Ramil Şeydayevin karyerasına Türkiyənin 1-ci liqa təmsilçisi “Kocaelispor”da davam etdiyini bilirsiz.

Qardaş ölkə mətbuatına səs salan transfer yanvarın 17-də həyata keçirildi. Bundan sonra oyunçunun yanvarın 20-də 19-cu tur matçında debüt edəcəyi gözlənilsə də, baş məşqçi Ərtoğrul Sağlamın taktiki gedişləri üzündən bu, mümkün olmadı. Nəhayət, 20-ci turda, yanvarın 28-də Ramil yeni komandasıyla birgə meydana çıxdı.

“Kocaelispor” “Altay”la səfər matçında 2:0 hesablı qələbə qazandı. Nəticə baxımından təbii ki, həmyerlimizin debütü uğurlu alındı. Amma Ramil qol və ya məhsuldar ötürmə müəllifi ola bilmədi. Halbuki bunun üçün bir neçə fürsət yaxaladı. Hücumçu həm ilk, həm də ikinci 2-ci hissədə özünü yaxşı tərəfdən göstərdi. İzləyənlər bilir ki, oyuna start heyətində başlayan Ramil əvəzlənənə, yəni 72-ci dəqiqəyə qədər əzmkar mübarizə apardı və fərqlənməyə çalışdı. Lakin o, sadəcə, vərəqə baxımından hesabı açdı. Yəni 40-cı dəqiqədə hücumda olan rəqib futbolçuya kobud şəkildə müdaxilə etdiyindən cəzalandırıldı. Təbii ki, bu məqam hücum cəhdlərində komandasına maksimum fayda verməyə çalışan oyunçu haqda mənfi fikir yaratmamalıdı. Görünür, yazdıqlarımızla “Sofascore” portalı da həmfikirdi ki, millimizin forvardına 6,7 bal verib ki, bu da orta qiymət sayılır.

Türkiyə mətbuatı da Ramilin debütünə biganə qalmayıb. “En Kocaeli" qəzetində "Kocaelispor"un "Altay"la səfər matçına toxunulub. Həmkarımız Ahmet Gökmən Şeydayevin oyunda gözəl çıxış etdiyini, gələcəkdə yaxşı işlər görə biləcəyini yazıb: “Uyğunlaşma problemi yaşamasa, komandaya fayda verəcək futbolçuya bənzəyir. İlk maçda ümidverici çıxışı oldu. Amma onun oyununun yetərli olduğunu söyləmək olmaz. Gələcək matçlarda görəcəyik".
“Demokrat Kocaeli” qəzetinin yazarı Umut Karagöz də futbolçu haqda müsbət fikirdədi. O, Ramilin ümumi performansı ilə gələcək üçün ümidverici oyun ortaya qoyduğunu yazıb: “Matçın ilk hissəsində bir epizodda qola yaxınlaşan Şeydayev azarkeşlərdən də yaxşı qiymət aldı”.

Bəs bəzi azarkeşləri narazı salan məqamlar hansılardı? Sizi bəzi rəylərlə tanış edirik: “bu adam yaman xəsis və özündənrazıdı. Bizə o biri azərbaycanlı lazım idi”, “Ramili görəndən sonra düşünürəm ki, bizə heç kim kömək edə bilməyəcək. Başqa klublarda oyunuyla heyran edən futbolçu “Kocaelispor”da niyə belə zəif çıxış edir? Deyəsən, problem baş məşqçidədi”, “qalib gəldik, 3 xal aldıq, təbriklər! Nəticə var, amma oyun yoxdu. Sizi izləməkdən zövq almırıq. Ramillə bağlı ümidliydim, lakin görünür onun əsl oyununu izləyə bilmək üçün çox gözləməli olacam”.

Xatırladaq ki, 20 turdan sonra 39 xal toplayan "Kocaelispor" turnir cədvəlinin 3-cü pilləsindədi.

KƏNAN BAHADIR