da aydınlıq gətirdi:
"Hərdən belə xəbərlər qarşıma çıxır. Bu haqda ilk dəfə mətbuatdan oxumuşam. Düzgün məlumat deyil. Mən işimə davam edirəm. Ortada məqsəd var və çalışıram ki, işimi görüm".
Qeyd edək ki, "İmişli" 35 xalla turnir cədvəlinin 3-cü pilləsində qərarlaşıb. Lider "Qaradağ Lökbatan"ın isə 36 xalı var.
KƏNAN BAHADIR
Digər xəbərlər
