Amil Yunanov narazı “Kəpəz” azarkeşlərinə nə dedi? - AÇIQLAMA
“Qarabağ”la oyunda ürəyim istəyən kimi çıxış edə bilmədim”
“Kəpəz” ilin əvvəlində, daha dəqiqi, yanvarın 5-də “Səbail”in futbolçusu Amil Yunanovu icarəyə götürdü. Gəncə təmsilçisinin baş məşqçisi Adil Şükürov heyətə cəlb etdiyi yeni oyunçu sayəsində hücum xəttində rəqabətin artmasına şərait yaratmaqla yanaşı, premyer-liqada qalmaq uğrunda mübarizədə doğru addım atmaq istəyirdi. Hələ ki bu yöndə dəqiq fikir bildirmək çətindi. Çünki Amil indiyə qədər cəmi iki dəfə - 19-cu turda “Turan Tovuz”, 20-ci turda isə “Qarabağ”la matçda meydana çıxıb.
Futbolçu “Kəpəz”in heyətində 154 dəqiqə meydanda olub. Onun hesabında hələ ki qol və məhsuldar ötürmə yoxdu. Məhz bu məqam bəzi “Kəpəz” azarkeşlərini narahat edir. Əlbəttə, narahat olmaq üçün hələ tezdi. Lakin hücumçunun 31 yaşlı olması da narazılıq yaradan məqamlar sırasındadı. Xatırlayırsızsa, bu barədə Adil Şükürovun fikirlərini nəzərinizə çatdırmışdıq. Mütəxəssis Amilə güvəndiyini, onun Georgi Papunaşvili və Adame Niane kimi təcrübəli legionerlərlə rəqabətdə geri qalmayacağını demişdi. Bəs Amil necə düşünür?
Dünən onun düşüncələrini öyrənməyi lazım bildik. Təbii ki, söz düşmüşkən, hücumçunun yeni komandasında özünü encə hiss etdiyini və hədəflərinin hansı yöndə olduğunu soruşduq:
“Komandada hər şey normaldı. Şükür Allaha, hər iki matçda meydana çıxmışam. Bilindiyi kimi, oyun təcrübəsi ilə bağlı problemim var idi. Demək olar ki, son 6 ay ərzində meydana çıxmamışdım. Təbii ki, bəzi çatışmazlıqlar ortaya çıxır. “Qarabağ”la oyunda ürəyim istəyən kimi çıxış edə bilmədim. Amma “Turan Tovuz”la matçdakı performansım yaxşı idi. O mənada ki, yavaş-yavaş çatışmazlıqların aradan qalxdığını hiss edirəm. Düzdü, hücumçunun işi qol vurmaqdı. Hələ ki bunu edə bilməmişəm. Lakin tezliklə tam formada oynamağa başlayacam. Azarkeşlərin narazılığına gəlincə, onları başa düşürəm. Həm “Kəpəz”dən, həm də məndən gözləntiləri böyükdü. Çalışacağam ki, tezliklə yeni komandama uyğunlaşım, oyunçularımızı tanıyım və özümü ən yaxşı tərəfdən göstərim”.
Amil Gəncə təmsilçisinin 20-ci turda “Qarabağ”a qarşı keçirdiyi əzmkar matç haqda da danışdı:
“Hər şey öz əlimizdə idi. Oyunu izləyənlər bilir ki, hətta 1 xal qazanmaq və ya qalib gəlmək şansımız da az deyildi. Ümumi vəziyyəti nəzərə alsaq, kollektivdə dirçəliş var. Müəyyən məsələlərdə daha yaxşı səviyyəyə gəlmişik. İnşallah, bir neçə tur sonra hər şey daha yaxşı olacaq. Məqsədlərimizə çatacağımıza inanırıq. Son oyunlarda bəzi çatışmazlıqların həll edildiyi görünür. Qalan məsələlər üzərində də işləyirik ki, azarkeşlərimizi sevindirək”.
KƏNAN BAHADIR
Digər xəbərlər
