AFFA Nikolay Adama zəng etdi, “gözləyin” cavabı aldı - YENİ NAMİZƏD
Ölkəmizin əsas yığmasının baş məşqçisiz günləri davam edir.
AFFA-nın bu post üçün namizədlərin müəyyənləşdirilməsi məqsədi ilə yaratdığı İşçi Qrupdan da səs-soraq yoxdu. Görünür, bayram əhval-ruhiyyəsi hələ də futbolumuzun gələcəyinə məsul şəxslərin ruhunu tərk etməyib. Xatırladaq ki, İşçi Qrup indiyə qədər iki iclas keçirib. Son məlumatlara görə, bu toplantılarda namizədlər üçün meyarlar müəyyənləşdirilib. Üçüncü iclasda isə üzv olmayan mütəxəssislərin təcrübəsinə müraciət ediləcəyini yazmışdıq. Bəs bu addım nə vaxt atılacaq? Ümumiyyətlə, növbəti toplantının nə vaxt keçirilməsi nəzərdə tutulub?
Bu suallarla AFFA İcraiyyə Komitəsinin və İşçi Qrupun üzvü Vaqif Sadıqova müraciət etdik. O, "football-plus.az"a açıqlamasında hələ ki hansısa yeniliyin olmadığını dedi:
“Üçüncü iclasımızın nə vaxt keçiriləcəyi bəlli deyil. Güman edirəm ki, bu yaxınlarda yenidən toplaşarıq. Gəncə Futbol Akademiyasının açılışından sonra elə həmin şəhərdə bir araya gəlib müzakirə aparmağı planlaşdırmışdıq. Lakin alınmadı. Onu da deyim ki, mən əsas fikirlərimi ilk iki toplantıda bölüşmüşəm”.
Beləliklə, hadisələrin axarının donduğunu deyə bilərik. Amma məhz İşçi Qrup səviyyəsində... Çünki baş məşqçini müəyyənləşdirməklə bağlı atılan addımlar rəsmi şəkildə açıqlanmasa da, arxa planda bəzi işlər görülür. Bəlkə də bunun nəticəsidi ki, bu günə qədər bir neçə məşqçi AFFA-dan təklif aldığını və düşündüyünü, bəziləri isə birbaşa razılaşmadığını bildirib. Kaxaber Sxadadze, Kurban Berdıyev, İlhan Palut, Vladimir Vayss, Şenol Günəş, Fabio Kannavaro, Milan Obradoviç kimi mütəxəssislər məhz bu qəbildəndi.
Redaksiyamıza daxil olan məlumata görə, siyahı genişlənməkdədi. Çünki futbol qurumu bir neçə gün öncə Nikolay Adamla da danışıqlara başlayıb. Mütəxəssisə zəng edən AFFA rəsmisi onun xidmətində maraqlı olduğunu deməklə yanaşı, razı olmadığı təqdirdə başqa namizədlərlə bağlı təkliflərinə açıq olduğunu diqqətə çatdırıb. Adam isə bu barədə ətraflı düşünmək üçün vaxta ehtiyacı olduğunu bildirib. Həmçinin, o, ABŞ-ın Koliforniya ştatında keçirilən “Convention Anaheim, 24” konqresi çərçivəsində futbolun inkişafı mövzusunda seminarlar keçdiyini və yanvarın 14-dən sonra bu mövzuya zaman ayıra biləcəyini deyib.
Qeyd edək ki, sözügedən mütəxəssis U-15, U-16, U-17 və U-19 millilərimizin sabiq baş məşqçisi və AFFA Təhsil Şöbəsinin sabiq rəhbəridi. Həmçinin 19 yaşadək futbolçulardan ibarət yığmamız 2015-ci ildə onun rəhbərliyi altında AÇ-nin elit mərhələsinə yüksəldib. Adam hazırda Frankfurt “Ayntraxt”ında beynəlxalq əlaqələr üzrə idman direktoru və seleksiya qrupunun rəhbəri vəzifəsində çalışır.
KƏNAN BAHADIR
Digər xəbərlər
