Səudiyyə Ərəbistanı çempionatı ötən yay transfer bazarını partlatdı.

"Football-plus.az" xəbər verir ki, ora yollanan yaşlı və gənc ulduzların sayı-hesabı yox idi. Kriştiano Ronaldo – bu prosesin aparıcı fiquru tez uyğunlaşsa da, qalanları müəyyən problemlərlə üzləşdi. Ancaq ərəblər özləri də bu qış yaydakı qədər pul xərcləyə bilməyəcəklər.

“As” qəzetinin yaydığı xəbərə görə, ölkənin dörd aparıcı klubunu (“Əl-Hilal”, “Əl-Nəssr”, “Əl-İttihad”, “Əl-Əhli”) maliyyələşdirən Səudiyyə Ərəbistanının Suveren fondu transferlərə limit qoyub. Bu fondun dəstəyi olmadan klublar böyük sövdələşmələr həyata keçirə bilməz. Hər klub yanvarda heyətini gücləndirib-gücləndirməyəcəyinə özü qərar verəcək, ancaq istənilən sövdələşmə bəzi sərt tələblərə uyğun olmalıdı.

Səudiyyə Ərəbistanından olan komandalar 2023-cü ilin yayında yeni futbolçuların tranferinə 875,4 milyon dollar xərclədi. Bu isə dünyada ikinci göstəricidi. İndi birdən-birə üç məşhur futbolçu bu ölkədən qaçmaq istəyir.

Cordan Henderson
Henderson heç cür sona qədər Səudiyyə Ərəbistanındakı həyata uyğunlaşa bilmədi – iqlim və yüksək rütubət şəraitində, isti havada keçirilən oyunlar üzündən. Daha bir dəlil isə “Əl-İttifaq”ın oyunlarının yetərincə geniş auditoriya toplaya bilməməsidi. Bu komandanın ev oyunlarını keçirdiyi stadion 35 min yerlik olsa da, tribunalara 8 mindən artıq azarkeş toplaşmır. Cordan Səudiyyə Ərəbistanına köçəndən sonra vətənində ünvanına yağan tənqidlər də bir başqa səbəbdi. Bütün bunlarla yanaşı, Henderson belə hesab edir ki, premyer-liqaya dönərsə, İngiltərə yığmasının heyətində futbol üzrə Avropa çempionatının final mərhələsinə qatılmaq şansı artacaq.

“Əl-İttifaq” heç də çempionatın ən baxımlı komandası deyil. Düzdü, bu komanda sentyabrda liderdən cəmi 2 xal geri qalırdı, ancaq bu artıq köhnə söhbətdi. İndi liderlər qrupundan 15 xal geridədilər, təhlükəli zonadan isə cəmi 8 xal irəlidə. “De Telegraaf”ın xəbərinə inansaq, məşhur yarımmüdafiəçini transfer etməkə “Ayaks”, həmçinin premyer-liqanın turnir cədvəlinin aşağı pillələrində qərarlaşan iki komanda və bundesliqa təmsilçisi maraqlıdı.

Futbolçunun təmsilçiləri artıq amsterdamlılara danışıq aparmağa hazır olduqlarını bildiriblər. Xavbek belə hesab edir ki, Avropada çıxış edərsə, İngiltərə yığmasının AÇ-2024-yə yollanacaq heyətinə düşmək şansı daha çox olacaq. Bununla belə, “Ayaks” üçün Hendersonun indi “Əl-İttifaq”dan aldığı maaşın (ildə 15 milyon avro) hətta bir hissəsini ödəmək belə problemdi.

