“Danışıqlar prosesi 3 həftə çəkdi. Bir gün “bitdi” deyirdilər, növbəti gün yenə davam edirdi. Bu da məni psixoloji cəhətdən bir qədər yordu. Amma əsas odu ki, sonda transfer baş tutdu. Müdafiənin mərkəzində mənimlə birlikdə 6 futbolçu var. Sərdar Əziz uzun illərdi çempionatımızda və yığmada forma geyir. Bonuççi kimi futbolçu da var. Kimin oynayacağına baş məşqçi qərar verir. Onun hər qərarına hörmətlə yanaşıram. Hələ də bəzi çatışmazlıqlarım var. Çünki mövsümün əvvəlindən bəri çox da oyun praktikam olmadı. Amma oynadıqca özümü daha yaxşı və inamlı hiss edirəm. Əsas hədəf mövsümün qalan hissəsində yaxşı performans sərgiləmək və “Fənərbaxça”nın uzun illərdi davam edən çempionluq həsrətinə son qoymaqdı. İşin içində peşəkarlıq da var. Bu hədəfin həyata keçməsinin böyük hissəsi bizdən asılıdı. İndi çempionluqdan başqa heç nə haqda düşünmürük. Bu il 28 yaşım olacaq və ilk dəfə Türkiyə çempionatında oynayıram. Böyük camiəyə gəlmişəm və üzərimdə məsuliyyət hiss edirəm. Açığı, türk olmağıma baxmayaraq, uyğunlaşmanın daha uzun çəkəcəyini düşünürdüm. Çünki oturuşmuş heyəti olan bir komandaya gəldim. Amma məşqçilərim və komanda yoldaşlarım sağ olsun, məni gözəl qarşıladılar. Dərhal hamı ilə qaynayıb-qarışdım. Qazandığım pulun qarşılığını vermək istəyirəm. “Atletiko” ilə müqaviləm davam edir. Mövsümün sonuna qədər olan müddət çox önəmlidi. Sonluq uğurlu alınsa, gələcək taleyim həmin məqamda aydınlaşacaq. Türkiyə yığmasında da gözəl rəqabət var. Bu rəqabət biz futbolçuları daha da güclü edir. Ən yaxşı performans ortaya qoyan futbolçu start heyətində oynayacaq. Yığmada əla ab-hava var. AÇ-2024-ə ümidlə baxıram. İnanıram ki, bizi gözəl turnir gözləyir. “Fənərbaxça”da yaxşı futbolçular toplaşıb. Türkiyə çempionatı kənardan göründüyü qədər asan turnir deyil. İsmayıl Kartal məni sağ mərkəz müdafiəçisi qismində görür. Mən də əlimdən gələni edirəm. Burda Cengiz Ündər, İrfan Can Kahveci, Sərdar Əziz, Mərt Hakan Yandaş kimi yaxın dostlarım var. Onlar mənə tez-tez “Fənərbaxça”da çox yaxşı atmosferin olduğunu söyləyirdilər. Açığı, son bir ildə psixoloji cəhətdən çox yorulmuşdum. Müxtəlif səbəblər üzündən oynaya bilmirdim. Zədələr də mənə mane olurdu. Artıq hamısını geridə qoymuşam. Burda yaxşı performans sərgiləmək, özümü “Fənər” camiəsinə və Türkiyə futbol ictimaiyyətinə göstərmək, eləcə də AÇ ərəfəsində yaxşı formaya düşmək istəyirəm. Komandada gərginliyin olub-olmaması haqda dəqiq bir söz söyləyə bilmərəm. Çünki bura mövsümün ortasında gəlmişəm. Hər zaman obyektiv toplantılar keçiririk. Mövsüm uzundu, hər şey ola bilər. Uğur qazanacağımıza inanıram. Çempion olacaq potensiala sahibik”.