“Qalatasaray”da gözlənilən satış, nəhayət, gerçəkləşdi.

Şənbə günü Münhenə yollanan və tibbi müayinədən uğurla keçən Saşa Boe rəsmən “Bavariya”nın futbolçusuna çevrildi. Müqavilə 2028-ci il iyunun 30-na qədər nəzərdə tutulub. Fransalı müdafiəçinin illik məvacibi 3 milyon avro təşkil edəcək. Nassir Mazrauini Mərakeş yığmasının düşərgəsinə yollayan, Konrad Laymeri isə bir neçə həftəliyə itirən Münhen nəhəngi müdafiənin sağ cinahında yaranmış sıxıntını məhz Boe ilə yoluna qoydu. Əslində Boe “Bavariya”nın 3-cü seçimi idi. Sadəcə, Nordin Mukieleni PSJ-dən qoparmaq mümkün olmadı. Kiran Trippyeyə görə isə “Nyukasl”ın 15 milyon avro tələb etməsi münhenliləri qane etmədi. Komanda bu futbolçunun yaşının 33 olduğunu nəzərə alaraq, bu məbləği ödəmək istəmədi. Bu üzdən diqqətlər Boeyə yönəldi. Münhenlilərin 20 milyon avroluq birinci və 25 milyon avroluq ikinci təklifi geri çevirilsə də, 3-cü təklifdə anlaşmaq mümkün oldu. “Qalatasaray” “30+5” milyon avroluq təklifi qəbul etdi. 5 milyon avroluq bonusun qüvvəyə minməsi üçün Boe Fransa yığmasında oynamalı, “Bavariya”nın heyətində Çempionlar Liqasında forma geyməli və bundesliqa çempionluğunu qazanmalıdı.

Bundan başqa, müqavilədə daha bir detal diqqəti çəkir. “Bavariya” ilə “Qalatasaray” arasında iki hazırlıq matçı keçiriləcək. Tarixləri bəlli olmayan bu qarşılaşmaların hər birindən əldə olunan gəlirin 50 faizi İstanbul nəhənginə çatacaq. “Bavariya” oynamaqdan imtina etsə, hər hazırlıq matçına görə 1,5 milyon avro təzminat ödəməli olacaq. Onu da bildirək ki, Boe Türkiyə futbolu tarixində ən baha qiymətə satılan futbolçuya çevrildi! İndiyə qədər heç bir Türkiyə klubu satışdan 30 milyon avro əldə etməmişdi. Cenk Tosun “Everton”a 22,5 milyon avroya yollanmışdı. Arda Gülər bu yay “Real”a “20+10” milyon avroya yollanıb, yəni “Fənərbaxça” nəğd şəkildə 20 milyon avro qazanıb. Sonuncu rekord isə kağız üzərində Nikolo Zanyoloya məxsus idi. “Aston Villa” icarə haqqı olaraq “Qalatasaray”a 5 milyon avro ödəyib. Mövsümün sonuna qədər məcburi transfer şərti qarşılansa, ingilislər daha 22,5 milyon avro ödəyəcəklər.

Qeyd edək ki, “Qalatasaray” 23 yaşlı Boeni 2021-in iyulunda “Renn”dən cəmi 1,15 milyon avroya transfer etmişdi. İlk mövsümdə özünü göstərə bilməyən bu futbolçunun hətta göndərilməsi də gündəmdə idi. 2022-nin yayında Boe bir müddət əsas komandadan da kənarlaşdırılmışdı. Amma Omar Elabdellaui ilə Leo Dyubuanın zədələnməsi onun yolunu açdı. Okan Burukun diqqətini cəlb etməyi bacaran Boe, göründüyü kimi, cəmi ilyarım ərzində dünyanın ən güclü sağ cinah müdafiəçilərindən birinə çevrildi. O, Türkiyə karyerasına 83 rəsmi oyun, 4 qol və bir çempionluq sığışdırdı. Onu da bildirək ki, “Qalatasaray”ın planlarına daxil olmayan və “Leyptsiq”ə göndərilən Anxelinyo İtaliyaya yollanıb. Bu futbolçunun “Roma”ya transfer olunacağı gözlənilir.