“Uşaq və gənclərin fiziki və mənəvi inkişafı” istiqaməti üzrə layihə çərçivəsində yazılarımız davam edir.

Tez-tez arzulayırıq ki, azərbaycanlı idman mütəxəssisləri ölkə xaricində çalışsın, ölkəni sərhədlərimizdən kənarda uğurla təmsil etsinlər. Futbol məşqçiləri ilə bağlı bu arzumuz gerçəkləşməsə də, artıq azərbaycanlı güləş mütəxəssislərinə xaricdə güvən formalaşıb. Abil İbrahimov da belə idman mütəxəssislərindən biridi. Gəncə güləş məktəbinin yetirməsi olan Abil bəy bilik və bacarığını Qazaxıstanda bölüşür, təcrübəsini qardaş ölkədəki həmkarları ilə paylaşır. Onunla söhbətdə bir çox maraqlı məqama toxunduq.

- Abil bəy, ilk sualda ənənəmizə sadiq qalaraq sizi oxuculara daha yaxından tanıtdırmağa çalışaq. Güləşə gəlişiniz necə oldu? İlk məşqçinizi və məşq etdiyiniz güləş məktəbini necə xatırlayırsız?
- Mən Gəncə şəhərində doğulmuşam. Beş yaşımda məni valideynlərim musiqi məktəbinə yazdırıblar. 10 yaşımda musiqi məktəbini əla qiymətlərlə bitirmişəm. Amma bu beş il mənim üçün çox əziyyətli keçdi. Çünki mən uşaq vaxtı xeyli fəal idim. Sakit oturmağı xoşlamıram. Siz də yaxşı bilirsiz ki, Gəncə idmançıları, o cümlədən də güləşçiləri ilə fərqlənir. Bizdə güləş məktəbi həmişə güclü olub, hər beş nəfərdən üçü güləşlə məşğul idi. Evdə, küçədə həmişə güləş söhbətləri gedirdi. Güləşçilərin yarışlarından, kimin kimə qalib gəlməsindən danışılırdı. Mən də valideynlərimdən xahiş etdim ki, məni güləş məktəbinə yazdırsınlar. Məndən 2-3 yaş böyük uşaqlar sərbəst güləşlə məşğul olurdu. Atam qonşularla danışdı, onların məşq etdiyi güləş zalına yollandım. İlk məşqçim “Şöhrət” ordenli Əməkdar məşqçi Elçin Zeynalov oldu. Buna görə Allaha şükür edirəm. Elçin müəllim Azərbaycanın güləş məşqçiləri arasında tanınmışlardan, korifey mütəxəssislərdəndi. Mənim üçün də Elçin Zeynalov sevimli müəllimdi. Yaxşı ki, məhz onun əlinə düşdüm və başladım güləşin sirlərini öyərnməyə.

- Niyə məhz güləşi seçdiz? Bu idman növünü sizə sevdirən nə oldu? Bir güləşçi kimi hansı nəticələri qazana bildiz?
- Mən 10 yaşımdan bu günə kimi döşəkdəyəm. Belə demək mümkünsə, güləş aləminin içindəyəm. Az öncə qeyd etdiyim kimi, güləşi sevməyimin səbəbi də Gəncədə bu idman növünə olan sevgi, qonşuluqda yaşayan həmyaşıdlarımın güləşlə məşğul olmasıdı. Yeniyetmələr arasında üç dəfə dünya çempionu olmuşam. Səhv etmirəmsə, dünya güləş tarixində belə nəticə yoxdu. Gənclər arasında da dünya çempionu adını qazanmışam. Böyüklər arasında iki dəfə komanda şəklində dünya kubokunun qalibi olmuşuq.



- Qazaxıstana yollanmağınız necə baş verdi? İki ölkənin güləşi arasında hansı fərqlərdən, yaxud paralellərdən danışmaq olar?
- Qazaxıstanla məni çox şey bağlayır, demək olar ki, bu ölkə mənim ikinci vətənimdi. 90-cı illərin sonlarında ailəmizlə Qazaxıstana köçmüşük. Qazaxıstan yığmasının heyətində də çıxış etmişəm. Bu yığmanın heyətində gənclər arasında dünya çempionu oldum, Sidneydə keçirilən Yay Olimpiya Oyunlarında da iştirak etdim. İki dəfə də Asiya çempionatında qızıl medal qazandım. Hazırda “Altay wrestling” klubuyla müqaviləm var, orda həm İcraiyyə Komitəsinin üzvü, həm də məşqçi məsləhətçisi kimi çalışıram. Burdakı tələbələrimlə də məşğul oluram, ona görə də Qazaxıstanda daim qala bilmirəm. İşimi əsasən məsafədən yerinə yetirirəm. Azərbaycanla Qazaxıstan güləşinin bənzərlikləri çoxdu. Düzdü, orda sistem bir az başqa cürdü, amma hər ikisi SSRİ güləş məktəbindən çıxıb. Buna görə də bənzərlikləri çoxdu.

- Artıq bir mütəxəssis kimi xeyli vaxtdı ki, bilik-bacarıqlarınızı yetirmələrinizə öyrədirsiz. Uğurlu yetirmələrinizdən kimləri qeyd edə bilərsiz? Yetirmələrinizin hansı uğurlarını oxucularla bölüşmək istərdiz?
- Güləşi başa vurandan sonra qərar verdim ki, məşqçi kimi fəaliyyətimi davam etdirim. Bu dövr ərzində Azərbaycan çempionları, müxtəlif turnirlərin mükafatçılarını yetişdirmişəm. Yetirməm Turan Bayramov yeniyetmələr arasında dünya, Avropa və olimpiya çempionudu. 23 yaşlılar arasında dünya çempionu, Avropa mükafatçısı, Olimpiya Oyunlarının iştirakçısı və Azərbaycan yığmasının ən perespektivli üzvlərindən biridi Turan Bayramov. Digər vurğulamaq istədiyim tələbəm Nurəddin Bayramovdu. Sonuncu Avropa çempionatında Nurəddin bürünc mükafat qazanıb. Onun da böyük perspektivi var, Azərbaycan yığmasının ümidlərindən biridi. Əbdülrəhman İbrahimov yeniyetmələr arasında dünya çempionu və Avropa birinciliyinin mükafatçısıdı. Aşağı yaş qruplarında da gələcəyinə ümidlə baxdığım yetirmələrimiz çoxdu. İnanıram ki, onlar da bizi gələcəkdə sevindirəcəklər.



- Bəs indiki yeniyetmə və gənclərin idmana münasibəti, məşqlərə yanaşması necədi? Bu yanaşma sizi qane edirmi?
- Əvvəllər olduğu kimi, indi də Gəncə şəhərində güləşi çox sevirlər. Bu idman növünə böyük axın var. Əlbəttə, bu maraq bir məşqçi kimi mənim ürəyimcədi. Əlavə bir neçə zal açılsa, çox gözəl olar. Ümid edirəm ki, gələcəkdə bu zallarda yeni olimpiya və dünya çempionları yetişəcək.

AMAL ABUŞOV



Yazı Azərbaycan Respublikasının Medianın İnkişafı Agentliyinin maliyyə dəstəyi ilə, “Uşaq və gənclərin fiziki və mənəvi inkişafı” istiqaməti üzrə hazırlanıb.