Tur cümə günü “Ayntraxt”ın “Maynts-05” üzərində minimal hesablı qələbəsi ilə start götürdü. Frankfurtlular son 4 turda 12 mümkün xaldan 10-nu qazanıb.

"Football-plus.az" xəbər verir ki, şənbə günü keçirilən qarşılaşmalarda maraqlı nəticələr qeydə alındı. “Bavariya” “Auqsburq”la səfər derbisində böyük çətinliklə də olsa, hesabına 3 xal yazdı. “VVK Arena”dakı oyunlar adəti üzrə Münhen nəhəngi üçün çətin alınır. Təsadüfi deyil ki, son iki mövsümdə “Auqsburq” fanatları önündə güclü rəqibə xal verməmişdi. Meydan sahibləri bu matçda da ən azı uduzmaya bilərdilər. Amma Noyer öz səhvini düzəldərək penaltini dəf etməyi bacardı. Həmin an “rekordmayster” 3:1 öndə idi. Meydan sahiblərinin gücü yalnız son saniyələrdə fərqi minimuma endirməyə yetdi. “Verder”in sürpriz yüksəlişi davam edir. Ötən tur səfərdə “Bavariya”nı məğlub edən “musiqiçilər” bu dəfə avrokubokların daha bir iştirakçısı “Frayburq”u evə əliboş yola saldılar. “Verder” bundesliqada son məğlubiyyətini 13-cü turda “Ştutqart” səfərində yaşayıb. “Ştutqart”dan söz düşmüşkən, bu komanda turun ən parılaq qələbəsini qazandı. Həm şvabiyalılar, həm də “Leyptsiq” son 2 turu xalsız başa vurmuşdu. Amma “Ştutqart” fanatları önündə 5 qollu qələbə qazandısa, “öküzlər” növbəti məğlubiyyətlə barışmalı oldular. Kürdəsilli olduğu üçün Türkiyə yığmasında oynamaqdan imtina edən Dəniz Undav, nəhayət, Girassinin yoxluğunda liderliyi üzərinə götürərək 3 qol vurdu. 27 yaşlı hücumçu bu mövsüm bundesliqada vurduğu qolların sayını 12-yə çatdırdı. Girassinin də hesabında 17 qol olduğunu nəzərə alsaq, “Ştutqart” hazırda “böyük beşlik”də iki fərqli futbolçusu ikirəqəmli həddə çatan cəmi ikinci klubdu. Digər kollektiv isə “Atletiko”du (Morata 13, Qrizmann 11). Mövsümün əsas kəşfi “Bayer-04” qış fasiləsindən bəri müəyyən çətinliklər yaşayır. Xabi Alonsonun kollektivi əvvəlki iki turda qələbə qollarını yalnız 90-cı dəqiqədən sonra vurmuşdusa, bu dəfə Münhenqladbax “Borussiya”sının müqavimətini qırmaq mümkün olmadı. Baxmayaraq ki, leverkuzenlilər çox böyük üstünlüyə malik idi. Komanda hətta rəqibin cərimə meydançasında 69 dəfə topla oynamaqla 2004-cü ildən bəri turnirin ən yüksək göstəricisinə nail oldu. Amma “aspirinlər”in 4 oyunlıuq qələbə seriyası qırıldığı üçün zirvədə xal fərqi 2-yə endi!

Bazar günü meydan sahibləri üçün uğurlu alındı. 2024-cü ildə ilk dəfə qol vuran “Union” “Darmştadt”ı evə əliboş yola saldı. Qış fasiləsindən bəri əla oyun nümayiş etdirən Dortmund “Borussiya”nın budəfəki qurbanı isə “Bohum” oldu. Ardıcıl 3-cü qələbəni bayram edən “arılar” hələ ki bu təqvim ilində xal itirməyən yeganə komandadı. Bu qələbə ilə Edin Terziçin kollektivi həm də “Leyptsiq”i geridə qoyaraq 12-ci turdan bəri ilk dəfə “ÇL zonası”na daxil oldu!

