2021-ci ilin mayında Joze Mourinyo “Roma”nın baş məşqçi postuna təyin olunmaqla (bütün insayderlər klubun Mauritsio Sarri ilə danışıq apardığını xəbər verdiyi məqamda portuqaliyalı müqavilə imzaladı) transfer bazarını partlatdı.

"Football-plus.az" xəbər verir ki, elə eyni dərəcədə gözlənilməz şəkildə istefaya göndərildi. Təxminən bir ay əvvəl “Roma”nın bossları müddəti iyunda bitəcək müqaviləni yeniləməklə bağlı təklif hazırlamışdısa, srağagün məşqçi korpusu ilə tam tərkibdə vidalaşdı. Xatırladaq ki, paytaxt təmsilçisi 20 turdan sonra 29 xalla 9-cu pillədə qərarlaşıb, yanvarın 14-də keçirdiyi son oyunda səfərdə “Milan”a 1:3 uduzub.

...Mourinyo üçün son 2,5 il İtaliyanın ən stressli, titul acı olan, fanatların və medianın amansız təzyiqi hiss edən klubunda heç də asan keçmədi. Ondan hələ də Harri Potter kimi möcüzələr gözləyirlər. Bir tərəfdən məhz portuqaliyalının dönəmində “canavarlar” Konfrans Liqasını qazandı, Avropa Liqasının finalında oynadı. Heyətdə bəzi superulduzlar var ki, “sükan arxasında” Mourinyo yox, bir başqası olsaydı, çətin ki, “Roma”nı seçərdilər. Lukaku və Dibalanın transferləri hələ də danışıqlarda iştirak edən, daha böyük ambisiyalara və potensiala malik futbolçuları bəzən çox sürpriz qərarlar verməyə məcbur edən Jozenin fərdi inandırıcılıq bacarığının məhsuludu.

Digər tərəfdən, Joze bu müddətdə iki dəfə 2-ci yeri tutub, indi də ən azı Çempionlar Liqası zonası uğrunda oynamalı olan heyətlə 9-cu pillədə qərarlaşıb. Bu heyətin maksimumu isə çempionluğa can atmaqdı. Ortada heç nə yoxdu – heç portuqaliyalının gedişindən sonra vəziyyətin düzələcəyinə inam da. Lukaku ilə Dibala qalmayacaq, yeni ulduzlar gəlməyəcək. Komanda mövsümü De Rossi ilə bitirməli olacaq. Kapitan kimi romalılar üçün büt olan, ancaq məşqçi kimi SPAL-da heç yarım mövsüm də davam gətirməyən adamla. Məgər o, Mourinyo ilə müqayisədə yaxşıdı? Heç inandırıcı deyil!
Joze daim belə təzadların hədəfi olub. “Mançester Yunayted”dən gedəndən sonra onu top-məşqçilər siyahısından silmişdilər, ancaq indi deyirlər ki, bu klub üçün Ferqyusondan sonra ən yaxşı imiş. “Tottenhem”dəki fiasko da göz önündədi, ancaq portuqaliyalı həmin qovulma durumuna da ideal izah tapıb: “Qənimət otağı boş olan klub finala iki gün qalmış məni qovdu. Möcüzədi”.

“Roma”ya münasibətdə də dəmir kimi dəlillər hazırdı: komanda son 61 ildə ilk dəfə avrokubokda qələbə qazanıb, Avropa Liqasında finala yüksəlib ki, bunlar “canavarlar” üçün real uğurlardı. Bu başqa məsələ ki, indi “Roma” rəhbərliyində bu dəlilləri dinləmək istəyən yoxdu.
Mourinyo Bobbi Robsonun yardımçısı statusundan “Portu”, “İnter” və “Çelsi”nin bütü, həmçinin Qvardiolanın əsas rəqibi səviyyəsinə yüksəlməklə yüksək sürətlə futbol elitasına daxil oldu. Ancaq göydən yerə də qəfil endi. Londona dönüş, “Mançester Yunayted”, “Tottenhem”... Çox güman, “Roma” onun karyerasında Avropadakı son böyük klubdu.

