“MLS-də çempionluq uğrunda mübarizə apardığımızı dərk edirik”
Ötən ili uğursuz başa vuran “İnter Mayami” yeni mövsümün əvvəlində azarkeşlərini sevindirir.
"Football-plus.az" xəbər verir ki, Xerardo Martinonun komandası MLS-in 2-ci turunda “Orlando Siti”nin qapısından 5 cavabsız top keçirdi. Mayamililər hazırda Şərq konfransında 3 oyuna 7 xalla liderdilər.
Amma onların bir oyun artıq keçirdiyini qeyd etməliyik: “İnter Mayami” mövsümün ilk matçında - 18-ci turun irəli çəkilən ev oyununda “Real Solt Leyk”ə 2:0 hesabı ilə qalib gəldikdən sonra səfərdə “Los Anceles Qalaksi” ilə heç-heçə (1:1) oynayıb. Hesabat turunun matçının hakimi ilə bağlı bu qeydi etmək zəruridi. Əslində oyunu Gilyerme Seretta idarə etməli idi. Lakin onun təyinatı oyuna bir gün qalmış ləğv edilib. Buna sosial şəbəkələrdə referinin “İnter Mayami”nin formasında olan şəklinin görünməsi səbəb olub. Peşəkar Hakimlər Təşkilatı bu halın sonradan qalmaqala səbəb ola biləcəyindən çəkinərək hakimi dəyişib. Nəticədə matçı Serettaya ehtiyat hakim kimi yardım etməli olan Xayme Errera idarə edib.
Salvadordan olan referi “Çeyz Stedium”da 5 qol qeydə aldı. Hamısını “Orlando Siti” ilə matça fırtına kimi başlayan mayamililər vurdular. İlk iki qolun müəllifi Luis Suares oldu. ABŞ klubuna bu ilin əvvəlində qoşulan uruqvaylı hücumçu MLS-dəki 3-ü oyununda qol hesabını açdı. Yanvarın 24-də 37 yaşını tamamlayan Suares ilk hissədə hesabı 3:0-a çatdıran Robert Teylora assistentlik etdi. Fasilədən sonraya təsadüf edən son iki qolu isə Lionel Messi vurdu. Argentinalı hücumçuya son qolun məhsuldar ötürməsini “Barselona”da birgə oynadığı Suares verdi. Beləliklə, uruqvaylı 2 qol və 2 assist ilə matça damğa vurdu. Messi isə milli liqalarda 500-cü qolunu rəsmiləşdirdi! DÇ-2022-nin qalibi indiyədək İspaniya La Liqasında 474, Fransa Liqa 1-də 22, MLS-də isə 4 dəfə qapıya yol tapıb. 36 yaşlı Lionelin klub karyerasında 718, ümumilikdə isə 824 qol vurduğunu da bildirək.
O, oyundan sonrakı mətbuat konfransında möhtəşəm qələbə ilə bağlı bunları deyib:
“Matçı əvvəldən axıradək əla keçirdik. İntensiv oynamalı olduğumuzu bilirdik, “Orlando”ya qarşı başqa cür oynamaq olmaz. Oyun ərzində çox toqquşma baş verdi, gərgin anlar yaşandı, yeri gələndə müdafiəyə çəkilib əks-hücum şansı gözləməli olduq. Hesabı erkən açmaqda bəxtimiz gətirdi və bu, matçın sonrakı axarına təsir etdi. Hesabda üstünlüyə nail olandan sonra meydanda boş zonaların axtarışına çıxdıq, mübarizə bizim üçün bir qədər asanlaşdı və oyun gözlədiyimizdən fərqli alındı”.
Messi Suaresin çıxışı haqda da danışıb:
“Onun qol vurmasına çox sevindim. Hərçənd ilk iki oyunda qapıya yol tapa bilməməsinə görə qətiyyən narahatlıq keçirməmişdik. Luisin nəyə qadir olduğunu hamı yaxşı bilir. O, səviyyəsini bir daha göstərdi. Ümidlər çox da böyük olmayanda Luis qol vurub ötürmə verməklə oyunu sənin üçün qalib başa vurur”.
Lionel komandanın əsas hədəfinin MLS-də qələbə olduğunu deyib:
“İndi işlərimiz yaxşı gedir, biz futboldan həzz alır və inkişaf edirik. Bu gün qalib gəlmək vacib idi. Sözün düzünü deyəcəm: qələbə fonunda inkişafımızı davam etdirmək bizi güclü edir. Üzərimizdəki təzyiqə baxmayaraq, güclü komanda qurduğumuzu və MLS-də çempionluq uğrunda mübarizə apardığımızı dərk edirik. Bu yolun uzun olduğunu bilirik, yola isə yenicə başlamışıq. Amma reallıq belədi: mübarizəyə hazır komandamız var və uzun marafonda iştirak edəcəyik. Mövsümə yaxşı start vermək, ilk bir neçə oyunda kifayət qədər xal yığmaq vacibdi. Ona görə ki, bir müddət sonra çempionatda fasilə yaranacaq və digər turnirlər start götürəcək. Həqiqətən də gərgin mübarizələrdən sonra kiçik fasiləyə çıxmaq yaxşı haldı. Amerika Kuboku, Liqa Kuboku və digər turnirlərə qədər mümkün qədər çox xal toplamaq vacibdi”.
Yeri gəlmişkən, Don Qarber maraqlı fikir səsləndirib. MLS-in komissioneri Messinin indi ABŞ çempionatında çıxış etməsində Devid Bekhemin vaxtilə MLS-də oynamasının təsirini vurğulayıb. Xatırladaq ki, hazırda “İnter Mayami”nin həmsahibi olan İngiltərə yığmasının sabiq yarımmüdafiəçisi 2007-ci ildə sıralarına qoşulduğu “Los Anceles Qalaksi” ilə iki dəfə çempionluq sevinci yaşayıb:
“Bekhem vaxtilə bizim liqaya gəlməsəydi, indi Messi də burda olmazdı. Bekhemin gəlişi MLS-in dünyanın ən məşhur futbolçularının seçdiyi liqaya çevrilə biləcəyi ilə bağlı ilk real proqnoz idi. Devidin təcrübəsi özü, “Qalaksi” və liqamız üçün, sadəcə, fantastik idi. Və o, müəyyən müddətdən sonra MLS-də klub sahibi oldu. Devid məlum qərarı verməsəydi, liqanın indi hansı vəziyyətdə olacağını təsəvvür edə bilmirəm. Bir detalı da vurğulayım. Yalnız böyük ada malik oyunçunu cəlb etmək, onu meydana buraxmaq və hər şeyin ideal olacağını gözləmək olmaz. Həmin futbolçu liqaya inanmalıdı, siz isə onun ailəsi üçün əla şərait təmin etməli və həm də onun kluba uyğun gəldiyinə tam əmin olmalısız. Bir çox hallarda belə transferlər lazımi effekt verib, bəzən isə ümidlər doğrulmayıb. Odu ki, məsələnin yalnız Devidin deyil, həm də xaricdən bura gələn bütün məşhur oyunçuların təcrübəsi ilə bağlı olduğunu düşünürəm. Dediyim kimi, bəziləri MLS-də komandalarına faydalı ola bilməyiblər. Amma bu normaldı”.
Digər xəbərlər
