Sumqayıt açılışa hazırdı – Murad Arif də, Hiss də...
Xəbər verdiyimiz kimi, "Sumqayıt" yenilənmiş Mehdi Hüseynzadə adına şəhər stadionunda ilk oyunu premyer-liqanın 21-ci turu çərçivəsində "Neftçi"yə qarşı keçirəcək.
Bu oyun sabah, saat 15.00-da start götürəcək. Əlamətdar olayla bağlı son durumla maraqlandıq. Xatırlayırsızsa, bir müddət öncə PFL-nın texniki-idman direktoru Elgiz Abbasov bizə açıqlamasında işıqlandırılma sistemi ilə bağlı problemlərin hələ ki həll olunmadığını demişdi. Buna görə də “Sumqayıt”ın mətbuat xidmətinin rəhbəri Zaur Xudiyevlə danışdıq:
“Stadionun vəziyyəti yaxşıdı. Açılışa hələ iki gün var. Oyun gününə qədər də işlər davam etdiriləcək. Çox xırda problemlər qalıb ki, onları da çatdıra biləcəyimizi düşünürəm. Əslində minimal tələblərə cavab verən işıqlandırma sistemimiz var. Sadəcə, PFL-nın da qərarına görə oyunun başlama saatını gündüzə saldıq. Onsuz da qış vaxtı bir çox matç gündüz vaxtına salınır. Bu da onunla bağlıdı”.
Açılış mərasimində tanınmış ulduzların – Murad Ariflə Hissin iştirakını da nəzərə alaraq, konsert proqramının nə qədər davam edəcəyini və bilet satışının nə yerdə olduğunu da soruşduq:
“Konsert təxminən yarım saat davam edəcək. Bilet satışı yaxşı davam edir”.
Yeri gəlmişkən, 9700 yerlik stadionda 9 minə yaxın bilet satışa çıxarılıb. Müəyyən yerlər dəvətnamə şəklində fanklublara ayrılıb. Biletlərin qiyməti 2, 5, 10 manat aralığında dəyişir.
Xudiyev komandanın kapitanı Vüqar Mustafayevin zədəsi barədə də məlumat verdi:
“İnşallah, Vüqar fevraldan etibarən yavaş-yavaş məşqlərə başlayacaq, zaman keçdikcə tədricən komandaya qoşulacaq. Hazırda hələ ki bərpa prosesindədi və zədəsi davam edir”.
Xatırladaq ki, Musatafayev mövsümün ilk yarısını başa vurandan sonra sağ dizindən aldığı zədəylə bağlı yaranmış osteofit çıxıntılar səbəbindən əməliyyat olunmuşdu.
KAMAL SƏFƏR
Digər xəbərlər
