Noyabrın 22-də keçirilən AFFA İcraiyyə Komitəsinin fövqəladə iclasının iki qərarından biri yığmanın baş məşqçisi Canni de Byazini yola salmaq, o biri isə baş məşqçi postunun yeni sahibini müəyyənləşdirmək üçün İşçi Qrupun yaradılması oldu.

Dünən bu iclasın üzərindən düz bir ay keçdi. Sirr deyil ki, son bir ay ərzində ölkədə müzakirələr əsasən “yeni çalışdırıcı yerli, yoxsa əcnəbi olsun” yönündə gedib. Əlbəttə, hər iki mövqenin müdafiəçilərinin özünə görə dəlilləri var. Baxmayaraq ki, böyük əksəriyyət məhz yeni baş məşqçinin, özəlliklə də Qurban Qurbanovun təyinatını vacib sayır. Amma nədənsə AFFA divarları arasında əcnəbi variantını dəstəkləyənlər çoxdu.

Bir qədər də dəqiqləşdirək: ölkə futboluna son 15 ildə qazandırdığı uğurlara görə bu gün yığmanın “sükanı arxasına” keçməyə əsas namizəd Qurban bəydi. Əslində onun qeyri-adi bir tələbi də yoxdu. Sadəcə, əcnəbilərə səxavətlə verilən zaman kəsiyini, bir də “Qarabağ”da gördüyü etimad mühitini istəyir. Yəni Qurbanov “Qarabağ”da olduğu kimi, yığmada da bütün məsələlərdə əsas söz sahibi olmaq istəyir. Adam bu yolun sonunda uğur qazanacağını vəd edirsə, niyə ona bu şərait yaradılmamalıdı? Vallah-billah, heç cür anlaşılmır!

AFFA-dan gələn əsas mesajlar o yöndədi ki, heç bir yerli məşqçinin klubdakı işinə toxunmaq olmaz, amandı, dünya dağılar. Yerliləri tərpətmək istəmirlərsə, təbii ki, yola əcnəbi ilə davam edəcəklər. Bu ki 2+2-di. Çox güman, daha bir neçə il boşa veriləcək, çox güman, yenə dərdlərimizlə baş-başa qalacağıq. Və onda bir daha Qurban Qurbanov yada düşəcək.

Hər halda, dekabrın 26-nı gözləyək. Deyilənə görə, Elşad Nəsirovun rəhbərlik etdiyi İşçi Qrupun növbəti iclası – özü də onlayn qaydada! – məhz həmin gün keçiriləcək. Allah futbol ailəsini sürprizin betərindən qorusun!

ORXAN