Deyan Kulusevski İsveçdə doğulsa da, peşəkar futbolda ilk addımlarını İtaliyada atıb.

"Football-plus.az" xəbər verir ki, 2019/20 mövsümündə əvvəlcə yetirməsi olduğu “Atalanta”nın, sonra “Parma”nın formasını geyib. 2020-ci ildə “Yuventus” onun transfer hüququna sahib olsa da, vingeri parmalılara icarəyə vermişdi. İtaliya nəhəngində keçirdiyi 2020/21 mövsümündə heç də pis təsir bağışlamayan Deyan növbəti mövsümün gedişində İngiltərəyə yollanmalı oldu. İndiyədək bu ölkədə çıxış edən 23 yaşlı futbolçu “The Players Tribune” portalına yazdığı məktubda “Yuventus”dakı qısamüddətli karyerası ilə bağlı bəzi məqamları xatırladıb.

“Yuventus”dakı çətinlikləri...
“Yuventus”da keçirdiyim 2021/22 mövsümünün ilk yarısında, demək olar ki, oynamırdım. Belə vəziyyətdə istənilən oyunçu özünü dəhşət içində hiss edərdi. Ona görə ki, bütün həyatını oyuna həsr edən futbolçu məşqlərdə can qoymasına baxmayaraq, ehtiyat oyunçular skamyasında oturub öz mövqeyində oynayan, amma vinger olmayan həmkarının çıxışına tamaşa etməyə məcbur idi. Düzünü desəm, özümü yöndəmsiz, hətta heç nəyə yaramayan oyunçu kimi hiss edirdim. Artıq bəziləri mənim “Yuventus”a faydalı ola bilmədiyimi iddia etməyə başlamışdılar. Mənim həddən artıq ləng olduğumu deyirdilər. Əlbəttə, bu fikirlər mənə toxunurdu, özü də 100 faiz pis təsir edirdi. Bu normaldı, insan belə vəziyyətdən təsirlənməyə bilməzdi.

...komandanı tərk etmək istəyi...
Artıq getməli olduğumu bilirdim. Bir gün agentimdən mənə yeni klub tapmasını xahiş etdim. 2022-ci ilin yanvarı idi. Qış “transfer pəncərəsi”nin bağlanmasına bir neçə gün qalmışdı. Demək olar ki, hansısa kluba keçməyim üçün lazımi qədər vaxtımız da yox idi. Amma çox keçmədən menecerim mənə “Tottenhem”in xidmətimdə maraqlı olduğunu bildirdi. Ona cavabımda Londona növbəti reysin nə vaxta təyin olunduğunu soruşdum...

...“Yuventus”da qazandığı faydalı təcrübə...
Yaxşı bilirəm ki, çoxları mənim “Yuventus”da uğursuz çıxış etdiyimi düşünür. Bu fikir mənə qəribə görünür. Ona görə ki, komanda ilə iki titul qazanmışam, hər iki finalda oynamışam, onlardan birində sabiq komandam “Atalanta”nın qapısına yol tapmış və oyundaşıma məhsuldar ötürmə etmişəm. Amma “Yuventus”da olduğum son 6 ay mənim üçün həqiqətən də, ağır keçib. “Tottenhem”ə keçəndən sonra çətin vəziyyətdən necə çıxacağımı bilmirdim. Amma istənilən halda “Yuventus”da faydalı təcrübə qazandığımı düşünürəm.

...və Ronaldo ilə münasibəti haqda
O, məşqdən sonra daim telefonla danışırdı. Amma komandada hər kəs belə edirdi. Əslində isə Ronaldonun məşqdə səylə çalışdığını, hamıya və hər şeyi sübut etmək istədiyini görürdüm. Halbuki artıq nəyisə sübut etməsinə ehtiyacı yox idi. Sözün düzünü deyəcəm, o ana qədər heç vaxt komanda yoldaşlarımdan belə xahiş etməmişdim. Ancaq bir gün Kriştianodan anama hədiyyə edəcəyim formasının üzərinə imza atmasını istəməli oldum. Onu da deyim ki, bundan 5 il əvvəl İtaliyadan İsveçə qayıtmaq haqda ciddi düşünürdüm. Doğulduğum ölkədə normal iş tapmaq istəyirdim. Amma iş elə gətirdi ki, bütün dövrlərin ən yaxşı futbolçularından biri ilə eyni komandada oynamaq şansı qazandım...