Fevralın 8-də futbol üzrə ölkə çempionatının 1-ci liqasında qış fasiləsi başa çatır. Beləcə mövsümün ikinci yarısına start verilir. Klublar indiyə qədər hərəyə bir neçə yoldaşlıq oyununda gücünü sınayıb, heyətdə müəyyən dəyişikliklər edib.

İlin ilk matçında MOİK "Karvan"ı sınağa çəkəcək. Ordu klubu evdə yevlaxlıları məğlub etməyə çalışacaq. Qəzənfər Abbasovun komandasında ciddi dəyişiklik qeydə alınmayıb. Əlbəttə, bunu həm də Yevlax təmsilçisinə şamil etmək mümkündü. Ev sahibləri favorit görünsə də, qonaqların qələbəsi də sürpriz sayılmayacaq. Hər halda, MOİK ötən ilin son turlarında qələbə qazanmaqda çətinlik çəkirdi. Kənan Kərimovun yerirmələri isə ortabablar sırasındadı. Gah güclü rəqiblərə qalib gəlir, gah da zəiflərə uduzurlar.

Turun növbəti oyununda "Difai Ağsu" "Araz Saatlı"nı qəbul edəcək. Autsayderlərin duelində qalibi təxmin etmək çətindi. Çünki hər ikisi nəticə baxımından yeni səhifə açmağa çalışacaq. Ümumiyyətlə, "futbol ili"nin son ayları nə Elgiz Kərəmlinin, nə də Rüfət Quliyevin kollektivi üçün rahat keçəcək. Axırıncı pillədə qərarlaşanın 2-ci liqaya yuvarlanacağını nəzərə alsaq, bu komandaların hər matça "olum, ya ölüm” prinsipiylə çıxacağına şübhə yoxdu.

Üçüncü matçda "Mingəçevir" "Şamaxı"dan xal qoparmağa çalışacaq. İddialı rəqibi qəbul edəcək "nur şəhəri"nin təmsilçisi azarkeşlərini çox sevindirə bilməyibsə, ən yaxın izləyicisi "Difai Ağsu"nu 10 qabaqlaya bilib. Bu fərqi artırmaq və daha yüksək pillələrə yiyələnmək uğrunda mübarizə aparmağa dəyər. Lakin bunu "şirlər"lə oyunda bacarmaq asan olmayacaq. "Şamaxı"nın məqsədi çempion olmaqdı.

"İrəvan" - "İmişli" oyunu da diqqət mərkəzində olacaq. Çünki tərəflər hərəyə 20 xalla qonşu sıralarda yer alıb. Tura "Zaqatala" - "Qaradağ Lökbatan" görüşüylə yekun vurulacaq. Meydan sahibləri mövsümə uğursuz başlamışdısa, sonradan nəticələri yaxşılaşdırdı. İndi isə ev matçında azarkeş dəstəyindən yararlanaraq qonaqları büdrətməyə çalışacaqlar. Amma rəqib 1-ci liqanın şəriksiz lideri və oyunun aşkar favoriti olduğundan, bunu bacarıb-bacarmayacaqları böyük sualdı.

8 fevral
MOİK - Karvan 0:1
İzzət Müştaqov, 86.
Binə, qəsəbə stadionu. Saat 14.00.

Difai Ağsu - Araz Saatlı 4:0
Seymur Rəhimov, 5. Rəhman Quliyev, 17. Tahir Zeynalov, 73. Əbil Əbilov, 79.
Şamaxı, şəhər stadionu. Saat 14.30.

Mingəçevir - Şamaxı 0:1
Emin Zamanov, 63-p.
Mingəçevir, Yaşar Məmmədzadə adına şəhər stadionu. Saat 15.00.

9 fevral
İrəvan - İmişli 1:2
Fəhmin Muradbəyli, 69 - Xəzər Mahmudov, 31. Xəqani Sadıxov, 87.
ASK Arena. Saat 13.00.

Zaqatala - Qaradağ Lökbatan 1:1
Uoren Lloyd, 54 - Mikel Badejo, 19.
Zaqatala, OİK Stadionu. 14.00.
Xal durumu: Qaradağ Lökbatan - 28, Şamaxı - 25, MOİK - 22, Karvan - 21, İmişli - 23, İrəvan - 20, Zaqatala - 17, Mingəçevir - 14, Difai Ağsu - 7, Araz Saatlı - 3.
Bombardir: Elşad Tağıyev (Şamaxı) - 11.

KƏNAN BAHADIR