Bu mövsüm 1-ci liqada gərgin mübarizənin şahidiyik.

Belə deyək, 6-cı pillədə qərarlaşan komanda ilə lider arasındakı xal fərqi 8-ə bərabərdi. 3-4 komanda eyni anda çempionluq mübarizəsindədi. Mövsümə uğursuz başlayan “İmişli” ötən tur “İrəvan”ı səfərdə məğlub edərək (2:1), 1-ci pillə uğrunda yarışa qoşuldu. Komandanın budəfəki rəqibi isə “qara zolaq”dan çıxa bilməyən “Difai Ağsu” oldu. Oyundan öncə start heyətlərinə baxmaq üçün klubun “feysbuk” səhifəsinə daxil oldum. Lakin paylaşımda başqa bir şey diqqətimi çəkdi: heyətdə iki 9 nömrəli futbolçu yer almışdı.

Təbii ki, görüşün aşkar favoriti “İmişli” sayılırdı. Komandanın evdə oynaması qələbə ehtimalını daha da artırırdı. Lakin tribunalarda elə də çox azarkeşə rast gəlmədik. Düzdü, Bakıda keçirilən 1-ci liqa görüşləri ilə nisbətdə matça maraq daha yüksək idi. Hətta “İmişli”nin fanklubu da tribunada yerini almışdı. Diqqətimizi çəkən məqamlardan biri isə meydançanın vəziyyəti idi. Ot örtüyü, demək olar ki, tam əlverişsiz idi, qazon palçığa dönmüşdü.

Görüş meydan sahiblərinin üstünlüyü ilə başladı. Yuxarıda vurğuladığımız ot örtüyü məsələsi ilk dəqiqələrdən özünü göstərdi. Ötürmələr ya yarımçıq qalır, ya da top meydançadakı boşluqlara dəyəndən sonra istiqamətini dəyişirdi. İlk təhlükəli hücum elə məhz “İmişli”dən gəldi. Xəqani Sadıxovun başla zərbəsini qapıçı dəf etdi. Qonaqların buna cavabı isə gecikmədi. Kristian Kamta qolkiper Mehman Hacıyevlə dueldən məğlub ayrıldı. 27-ci dəqiqədə İbrahim Əliyevin cərimə zərbəsi yadda qaldı. Lakin meydan sahiblərinin futbolçusu dəqiq ola bilmədi. 34-cü dəqiqədə Sadıxovun ötürməsini Tolqar Yaqubov tamamlasa da, “çərçivə”yə düşə bilmədi. Hissənin sonları isə Elşən Abdullayevin fəallığı ilə keçdi. “Neftçi” və “Qarabağ”ın sabiq futbolçusu meydanda ustalığını nümayiş etdirdi. O, bir neçə rəqibini geridə qoysa da, zərbəsi dəqiq olmadı. Hücumlarını artıran “İmişli” daha bir dəfə qola yaxın oldu. İbrahimin başla zərbəsi qapının üstündən keçdi.

İkinci hissədə də meydan sahibləri üstün təsir bağışladı. Abdullayevin qüvvətli zərbəsi müdafiəçilərdən qayıtdı. 72-ci dəqiqədə Ruslan Hacıyev Xəzər Mahmudovu qapıçı ilə üz-üzə qoysa da, sonuncunun zərbəsi bərbad alındı. Buna baxmayaraq, “İmişli” istəyinə 79-cu dəqiqədə çatdı. Elnur Cəfərov cərimə zərbəsindən baxımlı qola imza atdı. Buraxılan topdan sonra hücumlarının sayını artıran qonaqlar məğlubiyyətdən xilas ola bilmədi – 0:1.
Xalını 26-ya çatdıran “İmişli” lider “Qaradağ Lökbatan”a daha da yaxınlaşdı. “Difai Ağsu” isə 7 xalla yerində saydı.

İSMAYIL XEYRULLAYEV