Türkiyə çempionatından növbəti istefa xəbəri var.

Belə ki, “Pendikspor” İvo Vieyra ilə yollarını ayırmaq qərarına gəlib. Tarixində ilk dəfə superliqada oynayan İstanbul təmsilçisi mövsümə Osman Özköylünün başçılığı altında başlamışdı. Amma oktyabrın ortalarında uğursuz nəticələrdən sonra qovulan bu məşqçini məhz Vieyra əvəzləmişdi.

Qışda diqqətçəkən transferlər həyata keçirən debütant bir ara dirçəlmiş və 21-25-ci turlarda 12 mümkün xaldan 10-nu toplamışdı. Həmin dönəmdə hətta “Beşiktaş” üzərində 4:0 hesablı tarixi qələbə qazanılmışdı. Amma son həftələrdə vəziyyət dəyişdi. Ardıcıl 3 məğlubiyyətdən sonra rəhbərlik Vieyra ilə vidalaşdı. Komanda 48 yaşlı bu mütəxəssisin başçılığı altında keçirdiyi 21 rəsmi oyundan 7 qələbə, 4 heç-heçə, 10 məğlubiyyətlə ayrılıb. Artıq yeni baş məşqçinin adı bəllidi. Mövsümün sonuna qədər bu vəzifəni İbrahim Üzülməz icra edəcək. Futbolçu kimi “Beşiktaş”ın əfsanələrindən sayılan Üzlməz 2015-ci ildən müstəqil məşqçi kimi çalışsa da, hələ ki bu sahədə ciddi uğur qazana bilməyib. İndiyə qədər “Elazığspor”, “Gənclərbirliyi”, “Qaziantepspor”, “Çaykur Rizəspor”, “Bursaspor” və “Ankaragücü”də işləyən 50 yaşlı mütəxəssis sonuncu dəfə ötən mövsümün gedişində “Eyupspor”u çalışdırmışdı.

Bu təyinatdan sonra Alpaslan Öztürkün gələcək taleyinin necə olacağı maraq doğurur. 2023-ün yayında “Qalatasaray”dan ayrılaraq “Pendikspor”a transfer olunan təcrübəli müdafiəçinin yolu ötən mövsüm icarə əsasında şərəfini qoruduğu “Eyupspor”da Üzülməz ilə kəsişmişdi. Həmin vaxt bu ikili arasında çox ciddi bir qalmaqal yaşanmışdı. Üzülməz “Eyupspor”dan ayrılandan sonra 30 yaşlı futbolçu haqda “məşqdə meydanın kənarına işəyən, gəncləri pis sözlərlə təhqir edən bir insandı” ifadələrini işlətmişdi. Alpaslan isə öz növbəsində Üzülməzi karyerasında gördüyü ən pis məşqçi və ən pis insan adlandırmışdı.