Ramil Şeydayev Taylanddan “Kocaelispor”a yollananda onu qınayanlar çox oldu.

"Football-plus.az" xəbər verir ki, böyük əksəriyyət gənc futbolçunun pul dalınca qaçdığını iddia edirdi. Amma “Kocaelispor”un Türkiyənən ən köklü klublarından olduğunu nəzərə alan bəziləri Ramilin tezliklə elitaya vəsiqə qazanacağı düşüncəsi ilə bu keçidə sakit yanaşdı.

Bəs Şeydayev Türkiyədə ümidləri doğruldurmu? Təəssüf ki, bu suala müsbət cavab vermək mümkün deyil.

1-ci liqanın 25-ci turunda “Ərzurumspor”un qonağı olan “Kocaelispor” meydandan bərabərliklə ayrıldı – 0:0. Ramil 78-ci dəqiqədə Barış Alıcının əvəzinə mübarizəyə qoşuldu. Soydaşımız 80-ci dəqiqədə sol cinahda müdafiənin boşluqundan yararlanaraq Atillaya mükəmməl bir ara ötürməsi verdi, lakin qapıcı ilə üz-üzə qalan komanda yoldaşı topu yandan vurdu. Ramil əsasın Amaral ilə Atillaya ara ötürmələri verir, lakin komanda yoldaşları fürsətdən yararlana bilmirdi.

Soydaşımız son dəqiqələrdə bəzi səhvlərə yol verdi. Ötürmələri düzgün alınmır, rəqib təzyiq edəndə topu itirirdi. 90-cı dəqiqədə sol cinahda rəqib oyunçunu keçməyə cəhd etmək əvəzinə Amarala ötürmə versəydi, hesab açıla bilərdi. Ümumiyyətlə, Şeydayev həmişəki kimi meydanda sərtdi, meydanda olduğu müddətdə hər cür fədakarlıq etdi. 90+5-ci dəqiqədə, son saniyələrdə onun qeyri-dəqiq ötürməsi hesabına rəqib sürətli əks-hücuma çıxdı. Yaxşı ki “Ərzurumspor”un oyunçusu təkbətəki boşa verdi. Yoxsa Ramil növbəti qınaq dalğasına məruz qalacaqdı. Onduz da hələ də Türkiyədə qol hesabını aça bilmədiyinə görə yetərincə tənqid olunur.

ELMİN İSKƏNDƏRLİ