Dünən Avropa Liqasının pley-off mərhələsində keçiriləcək “Braqa” – “Qarabağ” oyunu öncəsi mətbuat konfransı təşkil olundu.

Rəsmi tədbirdə “köhlən atlar”ın futbolçusu Julio Romao da çıxış etdi. Braziliyalı yarımmüdafiəçi “Braqa”nın heyətində xüsusi çəkindiyiniz futbolçu varmı?” sualını belə cavabladı: “Əl-Musrati təhlükəli oyunçu idi, amma komandadan ayrıldı. Bundan başqa, Banza, Bruma və Calonu qeyd etmək olar”.

Əlbəttə, təcrübəli oyunçu belə deyirsə, bir bildiyi var. Amma adı çəkilənlər sırasında Banza xüsusilə diqqəti cəlb edir. Öncə onunla yaxından tanış olaq.
Konqolu mərkəz hücumçusunun start heyətində yer alacağına şübhə yoxdu. Çünki o, komandasının “qol kralı” sayılır. Portuqaliya çempionatının ilk 15 turunda meydana çıxan Banza 14 qol, 3 məhsuldar ötürmə ilə yadda qalıb. Daha sonra Afrika Millətlər Kubokuna yollanan futbolçu turnirdəki 7 matçın ikisində ehtiyat oyunçular skamyasında əyləşib. Beşində meydana çıxsa da, heç nə ilə yadda qalmayıb. 181 dəqiqə meydanda olub. Belədə onun indiki halda tam formada olmadığını deməyə əsasımız var. Simonun bazar qiymətinə gəlincə, 189 sm boya malik 27 yaşlı oyunçu 12 milyon avro dəyərindədi. Cari mövsümdə Çempionlar Liqasında 6 oyunda çıxış edən hücumçunun hesabında bir məhsuldar ötürmə var. Maraq üçün qeyd edək ki, Banza “silah ustalarının qol silahı” ləqəbiylə tanınır.

Aparıcı oyunçulardan Əl-Musratinin komandadan ayrıldığını, Armindo Bruma ilə Adrian Marinin ciddi zədəsinin olduğunu nəzərə almalıyıq. Üstəlik Rikardo Ortanın da komanda ilə birgə son məşqə qoşulmaması suallar doğurur. Qısası, “Braqa” heyət baxımından “özü” olmayacaq. Yəni “Qarabağ”ın qarşısına axsaq çıxacaq. Elişa Ovusu, Əli Əl-Musrati və Migel Falenin satılması, əvəzində, sadəcə, Şer Ndurun transfer olunması da vacib məqamdı. Çünki bu addımlar müdafiə xəttində müəyyən boşluqların yaranmasına xidmət edə bilər.

Ümumiyyətlə, rəqibin çətin, üstün və favorit olduğunun fərqindəyik. Lakin “Qarabağ” özündən həm maliyyə, həm də keyfiyyət baxımından üstün olan rəqibləri dəfələrlə üstələyə bilib. İndi də ümidimiz tamdı. Əsas odu ki, Banzanın qarşısını almaq mümkün olsun!

KƏNAN BAHADIR