Səudiyyə Ərəbistanı çempionatında sentyabrın ən yaxşı oyunçusu müəyyənləşib.

"Football-plus.az" xəbər verir ki, bu nominasiyada Kriştiano Ronaldo qalib gəlib. “Əl-Nəssr”in hücumçusu azarkeşlər arasında keçirilən sorğuda qalib gəlib.

Qeyd edək ki, 38 yaşlı hücumçu Ronaldo ölkə çempionatında ötən ay ərzində meydana çıxdığı 4 matçda 5 qol vurmuş və 3 məhsuldar ötürmə vermişdi. Əlavə edək ki, Ronaldo avqustun da ən yaxşı oyunçusu seçilmişdi.

Yeri gəlmişkən, ulduz futbolçuya qarşı yeni iddia irəli sürülüb. “Sky News”un məlumatına görə, onu bir müddət əvvəl cinsi təcavüzdə günahlandıran ABŞ vətəndaşı Ketrin Mayorqa bu dəfə də eyni mövzuda yeni iddia qaldırıb. Məlumatda qızın əvvəlki iddiasının oğurlanmış məxfi sənədlərdən istifadə edildiyi üçün ABŞ-nin dairə hakimi tərəfindən rədd edildiyi bildirilib. Mayorqanın nümayəndələri hazırda ABŞ Apellyasiya Məhkəməsinin işin rədd edilməsi ilə bağlı qərarın ləğvi və müştərilərinin 2018-ci ildə ilk dəfə qaldırdığı mülki iddianın bərpası üçün çalışırlar.

Xatırladaq ki, Ketrin 2018-ci ildə portuqaliyalı futbolçunun Las Veqasda ona təcavüz etdiyini ictimaiyyətə açıqlamış və ondan məhkəməyə şikayət etmişdi. Mayorqanın iddiasına görə, hadisə 2009-cu ildə baş verib, bundan sonra Ronaldo ona susması üçün 375 min dollar verib. Amma Kriştiano bu ittihamları rədd etmişdi.