Bu gün keçirilən iki oyunla Misli premyer-liqasında 19-cu tura yekun vurulub. Beləliklə, bütün elita iştirakçıları ilin ilk rəsmi matçlarını geridə qoyub.

"Football-plus.az" xəbər verir ki, "CBC Sport" bu oyunları da canlı yayınlanıb.

23 yanvar
Misli premyer-liqası
3-cü dövrə, 19-cu tur
Qəbələ - Sumqayıt 0:1
Kasimir Ninqa, 74
"Qəbələ"nin bu rəqiblə ev oyunlarının balansı: 23:+16=5-2, 40:15.
2011/12 - 3:1; 2012/13 - 4:1; 2013/14 - 2:0, 3:1; 2014/15 - 3:1, 2:0; 2015/16 - 1:0, 1:0; 2016/17 - 2:0, 1:1; 2017/18 - 1:0, 1:1; 2018/19 - 1:1, 1:0; 2019/20 - 0:2, 5:0; 2020/21 - 1:1, 1:0; 2021/22 - 2:1, 1:1; 2022/23 - 1:0, 2:1; 2023-24 - 1:2.
Cəzalılar: Samuel Tetteh, Rauf Hüseynli (hər ikisi "Qəbələ").
"Futbol+"in proqnozu: 40-30-30.
Hakimlər: KAMAL UMUDLU, Vüsal Məmmədov, Zöhrab Abbasov, İslam Məmmədov.
Hakim-inspektor: Vüsal Əliyev.
AFFA nümayəndəsi: Yavər Rəhimov.
Qəbələ, şəhər stadionu. Saat 16.30.

Elmar Baxşıyevin yetirmələri tarixinin ən təhlükəli mövsümlərindən birini yaşayır. Kasad büdcə fonunda heyət formalaşdıran klub geridə qalan 18 tur ərzində ciddi uğurla yadda qalmayıb. Odu ki, turnir cədvəlinin sonuncu pilləsindədi. “Adımızda qələbə var” deviziylə özündən söz etdirən komanda qələbənin dadını unudub. Əyalət təmsilçisinin qış fasiləsindən məhsuldar yararlandığını demək də doğru deyil. “Qəbələ” iki yoxlama oyunu keçirib və “Kəpəz”ə məğlub olubsa (1:2), “Araz-Naxçıvan”ı yenib (2:0). “Qırmızı-qaralar” “transfer pəncərəsi” zamanı Klesio Baukla güclənib, Omar Hani isə yola salınıb. Komandanın var gücüylə məhz bu matça hazırlaşdığı bəllidi. Ciddi zədə üzündən mövsümün ilk yarısını buraxan Feras Abu Akal heyətə qoşulub. “Sumqayıt”ın 2023/24 “futbol ili” üçün ümumi mənzərəsi isə əvvəlki mövsümlərə nisbətən daha yaxşıdı. Samir Abasov bu dəfə güclü kollektiv formalaşdırmağı bacarıb. Əlbəttə, müəyyən boşluqlar var. Maraqlıdı ki, “kimyaçılar” qış “tranfser pəncərəsi”ndən faydala bilməyib. Əslində bir neçə legionerlə danışıq aparılırdı. Amma son anda bəzi anlaşmazlıqlar ortaya çıxıb ki, bunu klub prezidenti Riad Rəfiyev də etiraf edib. Mövsümün ikinci yarısına Antalyada hazırlaşan “gənclik şəhəri” təmsilçisi iki yoxlama oyununda qüvvəsini sınayıb. Rumıniya “Hermanştadt”ına məğlub olan kollektiv (0:3), Özbəkistan “Soqdiana”sına qalib gəlib (3:1). Beləliklə, Samir Abasovun yetirmələri bundan sonrada uğurlu çıxış etməyə çalışacaq. “Qəbələ”ni premyer-liqada qalmaq uğrunda gərgin mübarizə gözləyirsə, “Sumqayıt” “futbol ili”ni ilk “4-lük”də bitirmək niyyətindədir.
Bu komandalar indiyə qədər 45 oyunda üz-üzə gəlib. Bunların 25-dən “Qəbələ”, 6-dan “Sumqayıt” qalib ayrılıb. 14 matçda hərəyə bir xal düşüb. Statistika “Qəbələ”nin favorit olduğunu desə də, reallığa meydanda şahidlik edəcəyik. Topların nisbətində də “qırmızı-qaralar” öndədi – 71:35.

