Bazar ertəsi və çərşənbə axşamı İngiltərə kubokunda 1/8 finalın ilk 4 oyunu keçirildi.

"Football-plus.az" xəbər verir ki, çempionşip təmsilçisi “Koventri” bura qədər irəliləməsi belə böyük uğur olan “Meydston”un qapısından 5 cavabsız top keçirdi. Premyer-liqa klubu “Bornmut” çempionşipin digər təmsilçisi “Lids”lə oyunun əlavə vaxtında “silahı yerə qoydu”.

“Blekbern” – “Nyukasl” oyunu azarkeşlərin stadionda rahat çatmasını təmin etmək üçün nəzərdə tutulan vaxtdan 15 dəqiqə gec başladı. Həmin azarkeşlər cəmi iki qol gördü. 71-ci dəqiqədə qonaqların forvardı Qordon hesabı açdı. Ancaq cəmi 8 dəqiqə sonra çempionşipin bombardiri Şmodiks bərabərlik qolunu vurdu. Əlavə vaxtda da qol vurulmadığından qalib penalti seriyasında müəyyənləşdi. Burda isə “sağsağanlar” daha dəqiq oldu.

“Luton” – “Mançester Siti” oyunundan sürpriz gözləyən yox idi. Hər kəs “şəhərlilər”in növbəti qələbəsini qazanacağını düşünürdü. Ancaq komandalar əsl tamaşa göstərdi. Daha dəqiqi, “Luton” “boks armudu”na bənzədi. Holann ilk 18 dəqiqədə iki qol vurdu. Norveçli ilə yanaşı, De Bruyne də şou göstərirdi. Təsəvvür edin ki, belçikalı bu oyunda 4 məhsuldar ötürmə verdi! Holann isə artıq fasiləyə qədər het-trik etdi. Düzdü, “Luton” ilk yarının sonunda və 2-ci hissənin əvvəlində özünə qəhrəman tapdı. İki qol vuran Klark zahirən intriqanı bərpa etdi. Ancaq meydan sahiblərinin müdafiədə biabırçı səhvləri davam edirdi. Holann daha iki qol vurdu. Oyunda son nöqtəni hiyləgər zərbə ilə Kovaçiç qoydu. “Luton”un qapısımı Krul bir çox çətin vəziyyətdə komandasının köməyinə çatsa da, bəzi qolları onun vicdanına yazmaq olar. Bir sözlə, Holann karyerasının ən parlaq oyunlarından birini keçirdi, “Siti” isə asanlıqla növbəti mərhələyə adladı.

1/8 final
Luton – Mançester Siti 2:6
Klark, 45; 52 – Holann, 4; 18; 40; 55; 58. Kovaçiç, 72.
MS: Orteqa, Uoker, Stounz (Bobb, 77), Akanci, Ake (Qomes, 77), Kovaçiç, Nunyeş, De Bruyne, B.Silva (Lüis, 77), Qriliş (Dokyu, 38), Holann (Alvares, 77).
Koventri (D-2) - Meydston (D-6) 5:0
Simms, 9; 14; 35. Tavares, 88; 90+2.
Bornmut - Lester (D-2) 0:1, əlavə vaxtda
Fatavu, 105.
Blekbern (D-2) – Nyukasl 1:1, p. – 3:4
Şmodiks, 79 – Qordon, 71.
Çelsi – Lids (D-2) 3:2
Cekson, 15. Mudrik, 37. Qallaher, 90 – Xosep, 8; 59.
Nottingem Forest – Mançester Yunayted 0:1
Kazemiro, 89.
Vulverhempton – Brayton 1:0
Lemina, 2.
Liverpul - Sauthempton (D-2) 3:0
Kumas, 44. Danns, 73; 88.

Reaksiyalar
Xosep Qvardiola, MS-nin baş məşqçisi: “Nə deyə bilərəm? Həqiqətən oyun çox yaxşı alındı. Holann yaxşı formadadı, onun De Bruyne ilə anlaşması ideal idi. İndi biz 1/4 finaldayıq. Kevinə Erlinq, Erlinqə də Kevin kimi oyunçu lazımdı. Ancaq bu qələbə bütün oyunçuların xidmətidi. Son iki oyunda 1:0 hesabıyla qalib gəlmişdik. “Çelsi”yə qarşı 2-ci hissədə yaxşı oynasaq da, qalib gələ bilməmişdik. İngiltərə kuboku yaxşı turnirdi. Yenidən “Uembli”də oynamağa can atırıq”.

Erlinq Holann, MS-nin hücumçusu: “Oyun üçün planımız var idi, hər kəs planı əla yerinə yetirdi. Hamı yaxşı oynadı. De Bruyne dahidi. Belə ötürmələr onda hamıdan yaxşı alınır. Onunla birgə oynamaq adama məmnunluq bəxş edir. Biz bir-birimizdən nə istədiyimizi bilirik. Kevin ağıllı oyunçudu, onunla birgə oynamaq xoşuma gəlir. Fiziki formam? Ən yaxşı formama dönürəm. Nəhayət, özümü yaxşı hiss edirəm. Möhtəşəm duyğudu. İrəlidə həlledici dönəm bizi gözləyir. Hər şeyə hazırıq”.

Fakt
Holann “Luton”la oyunda 5 qol vurdu. “Opta” xəbər verir ki, İngiltərə kubokunda sonuncu penta-trik 1970-ci ilə təsadüf edib. Onda “Mançester Yunayted”in ulduzu Corc Best bir oyunda 5 qol vurmuşdu.