19-cu tur
Auqsburq – Bavariya 2:3
Demiroviç, 52; 90+4-p. – Pavloviç, 23. Devis, 45+5. Keyn, 61. (30660)
Bavariya: Noyer, Gerreyro, Dayer, De Liqt, Devis, Pavloviç (Zvonarek, 90+7), Qoretska, Koman (Tel, 26), Musiala (Müller, 89), Sane (Çupo-Motinq, 89), Keyn.
Borussiya D – Bohum 3:1
Füllkruq, 7-p.; 72; 90+1 – Şlotterbek, 45-öz qapısına. (81365)
Borussiya: Mayer, Menye, Zyule, Şlotterbek, Maatsen, Zabitser, Salih Özcan, Sanço (Hummels, 83), Malen (Bayno-Gittens, 66), Mukoko (Reyna, 68), Füllkruq.
Bayer-04 – Borussiya M 0:0
(30000)
Bayer-04: Kovarj, Frimponq, Stanişiç, Andrix, İnkapye, Qrimaldo, Caka, Əmiri (Tella, 68), Hofmann (Hlojek, 84), Virts, Şik.
Ştutqart – Leyptsiq 5:2
Miyo, 25-p. Dəniz Undav, 30; 56; 75. Levelinq, 48 – Şeşko, 32. Openda, 55. (52100)
Leyptsiq: Blasvix, Simakan (Orban, 85), Klostermann, Lukeba, Raum, Baumqartner (Henrixs, 67), Şlager (Elmas, 77), Zayvald (Kampl, 67), Olmo (Poulsen, 77), Şeşko, Openda.
Verder – Frayburq 3:1
Dukş, 9-p. Njinma, 53. Malatini, 90+3 – Qrifo, 28-p. (41500)
Frayburq: Atubolu, Kübler (Salai, 71), Sildilliya, Ginter, Makenqo (Höfler, 71), Eqqeştayn, Röl (Filipp, 80), Vaysshaupt, Höler, Qrifo (Musliya, 86), Qreqoritş.
Ayntraxt F – Maynts-05 1:0
Götse, 72. (58000)
Ayntraxt: Trapp, Dina Ebimbe (Skiri, 77), Tuta, Kox, Paço, Nkunku (Maks, 90+3), Larsson, Götse (Rode, 81), Knauff (Buta, 90+2), Van De Beek (Çaibi, 46), Kalaydziç.
Volfsburq – Köln 1:1
Paredes, 40 – Alidu, 38. (24525)
Union – Darmştadt 1:0
Hollerbax, 62. (21786)
Hoffenhaym – Haydenhaym 1:1
Kramariç, 45+7 – Ərən Dinkçi, 29. (20120)
1. Bayer-04 19 15 4 0 50-14 49
2. Bavariya 19 15 2 2 56-18 47
3. Ştutqart 19 12 1 6 43-25 37
4. Borussiya D 19 10 6 3 40-26 36
5. Leyptsiq 19 10 3 6 42-26 33
6. Ayntraxt F 19 8 7 4 30-22 31
7. Frayburq 19 8 4 7 25-31 28
8. Hoffenhaym 19 7 4 8 35-37 25
9. Verder 19 6 5 8 28-32 23
10. Haydenhaym 19 6 5 8 28-35 23
11. Volfsburq 19 6 4 9 23-30 22
12. Borussiya M 19 5 6 8 35-38 21
13. Auqsburq 19 5 6 8 28-36 21
14. Bohum 19 4 8 7 21-37 20
15. Union 18 5 2 11 18-32 17
16. Köln 19 2 6 11 12-34 12
17. Maynts-05 18 1 8 9 14-30 11
18. Darmştadt 19 2 5 12 22-47 11
Bombardirlər: Keyn (Bavariya) – 23, Girassi (Ştutqart) – 17, Openda (Leyptsiq) – 13, Dəniz Undav (Ştutqart) – 12.
Növbəti turun oyunları fevralın 2-4-ü aralığında keçiriləcək: Haydenhaym – Borussiya D, Bohum – Auqsburq, Darmştadt - Bayer-04, Maynts-05 – Verder, Volfsburq – Hoffenhaym, Frayburq – Ştutqart, Bavariya - Borussiya M, Köln – Ayntraxt F, Leyptsiq – Union.

Turun rəqəmi
23 – Keyn qolları sıralamaqda davam edir. İngiltərə yığmasının kapitanı 240 dəqiqəlik susqunluğa son qoymaqla 19-cu turu 23 qolla tamamlamış oldu. Düzdü, Levandovski 2020/21-də 19 tura 24 dəfə fərqlənmişdi. Amma Keyn başqa diqqətçəkən göstəricilərə nail olub. O, Holannın rekordunu yeniləyərək turnirin tarixində 23 qol həddinə ən tez çatan futbolçu oldu. Norveçli bu qədər qolu 22 tura sığışdırmışdı. Bundan başqa, “Bavariya”nın tarixinə nəzər salsaq, görərik ki, ilk mövsümdə bundesliqada Keyndən daha çox qol vurmağı bacaran yalnız bir futbolçu var. İtaliyalı Luka Toni 2007/08-də 24 dəfə fərqlənmişdi. Amma qarşıda hələ 15 turun olduğunu nəzərə alsaq, Keynin bu rekordu yeniləyəcəyi şübhə doğurmur.

Turun ulduzu
Niklas Füllkruq (Borussiya D) – bu tur birdən-birə iki futbolçu het-trik etməyi bacardı. Böyük hesabla qalib gələn “Ştutqart”da Dəniz Undavdan da başqa qol vuranlar tapıldı. Dortumd təmsilçisi isə qələbəni yalnız Füllkruqun qolları ilə qazandı. Ötən mövsümün bombardiri yenə iş başındadı. Düzdü, bu təcrübəli forvardın məhsuldarlığı, məsələn, Keyn kimi göz oxşamır. 30 yaşlı futbolçunun hesabında bu mövsüm yalnız 9 qol var. Füllkruq bundesliqada 3-cü fərqli klubun heyətində het-trik etməyi bacardı. Daha öncə o, bu uğuru “Hannover-96” ilə “Verder”in heyətində yaşamışdı. Füllkruq XXI əsrdə Miroslav Kloze və Mario Qomesdən sonra bundesliqada 3 fərqli klubun heyətində het-trik edən 3-cü futbolçudu.

Turun sitatı
Manuel Noyer, “Bavariya”nın kapitanı: “Klopp “Bavariya”nı çalışdırmağa potensial namizədlərdən biridi. Hər şey onun özündən asılıdı. Düşünmürəm ki, “Bavariya”da kimsə ona qarşı olsun. Klopp güclü, tanınmış və təcrübəli mütəxəssisdi. Bir çoxlarının hörmətini qazanmağı bacarıb. Fikrimcə, o, “Liverpul”dan ayrılandan sonra bir müddət fasilə götürəcək. Sonra isə özü qərar verəcək. Klopp ya “Bavariya”nı, ya da Almaniya yığmasını rahatlıqla çalışdıra bilər”.