Çərşənbə günü İngiltərə kubokunun 1/8 final mərhələsinin son dörd oyunu keçirildi.

"Football-plus.az" xəbər verir ki, ölkə futbolunun nəhənglərindən “Liverpul”, “Mançester Yunayted” və “Çelsi”, eləcə də cari mövsümdə avrokuboklara vəsiqə uğrunda mübarizə aparan “Vulverhempton” növbəti mərhələyə adladı.

“Liverpul”un kadr problemləri getdikcə dərinləşir, ancaq Kloppun komandası tempi aşağı salmaq niyyətində deyil. “Qırmızılar” Liqa kubokunu qazanandan cəmi üç gün sonra “Sauthempton”u darmadağın etdi. “Liverpul”un baş məşqçisinin gənclərə güvənməkdən başqa yolu yox idi. Və klubun 18 yaşlı yetirmələri onun inamını artıqlamasıyla doğrultdu. Hərçənd ilk yarı tam başqa ssenari üzrə cərəyan edə bilərdi. “Sauthempton” ilk yarıda yetərincə cəsur təsir bağışladı. Çempionşipin liderlərindən biri hansısa məqamda rəqibə ciddi təzyiq göstərdi, ancaq imkanları qola çevirə bilmədi. Fasiləyə yaxın təşəbbüsü ələ keçirən “qırmızılar” isə 44-cü dəqiqədə hesabı açdı. Klarkın ötürməsindən sonra mersisaydlıların debütantı Kumas fərqləndi. 2-ci hissənin əvvəlində “qırmızılar” yenidən “müqəddəslər”in təzyiqi ilə üzləşdi, artdından Qakpo çox əlverişli imkandan yararlana bilmədi. Belə düşünmək olardı ki, meydan sahiblərini əsəbi sonluq gözləyir. Ancaq “Liverpul” nəinki fərqi qorudu, hətta onu artırdı da. Sonradan meydana çıxan Dannsın 73-cü dəqiqədəki qolu həlledici oldu. Üstəlik 18 yaşlı hücumçu oyunun sonunda dublunu da rəsmiləşdirdi. Gənclərin köməyi ilə “Sauthempton”u darmadağın edən “Liverpul” ölkə kubokundan da gözünü çəkməyib. “Müqəddəslər” isə artıq diqqətini premyer-liqaya vəsiqə uğrunda mübarizəyə yönəltməlidi.

“Nottingem Forest”lə oyun “Mançester Yunayted” üçün çox əsəbi alındı. Oyunun taleyi son dəqiqələrdə, artıq hər kəsin əlavə vaxtı gözlədiyi vaxt həll olundu. MY oyunun əksər bölümündə topa nəzarət etsə də, real qol vəziyyətləri yaratmaqda çətinlik çəkirdi. “Meşəçilər” isə təhlükəli əks-hücumlar qururdular. Ancaq hər iki tərəf perspektivli hücumların bitiricilik mərhələsində dəqiqlik və soyuqqanlılıq baxımından axsayırdı. Belə mənzərə həm 1-ci, həm də 2-ci hissədə müşahidə olundu. 2-ci hissədə futbolçuların hərəkətlərində gərginlik bir qədər də artdı, axı indi hər səhvin dəyəri daha böyük idi. Tələslənlik özünü göstərir, xüsusən də MY-nin oyunçuları hücumları daha ağıllı şəkildə bitirmək əvəzinə uzaqdan zərbələrə üstünlük verirdi. Əsas vaxt başa çatarkən təyin olunan cərimə zərbəsi həlledici oldu. Məhz həmin cərimə zərbəsi zamanı Kazemiro “qırmızı şeytanlar”ı irəli çıxardı. Meydan sahiblərinin məğlubiyyətdən qaçmaq üçün vaxtı yox idi.

