“Sözümün arxasındayam” - Vaqif Sadıqov Qurban Qurbanovun sözlərini necə qarşıladı?
Ölkəmizin əsas yığmasının “başsız” günləri bir-birini izləyir.
Əlbəttə, baş məşqçinin yoxluğu həm yığmanın seleksiyaçılarına problem yaradır, həm də əlavə söz-söhbətə səbəb olur. Bunun fonunda sözügedən posta uyğun namizədlərin seçilməsi məqsədi ilə yaradılan İşçi Qrup sanki faəliyyətini dondurub. Qısa müddətdə iki iclas keçirən üzvlər üçüncü dəfə toplaşmayıb. Gözümüzün kökü saraldı axı... Nə qədər gözləyəcəyik?
Hansısa yeniliyin olub-olmadığını öyrənmək üçün AFFA İcraiyyə Komitəsinin üzvü Vaqif Sadıqovla əlaqə saxladıq. Onun “Football-plus.az”a söylədikləri:
“Hələ ki üçüncü iclas olmayıb. Nə vaxt olacağı da bəlli deyil. Əvvəl də dediyim kimi, mən bütün fikirlərimi dilə gətirmişəm. Əlavə təklifim olduğu halda, yenə danışacam. Siz demişkən, səs-soraq yoxdu. Yenilik olduğu halda ictimaiyyətə məlumat veriləcək”.
Qurban Qurbanovun İTV-yə müsahibəsindən artıq bütün ölkə xəbərdardı. “Qarabağ”ın baş məşqçisi bir çox məqama aydınlıq gətirdi, milli komandamızla bağlı da danışdı. Diqqətçəkən fikirlərdən biri də “eşitdiyimə görə, yığmaya əcnəbi baş məşqçi gətiriləcək” sözləri idi. Vaqif bəydən bu haqda soruşmağı da lazım bildik:
“Geniş danışmayacağam. Mənim bu haqda informasiyam yoxdu. Özümə gəlincə, sözümün arxasındayam. Mən həmişə demişəm ki, yığmamızı yerli baş məşqçi çalışdırmalıdı”.
KƏNAN BAHADIR
Digər xəbərlər
