Deməli, 2018-də “Barselona” “Liverpul”la dueldə 3:0 hesablı üstünlüyü əldən verəndən sonra artıq klub struktur olaraq çökmüşdü.

Ondan bəri “Barselona” artıq klub yox, sadəcə, komanda oldu, indi də belədi. Klubun strukturu, düzəni, A-dan Z-yə qədər klubdakıların verdiyi açıqlamaların məntiqi, transferlərin izahı, konkret tələblər və s. və i.a. olmalıdı. Təəssüf ki, hazırda “Barselona”da bunlar yoxdu. Klub çevrilib tam komandaya, idarəçilik və idarəetmə prosesləri çox dar çərçivədə həyata keçirilir. Nəticə onu göstərir ki, bu sistemi düzəltmək üçün Xuan Laportanın hakimiyyətə qayıtması yetərli deyilmiş. Laporta artıq yaş getdikcə populizmdən (eyni zamanda ağır çəkidən) əziyyət çəkir. 2021-ci ildə dediyi “biz klubu iflasdan xilas etdik” kimi ifadələr, sadəcə, biabırçılıq idi, fanat ordusunun ağzını bağlamaq üçün nəzərdə tutulmuşdu. Hazırda “Barsa”nın bütün dünyadakı (o cümlədən Azərbaycandakı) fanklub səhifələri məhz Laportanın pafosunu, populizmini təbliğ edir, klubda hər şey qaydasında imiş kimi göstərir.

Eyni zamanda, Xavinin gəlişinin ilk günündə dediyim fikirdə qalıram – o “Barsa” məşqçisi olmamalıydı. Elə “Barsa”ya gəldiyi ilk gün Azərbaycandakı rəsmi fanat səhifəsinin “Xavi üçün bir önəri versəydiz, bu nə olardı?” sualına “dərhal istefa verməyi” cavabını yazmışdım. Zaman göstərir ki, Xavi yaxşı məşqçi deyil və ya ola bilməyib (düşünürəm ki, heç vaxt da ola bolməyəcək).

Əslində Xavinin gətirilməsi özü belə rəhbərliyin “Barsa”nın klub halından komanda halına transformasiyasını boynuna alması idi. Səudiyyə Ərəbistanının çempionatında nə gözəl oyun üslubu, nə də normal nəticə göstərə bilməyən bir çavuşu klubun başına gətirib “ona hələ zaman lazımdır, gəncdi” demək, sadəcə, abırsızlıqdır. “Barsa” bəyəm kimin üçünsə karantin idi, gəlib təcrübə keçsin? Təbii ki, deyildi. Amma elədilər.

Xaviyə gəlincə, bütün açıqlamalar (“Real”ın oyunlarındakı hakimlik olayları da daxil) birbaşa Laportagilin ağzı ilə deyilir. Heyəti günahlandırmaq çox yersiz və abırsız hərəkətdi. 3-cü divizion klubu belə 90 dəqiqə ərzində bir məntiqli hücum qura bilir. Amma Xavinin komandası fərdi nəticələr xaric heç bir oyunda yaxşı, məntiqli, düşüncəli hücum qura, rəqibi əzə bilməyib. Bu da birbaşa baş məşqçinin günahıdı. Uduzmaq, xal itirmək problem deyil. Amma keyfiyyətli oyun yoxdu. Bu heyət məgər “Atletik”in heyətindən zəifdi? Qətiyyən yox. Hətta iki-üç dəfə güclüdü.

Xavini, sadəcə, qovmaq lazımdı. Klubun əfsanəsi özünü bu hala salmamalıydı. Bizim “Barsa” sevdamız ölməyəcək. “Barsa” böyük klub vəziyyətinə qayıdacaq, ömrümüzdən illər keçsə də. Amma bu prosesi tezləşdirmək, ya normalca çalışmaq, ya da klubu satışa çıxarmaq, pulu olan ərəblərə satmaq lazımdı. Amma inanmıram ki, “Mes que un club” deyən katalon xalqı bunu qəbul edə.

ŞƏFİ ŞƏFİYEV