1-ci liqada 2023/24 “futbol ili”nə start veriləndə çempionatın favoriti “Şamaxı” idi.

Çoxu “ovcunu iyləyibmiş” kimi iddia edirdi ki, mövsümün sonunda premyer-liqaya yüksələcək komanda “şirlər” olacaq. Əlbəttə, bu hələ də mümkündü. Amma və lakin...

Turlar geridə qaldıqca bəlli oldu ki, 1-ci liqada çempionluq vəzifəsinin öhdəsindən gəlmək göründüyü qədər asan deyil. Keçmişi vərəqləməyə ehtiyac duymadığımızdan əsas mətləbə keçək. Belə ki, premyer-liqadan fərqli bu turnirdə çempionluğa can atan və hədəfdən heç də uzaqda olmayan bir yox, beş komanda var: “Qaradağ Lökbatan”, “İmişli”, “Şamaxı”, MOİK və “Karvan”. Maraqlıdı ki, komandaların xal ehtiyatı bir-birindən o qədər də fərqlənmir. Belə gərgin mübarizə fonunda “şirlər”in 16-cı turda “Zaqatala”nı məğlub edə bilməməsi (1:1) birmənalı qarşılanmadı. Çünki oyunun aşkar favoriti “Şamaxı” idi. Əlbəttə, bu nəticə komandaya baha başa gələ bilərdi ki, belə də oldu. Qısası, meydan sahibləri xal itirdiyindən zirvəni “Qaradağ Lökbatan”la “İmişli”yə təhvil verməli oldu.

Belədə bu və başqa mövzular ətrafında “şirlər”in baş məşqçisi Ramiz Məmmədovla söhbətləşməyə ehtiyac duyduq. O, son heç-heçənin səbəbləri haqda danışmaqla yanaşı, bir çox məqama aydınlıq gətirdi.

– “Zaqatala” cari mövsümdə ikinci dəfə “Şamaxı”dan xal qopardı. Məhz bu komandayla oyunlar sanki tilsimə düşüb...

– Rəqib baxımından ayrı-seçkilik etmək istəmirəm. 1-ci liqada yetərincə ciddi mübarizə şəraiti mövcuddu. Hansı pillədə qərarlaşmasından asılı olmayaraq bütün komandalar meydana qələbə üçün çıxır. Hazırda zəif-güclü məsələsi aktual deyil. Sonuncu sırada olan “Araz Saatlı”nın da istəkli və cəsarətli heyəti var. Yəni “Zaqatala”nı məğlub edə bilməmək sürpriz sayılmamalıdı. Səbəbə gəlincə, bəxtsizlikdən başqa ağlıma nəsə gəlmir. Futbolçularım son ana qədər əlindən gələni etdi. Gah dirək mane oldu, gah da qapıya zərbələrdə dəqiqlik çatmadı.

– Ümumi nəticələrə görə komandadan narazılığınız varmı?

– Bundan söhbət gedə bilməz. Oyunçularımın hər biri mənim üçün dəyərlidi və hamısından razıyam. Bilirəm ki, qələbə qazanmaq üçün var gücləri ilə çalışırlar. Bəzən alınır, bəzən də yox.

– Cari mövsümdə səkkiz qələbə qazanmısız. Bu sayı artırmaq vacibdi. Çünki ilk “ beşlik”də ciddi rəqiblər var. Planınız nədi?

– Təbii ki, daha çox çalışmaq! Biz nə məğlubiyyətin, nə də heç-heçənin təsiri altına düşməməliyik. Komandam da məhz belə edir. Oyun bitəndən sonra hər şeyi unudub növbəti görüşə hazırlaşırıq. Şükür Allaha, bu gün hər şey qaydasındadı. Ruhdan düşmək olmaz. Hədəf dəyişməyib. İnşallah, çempion olmaq istəyirik.

– Premyer-liqada tez-tez baş məşqçilərin hakimliyin səviyyəsindən narazı olduğunu eşidirik. Bəs 1-ci liqada ədaləti təmsil edənlərin işi sizi qane edirmi?

– Bu barədə geniş danışsam, gərək bir çox məsələyə toxunum. Sayılmayan qolumuz da olub, əslində hava şəraitinə görə təxirə salınmalı matçda məcburiyyətdən meydana çıxmağımız da... Ümumiyyətlə, uzun illər ərzində baş məşqçi işləmişəm və belə hallarla çox qarşılaşmışam. Bilindiyi kimi, oyunlar qeydə alınır, yayınlanır. Bununla yanaşı, biz də çəkiliş edirik. Lazım olanda, yəni mübahisəli epizodlar qeydə alınanda videoları məsul qurumlara göndəririk. Lakin nə dəyişir? Ya da belə deyək: indiyə qədər nə vaxtsa sonradan dəyişiklik olubmu? Təbii ki, yox! Əlimizdən başqa heç nə gəlmir. O da var ki, tarixdə nəticə qalır və hakim ədalətsizliyinə və ya uduzmağımıza səbəb olan hansısa səbəblərə burda yer yoxdu. Belə detalları diqqətdə saxlasaq, sadəcə, ruhdan düşə bilərik ya da gərək təslim olaq... İşimizi görürük və istəyirik ki, mövsümün sonunda çempion olaq. Problem hər yerdə ola bilər. Motivasiyamızı itirməməliyik.

– Sizə qarşı hansısa hakim qərəzi hiss etmisizmi?

– Bu barədə dəqiq danışmaq çətindi. Hakimlərin əksəriyyəti gəncdi. Ola bilər ki, təcrübəsizlikdən və ya bilməyərəkdən hansısa səhvlərə yol versinlər. Kiminsə haqqına girmək istəmirəm. Ən yaxşısı önümüzə baxmaq, gələcəyə köklənməkdi. Ümid edirəm ki, hakimlər zamanla daha az səhvə yol verəcək. Hər birinə uğur arzulayıram.

– Futbol üzrə çempionatlarda azarkeş sayı da vacib məsələdi. Di gəl ki, ölkəmizdə stadiona gələn, sevdiyi komandanı tribunadan dəstəkləyən tərəfdarların sayı çox azdı. Hətta premyer-liqada belə! Futbola maraq yoxdu desək, yanıla bilərik. Çünki oyunları televiziya və internet kanallarından izləyənlərin sayı minlərlədi. Vəziyyət 1-ci liqada daha kritikdi. Məhz elə “Şamaxı” azarkeşləri stadiona niyə gəlmir?

– Bu hal futbolumuzun yaralı yeridi və qısa zamanda sağalacağını gözləmirəm. Duz vurğulayırsız. Futbola maraq var, amma tribunalar boşdu. Məsələn, 1-ci liqanın oyunları həftəiçi, bu da azmış kimi, günorta saatlarında keçirilir. Günün ən sıx vaxtı da sırf bu saatlardı. Dərs, iş, yol və sair... Əlbəttə, istəyərəm ki, komandamızı daha çox azarkeş tribunadan dəstəkləsin. Təəssüf ki, say çox azdı. Amma bu bəlaya çarə qılmaq tam bizdən asılı deyil. İşimiz nəticə vermək, uğurlu komanda yaratmaqdı ki, bunun üçün çalışırıq.

KƏNAN BAHADIR