“Turan Tovuz istisna olmaqla Azərbaycanda tribuna problemi var. Bəli, Qəbələdə azarkeş dəstəyi gözləniləndən azdı. Amma ən aşağı olanda 800-1000 nəfər olur Qəbələ şəhər stadionunda. Mən də istəyərəm ki, 5000 azarkeş olsun, amma olmur. İlk və əsas səbəb stadionun üstünün açıq olmasıdı. İnsanlar gəlib soyuq havada dayana bilmirlər. İkincisi, Qəbələdə yüz min əhali var. Onlardan yaşlı, qadın və uşaqları çıxsaq, gənc nəsil qalır - təxminən 30 min adam. Otuz mindən 1000-2000 azarkeşin gəlməsi bir o qədər də pis sayılmır. Bundan başqa, Qəbələdə hava çox rütubətlidi. Bakıda günəş olanda Qəbələdə iki palto ilə gəzirsən. Bunlar da səbəbdi, lakin bəhanə deyil. Bu gün komanda pis vəziyyətdədisə, ona ikiqat motivasiya lazımdı. “Red-Black Army” azarkeş qrupu olaraq, bizim öhdəliyimiz yoxdu ki, gedib stadionda oturaq. Klubdan asılı olan rəsmi fanklub deyilik. Müstəqil azarkeş qrupuyuq, stadionu doldurmaq kimi öhdəliyimiz yoxdu. Əlbəttə, istəyərik tribunalar dolsun və daha çox azarkeş dəstəyi olsun. Amma bu bizim öhdəliyimiz deyil. Komandanın uğursuzluqlarına gəlincə, təlim- məşq toplanışından sonra fikirləşdik ki, hər şey yaxşı olacaq. Sən demə, belə deyilmiş. Ötən mövsümə və ondan əvvələ nəzər salsaq, komanda avrokuboklara oynayırdı. Yaxşı azarkeş dəstəyi var idi. Amma indi azarkeşlər gəlib baxır və “Qəbələ” uduzur. “Qəbələ”nin 15 xalı var, elitadan düşsə, biabrçılıq olacaq. Komandada nə məşqçi, nə də futbolçu dəyişikliyi var. Bu amillər insanlara təsir göstərir. Yəni komandada müsbətə doğru heç nə görünmür. Səhhətimlə bağlı Bakıdayam. 10 günə qayıdım Qəbələyə, azarkeş qrupunda dəstəyi gücləndirəcəm. Ölkənin köklü klublarından biri olan “Qarabağ”ın Avroliqadakı oyunlarına 30-35 min azarkeş gəlir, amma çempionat oyunlarına 200-300 nəfər. Bunlar hamısı reallıqdı. Vaxtilə “Qəbələ”nin Avroliqa oyunlarına da 10 min azarkeş gəlib. Amma çempionat oyununda 200, 500, 1000 nəfər olub. Hamının sözü birdi ki, tribunada problemlər var. Bir dəfə siz federasiyadan soruşun ki, istəyirsizmi azarkeş gəlsin? Tribunada elə qaydalar var ki, bu gün azarkeş dəstək verməyə getmək istəmir. Yəni televizordan baxım, stadionda əsəbləşməyim. Başqa bir səbəbi də qeyd etmək istəyirəm. “Qəbələ”nin ev oyunlarının əksəriyyəti həftəiçinə düşür. İnsanlar işindən-gücündən qalıb oyunu izləməyə gələ bilmirlər. Dövlət işində, özəl sektorda işləyənlər komandaya dəstək olmağa gələ bilmirlər. Bunlar da böyük problemdi. Komanda bir neçə qələbə qazansa, adamlar da ruhlanacaq”.