"Təbii ki, həmyerlimə və komanda yoldaşıma qarşıdakı turnirdə uğurlar arzulayıram! Ümidvaram bizi möhtəşəm çıxışı ilə sevindirəcək. Peşəkar fikrimə gəlincə, o qədər də nikbin deyiləm. Yarışda yaxşıların yaxşıları iştirak edir. Nicatdan savayı hər biri yetərincə super turnirlərdə iştirak edib, təcrübəlidilər. Aydın məsələdi ki, belə yarışda təcrübə ən önəmli amildi. Nicatın yeganə üstünlüyü ondadı ki, digər iştirakçılar ondan maksimum xal əldə etməyə cəhd edəcək, yəni riskə getmə ehtimalları yüksəkdir. Nicat həmin risklərdən öz xeyirinə istifadə edə bilsə, uğurlu sonluqla bizi sevindirə bilər. Məncə, Nicat üzərinə vəzifə götürməməlidi. Sadəcə, yaxşıca hazırlaşmalı, bu fürsətdən maksimum zövq almalıdı. Belədə yaxşı nəticə ehtimalı yüksələr. Şəxsən mənim Nicatın necə bir komanda ilə çalışıdığı barədə məlumatım yoxdu. Ona necə xoşdusa, elə də etməlidi. Mən böyük fərq görmürəm. AŞF-nin üzərinə isə əsasə maliyyə dəstəyi vermək düşür".

"Nicat reytinqə görə turirdə sonuncudu. Çox yüksək səviyyəli yarışdı. Bir qədər çətin olacaq. Lakin Dünya kubokunda da çoxları Nicatdan belə oyun gözləmirdi, Abasov həmin yarışda partlayış etdi, gözlənilməz qələbələr qazanaraq yarımfinala yüksəldi. Orda uduzandan sonra hazırda dünya şahmatının liderlərindən olan Fabiano Karuana üzərində çox gözəl qələbə qazandı. Nicat yetərincə yetişmiş şahmatçıdı. Yenə də bizi partlayışla təəccübləndirə bilər. Düzdü, belə böyük turnirlərdə iştirakçı olmayıb. Nicatı çoxdan tanıyıram, bir çox turnirlərdə möhtəşəm təcrübəsi var. Səhv etmirəmsə, 20 ildən artıqdı şahmatdadı. Onun təcrübəsinin əskik olması düzgün anlayış deyil. Şanslara gəlincə, turnirin favoritləri var. Nicat şahmat formasını daha yüksək səviyyədə qaldırmaq üçün nəyin lazım olduğunu özü daha yaxşı bilir. Sadəcə, mən demək istəyərdim ki, bu barədə artıq təcrübəli məşqçilərin yazdığı bəlli proqramlar var. Azərbaycandan Şəhriyar Məmmədyarovla Teymur Rəcəbov bu turnirdə iştirak edib. Nicatın komanda yoldaşları həmişə ona dəstək ola bilərlər. İnanıram ki, onlardan kimsə Nicatın komandasında iştirak edəcək. Yardım edəcəklər ki, maksimum dərəcədə güclü formaya malik olsun. Bildiyimə görə, AŞF Nicata böyük dəstək verir. Komandanın formalaşması üçün ən vacib olan maliyyə məsələsidi. Hər şey ora bağlanır. İnanıram ki, AŞF, Gənclər və İdman Nazirliyi, ümumiyyətlə, ölkəmizdə idmana olan münasibət, qayğı nəticəsində Nicat ətrafında çox gözəl komanda yaranacaq".