Qarabağ - Araz Naxçıvan 3:1
Neman Kurdiç, 7 (ö.q.), Abdullah Zubir, 22, 61 - Muhammed Kadiri, 71
"Qarabağ"ın bu rəqiblə ev oyunlarının balansı: 3:+3=0-0, 6:1.
2000/01 - 1:0; 2001/02 - 3:0; 2023/24 - 2:1.
Cəzalı: Melo Vanderson (Araz-Naxçıvan).
"Futbol+"in proqnozu: 40-30-30.
Hakimlər: RAUF ALLAHVERDİYEV, Namiq Hüseynov, Pərvin Talıbov, Kamran Əliyev.
Hakim-inspektor: Barış Şimşək.
AFFA nümayəndəsi: Məmmədəli Məmmədov.
Bakı, Tofiq Bəhramov adına Respublika stadionu. Saat 19.00.

“Qarabağ” birdən-birə üç cəbhədə inamla mübarizə aparır. Qurban Qurbanovun yetirmələri premyer-liqa və kubokda yaxşı nəticələr qazanmaqla yanaşı, Avropa Liqasında bacardıqca irəli getməyə çalışacaq. Düzdü, çoxu Ağdam təmsilçisini artıq çempion kimi görür. Bu, təbiidi, çünki komanda ən yaxın izləyici “Zirə”ni belə xeyli qabaqlayır. Əslində komandanın heyətlə bağlı problemləri də var. Rahil Məmmədov “Qarabağ”dan gedibsə, Kevin Medina və Marko Yankoviç zədə üzündən bir müddət Qurbanova kömək edə bilməyəcək. Üstəlik Leandro Andrade ilə yolların ayrılması da gündəmdədi. “Sabah”dan transfer edilən Aleksey İsayevin işə nə dərəcədə yarayacağı da maraq doğurur. Amma “köhlən atlar”ın geniş heyətə malik olduğunu nəzərə alsaq, sadaladıqlarımızın ciddi çatışmazlığa yol açmayacağını iddia etmək olar.
“Araz-Naxçıvan”ın durumu qənaətbəxşdi. Baş məşqçi Azər Bağırovun açıqlamalarından anlaşılır ki, komanda Konfrans Liqasına vəsiqə qazanmaq iddiasının arxasınca gedəcək. Qış fasiləsində Bakıda qalan komanda iki yoxlama görüşündə meydana çıxıb. Muxtar Respublika təmsilçisi həm “Zİrə”yə, həm də “Qəbələ”yə uduzub (1:2, 0:2). “Sabah”dan İldar Alekperovu icarəyə götürən “qırmızı-ağlar” Bayraməli Qurbanovu “Difai Ağsu”ya, Nihat Qurbanlını MOİK-ə icarəyə verib. Heyətdə başqa hansı dəyişikliklərin olacağına qarşıdakı günlərdə şahidlik edəcəyik. Hər halda, naxçıvanlıların bəzi futbolçularla danışıq apardığı haqda məlumatlar var. Komandanın zədəlisi İsmail Azzazuidi ki, o, bu matçda “Qarabağ”a qarşı çıxış edə bilməyəcək.
Ümumiyyətlə, bu komandalar indiyə qədər 6 dəfə qaşrılaşıb. Bunların 3-də “Qarabağ”, 3-də “Araz-Naxçıvan” rəqibini yenib. Statistika bir tərəfə, təbii ki, ağdamlılar aşkar favoritdi. Topların nisbətində də onlar öndədi – 10:8.

1. Qarabağ 19 14 2 3 48-15 44
2. Zirə 19 8 6 5 13-10 30
3. Sumqayıt 19 8 6 5 20-23 30
4. Neftçi 19 8 5 6 21-17 29
5. Səbail 19 7 6 6 26-27 27
6. Araz-Naxçıvan 19 7 5 7 21-22 26
7. Sabah 19 6 5 8 25-22 23
8. Turan Tovuz 19 6 4 9 30-30 22
9. Kəpəz 19 4 5 10 13-30 17
10. Qəbələ 19 4 2 13 12-33 14

Bombardirlər: Olavio Juninyo (Qarabağ) – 13, Aleksandr Ramalinqom (Səbail) – 7.

KƏNAN BAHADIR