Roberto Firmino
Başqa bir ulduz da Səudiyyə Ərəbistanından imkan daxilində tez uzaqlaşmaq istəyir. Belə ki, “Əl-Əhli”nin braziliyalı forvardı da iş yerini tərk etmək fikrindədi, onun xidməti premyer-liqa klublarına, konkret “Fulhem”ə təklif olunub. “Bağbanlar” bu yay məhz Səudiyyə Ərəbistanına – “Əl-Hilal”a yollanan Aleksandar Mitroviçə əvəzedici axtarır. “Evening Standard”da çalışan həmkarımız Nizaar Kinsella xəbər verir ki, “Əl-Əhli” Firminonu yanvarda icarəyə verməyə hazırdı. Ancaq istəyir ki, forvardın yeni klubu onun həftəyə 378 min avro təşkil edən maaşının böyük hissəsini ödəməyi öz üzərinə götürsün. Firminonun potensial müştəriləri sırasında İngiltərə və Türkiyə klublarının adı çəkilir. Söhbət “Beşiktaş”, “Qalatasaray” və “Fulhem”dən gedir.
Jurnalist Ben Ceykobs dəqiqləşdirir ki, “Əl-Əhli” hələ Firminoya görə təklif almayıb, ancaq forvardın premyer-liqa klubuna icarəyə verilməsi mümkündü. Vasitəçilərin yardımı ilə qeyri-formal təmaslar olub. “Əl-Əhli” Firminonu icarəyə verməyə hazır olsa da, onu hələ də uzunmüddətli planlarının bir parçası sayır.

Firmino ona daha çox oyun vaxtı qazanmağa imkan verən variantlar axtarır. Çətin ki, Roberto Səudiyyə Ərəbistanından olan hansısa başqa komandada icarə əsasında oynaya. Hərçənd yerli klublardan üçü – Stiven Cerrardın “Əl-İttifaq”ı da bunların arasındadı – braziliyalıya maraq göstərir. Ancaq ölkə daxilində istənlən kluba keçid gətirib ona çıxaracaq ki, “Əl-Əhli” Firminonun maaşının böyük hissəsini üzərinə götürməli olacaq, klub isə bu variantı istəmir.

Firmino 8 mövsüm ərzində “Liverpul”un şərəfini qoruyub, bu müddətdə İngiltərə çempionluğunu, kubokunu və Superkubokunu, həmçinin Liqa kubokunu qazanıb. Bundan başqa, braziliyalı “qırmızılar”la Çempionlar Liqasının, UEFA Superkubokunun və klublararası dünya çempionatının qalibi olub. “Əl-Əhli”nin heyətində keçirdiyi 17 çempionat oyununda isə 3 qol (avqustda çıxdığı debüt oyununda het-trik edib və həmin vaxtdan bəri fərqlənməyib) və 2 məhsuldar ötürmə ilə yadda qalıb.

Kərim Benzema
Dekabrın 26-da “Əl-İttihad” Kriştiano Ronaldonun “Əl-Nəssr”i ilə oyunda 2:5 hesablı acınacaqlı məğlubiyyətlə üzləşdi. Portuqaliyalı və Sadyo Mane dubl etdi, Benzema isə yalnız məhsuldar ötürmə verə bildi. Oyundan sonra sosial şəbəkələrdə Kərimin üzərinə hücum çəkdilər, ümidləri doğrultmamaqda günahlandırdılar. Fransalı isə bütün bunları dinləmək və oxumaq istənədi, sadəcə, “instaqram”dakı 76 milyon izləyicisi olan səhifəsini sildi.
Bu, Benzemanın Səudiyyə Ərəbistanındakı ilk münaqişəsi deyil. Buna qədər Nunu ilə də yola getmədi və baş məşqçini qovdular. 2023-cü ilin noyabrında “Əl-İttihad” baş məşqçisi Nunu Eşpiritu Santunu göndərdi. Əsas səbəblərdən biri isə Kərimlə arasındakı münaqişə idi. Onda forvard tənbəllikdə və komanda oyununa uyğunlaşmaqda ittiham olunurdu. Fransalı ulduza bunu irad tutmaq olar, ancaq məhsuldarlığı yox! O, 24 oyunda 15 qol və 6 məhsuldar ötürmə ilə yadda qalıb ki, bu da parlaq nəticədi.

Benzemanın real müştəriləri sırasında yalnız bir komandanın – “Mançester Yunayted”in adını çəkmək olar. Son həftələrdə bu mövzu çox fəal şəkildə müzakirəyə çıxarılıb. Ancaq bu transferin reallaşması ehtimalı azdı. Birinci əngəl “Əl-İttihad”la müqavilə və fransalının tələbatlarıdı. İkincisi, Erik ten Haq nizam-intizam pozuntularına dözən adam deyil. Üçüncüsü, bu transfer Kərimin özünə nə dərəcədə lazımdı?