“Feyenoord”da gələcək vəd edən futbolçudan əsl ulduza çevrilən və ötən yay çoxsaylı təkliflər arasından “Benfika”ya üstünlük verən Orkun Kökçünün yeni klubunda işləri qaydasında getmir.

“Benfika”ya gəldiyim gündən bəri baş məşqçi Rocer Şmidt də daxil olmaqla klubda mənə özümü özəl hiss etdirən bir şəxs olmadı. Xaraktercə masaya yumruğunu vuran və ya tələblər irəli sürən insan deyiləm. Amma Şmidtin mənə verdiyi rolla çox asanlıqla barışdım. Şmidt məni daha çox müdafiəyə yaxın oynadır. Rəqibin oyununu pozmaq baxımından mənə hər cür tapşırıqlar verir. Amma mən fərqli özəllikləri olan futbolçuyam. Daha çox irəlini düşünən, irəliyə verdiyim ötürmələrlə tanınan oyunçuyam. Statistikam da bunu təsdiqləyir. Hücuma yaxın mövqedə oynasam, bu kluba daha çox şey verə bilərəm. Məni üzən də məhz budu. Yayda müqaviləyə imza atandan dərhal sonra Türkiyə yığmasının düşərgəsinə yollanmalı oldum. Stadionda xüsusi şəkildə fanatlara təqdim olunmadım. Hər şey çox sürətli şəkildə baş verdi. Bu mövzu haqda heç düşünmədim. Çünki xaraktercə təvazökar insanam. Bir neçə dəfə vacib oyunlarda ehtiyatda qaldım. Bu da məni həm qəzəbləndirdi, həm də üzdü. Halbuki həmin məqamlarda bilirdim ki, bu komandaya çox şey verə bilərəm. “Feyenoord”da həmişə hücumameyilli oynamışam. “Benfika”da da belə olacağını düşünürdüm. Çünki danışıqlar prosesində də klub rəsmiləri məndən məhz belə yararlanmaq istədiklərini demişdilər. Mən də bunun məntiqli olacağını və burda sevdiyim mövqedə oynayaraq daha da inkişaf edəcəyimi düşünmüşdüm. Həm də Şmidt PSV-ni çalışdırarkən Niderlandda məni dəfələrlə izləmişdi. Onun komandasına qarşı çox yaxşı oyun sərgiləmişdim. Ona görə də mənim özəlliklərimi və bundan necə yararlanmaq lazım olduğunu bildiyini düşünürdüm”.