“Uşaq və gənclərin fiziki və mənəvi inkişafı” istiqaməti üzrə layihə çərçivəsində yazılarımız davam edir.

Növbəti yazımızda da diqqətlərimizi cənub bölgəsinə yönəltmişik. Hamımız bilirik ki, idmanla məşğul olmaq yeniyetmə və gənclərimizin təkcə sağlam bədənə sahib olması üçün vacib deyil. İdman həm də millətimizin gələcəyinə sağlam ruh bəxş edir. İdmanla məşğul olan uşaqlar pis vərdişlərdən uzaq olur, asudə vaxtını səmərəli keçirir. Bu mənada idman müəllimlərinin, məşqçilərin uşaqları düzgün istiqamətə yönəltməsi, onların sağlam həyat tərzi keçirməsinə yardımçı olması vacib məqamdı. Belə nəcib işlə məşğul olan idman mütəxəssislərindən biri də Alı Ağayevdi. Alı müəllim Lənkəranda uşaq və yeniyetmələrə güləşin sirlərini öyrədir.

- Alı müəllim, ilk sualda ənənəmizə sadiq qalaraq sizi oxucularımıza daha yaxından tanıtmağa çalışaq. Güləşə gəlişiniz necə oldu? İlk məşqçinizi və məşq etdiyiniz güləş məktəbini necə xatırlayırsız?
- Mən 1985-ci ildə Lənkəranın Kosalar kəndində anadan olmuşam. Güləşi sevməyə 10 yaşımdan başlamışam. Kəndimizdə güləşi bizə sevdirən Ədalət Mövsümov oldu. Ədalət müəllim bizə güləşi öz evində keçdiyi məşqlərdə öyrədirdi. Onun bu məşqlərindən güləşi sevməyə başladıq. Sonradan isə Lənkəran şəhərində yunan-Roma güləşi bölməsinə yollandıq. Məşqçimiz Vüqar Soltanov idi. Respublika səviyyəli bir çox yarışda Lənkəranı uğurla təmsil etmişəm. 2003-ci idə Bakı Bədən Tərbiyəsi və Turizm Kollecinə daxil oldum, ixtisasım üzrə təhsil aldım. Tələbəlik illərində də milli komandanın tərkibində məşqlərimi davam etdirdim.

- Güləşlə bağlı məqsədiniz nə idi? Hansı hədəflərə çatmağı arzulayırdız?
- Əsas məqsədim daim birincilik qazanmaq, doğma Azərbaycanımızın bayrağını həmişə yüksəklərdə dalğalandırmaq olub. Təəssüf ki, çiynimdən ağır zədə aldım, ona görə də güləşməyə davam edə bilmədim. Amma bu zədə məni ruhdan sala, idmanda uzaqlaşdıra bilmədi. Öz qarşıma qoyduğum çempionluq hədəflərini məşqçiliyə daşıdım, istədim ki, öz bilik və bacarığımı uşaqlara öyrədim, onların yaxşı güləşçi olmasına çalışım. 2009-cu ildə Lənkəran şəhəri Uşaq və Gənclər İdman Məktəbində məşqçi kimi fəaliyyətə başladım. Bununla yanaşı, Lənkəranın Viyən kənd orta məktəbində idman müəllimi kimi işə başladım.



- Deməli, özünüzün zədə səbəbindən çata bilmədiyiniz zirvələrə yetirmələrinizi çatdırmağı hədəflədiz...
- Bəli, doğru qeyd etdiz. Sevinirəm ki, Lənkəranda yunan-Roma güləşini yüksək səviyyəyə çatdıra bildik. Yetirmələrimiz respublika səviyyəli yarışlarda sözünü deməyi bacardı. Ən nüfuzlu turnirlərdə güləşçilərimiz qalib və mükafatçılar sırasına düşdülər. 2018-ci ildən yunan-Roma güləşi üzrə Lənkəranda baş məşqçi işləyirəm. Tələbələrimiz dünya və Avropa çempionatlarında sözünü deməyi bacarır. Lənkəranda yunan-Roma güləşi üzrə Avropa çempionatından medalla dönən ilk idmançı Elmin Əliyev bizim yetirməmizdi. Elmin gürcüstanlı idmançı Giorgi Maxaradzeyə 6:2 hesabı ilə qalib gələrək Albaniyanın Tirana şəhərində keçirilən yeniyetmələr (U-17) arasında Avropa çempionatının bürünc medalını qazanıb.



- İndiki yeniyetmə və gənclərin idmana münasibəti, məşqlərə yanaşması necədi? İstedadlara güvənə bilərikmi?
- Lənkəranda güləşə maraq böyükdü. İş düzgün qurulunca valideynlərin də güləşə marağı, məşqçilərə inamı artır. Onlar həvəslə övladlarını güləş məşqlərinə gətirirlər. Mən 15 ildən artıqdı Lənkəranda məşqçilik edirəm. Demək olar ki, hamı məni tanıyır. Ona görə də valideynlər uşaqlarını bizə etibar edirlər. Nəticə də göz qabağındadı. Biz idmançılarımızı tərbiyəli, vətənpərvər ruhda böyüdürük. Ondan sonra güləşlə bağlı danışır, məşqlərimizi keçirik. Hazırda 150-dən çox tələbəmiz var. Həmin tələbələrimizlə Lənkəranda yerləşən “Sparta” idman klubunun məşq zalında məşğul oluruq.

- Tez-tez valideynlərlə ünsiyyətdə olursuz. Onlarla söhbətinizdə əsasən hansı məqamlara diqqət edirsiz?
- Valideynlərə sözüm o olur ki, uşaqlarını idmana qoysunlar, bu işdə gecikməsinlər. Çünki oğlan uşaqlarını pis vərdişlərdən qoruyan idmandı. Onların sağlam ruhda böyüməsində idmanın rolu böyükdü. Qarşımızda böyük hədəflər dayanır. Biz həmin hədəflərə yalnız valideynlərin dəstəyi ilə çata bilərik. Məşqçinin rolu ilə yanaşı, valideynin də bu işdə rolu böyükdü. Çünki valideynlər övladlarını daha yaxşı tanıyır, onlarla daha çox vaxt keçirmək imkanında olurlar. Məşq prosesimizlə bağlı məlumatları sosial şəbəkələrdə, “yutub” kanalımızda da yayınlayırıq. Valideynlər məşqlərimizlə daha yaxından tanış olmaq üçün həmin görüntüləri də izləyə bilərlər. Bununla da bizim uşaqlara yanaşmamızla, onlara güləşi necə sevdirməyimizlə, məşqləri necə keçməyimizlə ordan da məlumat almaq imkanı var.
AMAL ABUŞOV



Yazı Azərbaycan Respublikasının Medianın İnkişafı Agentliyinin maliyyə dəstəyi ilə, “Uşaq və gənclərin fiziki və mənəvi inkişafı” istiqaməti üzrə hazırlanıb.