“Qarabağ”ın “Braqa”yla qarşılaşmasına saatlar qalmış deyilirdi ki, stadion dolu olacaq.

“Köhlən atlar”ın ciddi azarkeş təzyiqi altında oynayacağını poroqnozlaşdırırdıq. Matç başladıqdan sonra bəlli oldu ki, 30286 yerlik stadionun təxminən 40 faizi dolub. Hər iki komandanın hücum futboluna üstünlük verdiyini nəzərə alsaq, çoxlu qol görəcəyimizə şübhə yox idi. Belə də oldu və yaxşı ki, “Qarabağ” səfərdən qələbəylə döndü. Oyunun gedişində yaşanan maraqlı hadisələr gözdən qaçmadı. Tribunalarda “İmarət Avropa”nın fanklubunun yer aldığını görəndə komandamızın çətin Portuqaliya səfərində tək olmadığını anladıq. Rəqibin azarkeşləri? İnanılmaz olsa da, onlar “Qarabağ”ın ardıcıl qollarından sonra hörmət əlaməti kimi ayağa qalxdı və çempionumuzu alqışladı. Üstəlik ağ kağız və salfetlər qaldıraraq təslim olduqlarını etiraf etdilər. Halbuki ilk dəqiqələrdən kollektivə dəstək göstərir, müxtəlif şüar və pankartlar ilə varlıqlarını isbat edirdilər.

Yankoviç 27-ci dəqiqədə Elvini tələsik davrandığına görə az qala danladı. Lunyov isə sadəcə zərbələri dəf etmir, ona təzyiq göstərməyə çalışan azarkeşlərin cavabını əsirgəmirdi. Qurban Qurbanovun zəhmli mimikasını görürdüksə, Artur Jorjenin narahat baxışlarından hər şey aydın idi. Hətta o, Zubirin hesabı 4:1 edən qolundan sonra başını əlləri arasına alıb dəhşətə gəldiyini büruzə verdi. Son dəqiqələrin yaddaqalan adamı isə Nəriman Axundzadə oldu – sözün bütün mənalarında. O, aşkar qol imkanını qaçırandan sonra göz yaşını saxlaya bilmədi. “Qarabağ”ın qələbəsinin rəsmiləşdiyi anda nəinki qonaqların, meydan sahiblərinin azarkeşləri də alqışlara qoşuldu.

KƏNAN BAHADIR