Jozenin futbolu hələ də “işləyir”, ancaq top-çempionatları inkişaf etdirən və dağıdan müasir məşqçilərin fonunda çox “qocalıb”. Və portuqaliyalı özü də bunu yaxşı anlayır. Mourinyo ötən ilin noyabrında belə demişdi: “Gec-tez Səudiyyə Ərəbistanına yollanacam. Orda komanda çalışdıracağıma əminəm. Bu ölkənin çempionatının qapısı mənim üzümə açıqdı, liqanın inkişafında şəxsən iştirak etmək istəyirəm. Konkret hara gedəcəyimi bilmirəm – çətin ki, bu gün və ya sabah, amma bu baş verəcək”.

Çox güman, Joze “bu gün və ya sabah” məqamının cəmi ayyarım sonra aktual olacağını düşünmürdü. Ancaq belə görünür ki, başqa yol yoxdu. Avropada portuqaliyalının maliyyə tələblərini qarşılaya biləcək klub görünmür. Bəlkə də Səudiyyə Ərəbistanına yollanmağın tam vaxtıdı.

Yeni baş məşqçidən açıqlama
Mourinyo qovulandan az sonra Daniele De Rossi “Roma”nın “sükanı arxasına” keçdi. Romalıların sabiq yarımmüdafiəçisi 2024-ün yayına qədər müqavilə bağlayıb: “Ehtiyat oyunçular skamyasında otura bilməyin doğurduğu emosiyaları təsvir etmək çətindi. Hamı “Roma”nın mənim üçün hansı məna daşıdığını bilir. Nə vaxtımız var, nə də seçimimiz: rəqabətədavamlı olmaq, hədəflərimiz uğrunda mübarizə aparmaq və onlara çatmaq lazımdı”.
40 yaşlı De Rossi 2002-19 aralığında “Roma”nın şərəfini qoruyub, bu komanda ilə ölkə kubokunun ikiqat qalibi olub, ölkə superkubokunu qazanıb. 2020-də futbolçu karyerasını bitirəndən sonra İtaliya yığmasının baş məşqçisi Roberto Mançiniyə yardım edib, 2022-nin oktyabrından ötən ilin fevralına qədər SPAL-da çalışıb.

Yeri gəlmişkən...
Mourinyo “canavarlar”ın azarkeşləri ilə vidalaşarkən göz yaşını saxlaya bilməyib. Portiqaliyalı klub bazasını tərk edərkən azarkeşlər onun maşınının qarşısını kəsib. Onlar Mourinyoya minnətdarlıq etməyə çalışıb. Joze həmin anlarda kövrəlib və göz yaşı axıdıb.

Klubun sahibləri Den və Rayan Fridkinlərin vida sözü
Kluba gəldiyi andan göstərdiyi ehtirasa və işə sadiqliyə görə Jozeyə təşəkkür edirik. Onun işi ilə bağlı gözəl xatirələrimiz var. Ancaq belə hesab edirik ki, klubun maraqları naminə təcili dəyişikliklər lazımdı. Jozeyə və onun məşqçi korpusuna gələcəkdə hər şeyin ən yaxşısını arzulayırıq.

Münasibət
Fabio Kapello: "Mourinyonu telefon zəngi ilə azad ediblər. Bu hörmətsizlik əlamətidi. Joze nəinki Avropa, dünya futbolunda sözünü deyən mütəxəssislərdəndi. Rusiya yığmasında işləyərkən belə hadisə başıma gəlib. Avstriyaya uduzandan sonra hava limanına gedərkən zəng etdilər və hər şeyin bitdiyini bildirdilər. Məncə, belə vəziyyətlərdə klub sahibləri ilə məşqçilər arasında fərqli münasibət olmalıdı".