Premyer-liqa ilə bağlı hədəflərindən uzaq düşən “Çelsi”, heç olmasa, mövsümü hansısa titulla bitirmək istəyir. “Zadəganlar” çempionşip təmsilçisi “Lids”in öhdəsindən çətinliklə gəldi. Qonaqlar 8-ci dəqiqədə gözlənilmədən hesabı açdı. “Çelsi” cəmi 7 dəqiqə sonra bu qolun əvəzini çıxdı. Hissənin sonunda Mudrik yenə də Maduekenin ötürməsi ilə meydan sahiblərini irəli çıxardı. Bununla belə, yorkşirlilər 2-ci hissədə intriqanı bərpa etməyi bacardı. Bu dəfə də Cozef fərqləndi. 90-cı dəqiqəyə qədər tabloda 2:2 hesabı yanırdı, ancaq 2-ci hissədə meydana çıxan Qallaher “Çelsi”nin qələbə topunu vura bildi. Qonaqların sensasiyalı qələbə qazanmaq imkanları var idi, onlar 2-ci hissədə rəqiblə müqayisədə topa daha çox nəzarət edirdi. Ancaq paytaxt təmsilçisi Liqa kubokunun finalında “Liverpul”dan aldığı acı məğlubiyyətə görə azarkeşləri önündəki günahını yuya bildi.
“Vulverhempton”la “Brayton” premyer-liqanın turnir cədvəlində bir-birinin yaxınlığında qərarlaşıb. Hətta “qağayılar” “canavarlar”dan iki pillə öndədi. Ancaq növbəti mərhələyə vəsiqəni “Vulverhempton” qazandı. Lemina 2-ci dəqiqədə hesabı açdı, qonaqlar nə qədər çalışsa da, məğlubiyyətdən qurtula bilmədi.

Artıq 1/4 final mərhələsinin püşkü də atılıb. Bu mərhələdə cütlər belə formalaşıb: Mançester Siti – Nyukasl, Çelsi – Lester, Koventri – Vulverhempton, Mançester Yunayted – Liverpul. Oyunlar martın 16-17-də keçiriləcək.

1/8 final
Liverpul - Sauthempton (D-2) 3:0
Kumas, 44. Danns, 73; 88.
Liverpul: Kelleher, Qomes, Kuansa, Van Diyk (Konate, 46), Simikas, Bredli, Klark, Makkonnell (Makallister, 63), Elliott (Nyoni, 78), Kumas (Danns, 62), Qakpo (Qordon, 90).
Nottingem Forest – Mançester Yunayted 0:1
Kazemiro, 89.
MY: Onana, Lindelöf, Dalot, Varan, Amrabat (Evans, 90+4), Kazemiro, Maktominey (Maynu, 90+5), Fernandeş, Antoni (Dyallo, 73), Qarnaço, Reşford.
Çelsi – Lids (D-2) 3:2
Cekson, 15. Mudrik, 37. Qallaher, 90 – Cozef, 8; 59.
Çelsi: Sançes, Gilkrist (Koluill, 74), Disasi, Çaloba, Hüsto (Çiluell, 61), Kaysedo, Fernandes, Madueke (Qallaher, 61), Mudrik (Tauryaynen, 90+4), Sterlinq (Palmer, 74), Cekson.
Vulverhempton – Brayton 1:0
Lemina, 2.
Vulverhempton: Sa, Doherti, Bueno, Kilmen, Qomeş (Semedu, 90+4), Ait-Nuri (Douson, 90+3), Lemina (Sarabiya, 56), Doyl, Qomes, Bellqard (Traore, 76), Hvan Hi Çhan (Netu, 56).
Bu mərhələnin ilk dörd oyunu fevralın 26-27-də keçirilib: Luton – Mançester Siti 2:6, Koventri (D-2) - Meydston (D-6) 5:0, Bornmut - Lester (D-2) 0:1, əlavə vaxtda, Blekbern (D-2) – Nyukasl 1:1, p. – 3:4.

Reaksiyalar
Yürgen Klopp, “Liverpul”un baş məşqçisi: