Ölkə futbolunun problemləri bitmək bilmir.

Gündəmdə çatışmazlıqlarla bağlı saysız-hesabsız məsələ var. Millimizin baş məşqçisiz olması, futzalımızın maliyyə problemləriylə üz-üzə qalması, bizi başqa ölkələrdə təmsil edən futbolçuların yaşadığı çətinliklər və s. və i.a. Hələ başqa idman növlərini demirik.

Bu dəfə qüsurlarıyla diqqəti çəkən stadionlardan bir neçəsinin durumuyla maraqlanmaq qərarına gəldik. Ağsu şəhər stadionundan başlayaq. Xatırlayırsızsa, daha öncə bu idman qurğusunda işıqlandırma sisteminin sıradan çıxmasından, həmçinin bəzi bərpa işlərinin görülməsinin labüdlüyündən bəhs etmişdik. Və AFFA-nın mətbuat xidmətinin rəhbəri Elnur Məmmədov qəzetimizə açıqlamasında arenadakı problemlərin tezliklə aradan qaldırılacağını demişdi. Daha sonra işlərə start verildiyindən “Difai Ağsu” ev oyunlarını Şamaxıda keçirməyə başladı. Bəs çalışmalar indi hansı mərhələdədi? 1-ci liqa təmsilçisi arenaya nə vaxt qovuşacaq? Yenidən Elnur bəyə üz tutduq. O, təmir-bərpa işlərinin apreldə bitəcəyini dedi: “Çalışmalar davam edir. İndiki durumda dam örtüyü yenilənir. Hava şəraitindən asılı olaraq, iki-üç ay ərzində proses tamamlanacaq”.

Tovuz şəhər stadionu da problem yaşayır. Dekabrın 23-də keçirilən “Araz-Naxçıvan”la oyunun sonunda bu idman qurğusunda projektor dirəyinin aşdığını bilirsiz. Klubun mətbuat katibi Süleyman Tağıyevdən aldığımız məlumata görə, hələ ki mütəxəssislərin ekspertiza rəyi gözlənilir. Məsələnin əsli məlum olduqdan sonra iclas keçiriləcək və problemin aradan qaldırılması istiqamətində qərarlar qəbul olunacaq. “Kəpəz” üçün isə yeni arena tikilir. Gəncə təmsilçisi hələ uzun müddət rəqiblərini doğma meydanda qəbul edə bilməyəcək. Komanda bu üzdən ev oyunlarını Tovuzda keçirirdi. İndi məsələ fərqlidi. Dediyimiz kimi, projektor dirəyinin aşması işləri çətinləşdirib. Bundan başqa, “sarı-göylər”in baş məşqçisi Adil Şükürov “Futbol+”ə açıqlamasında Qəbələ şəhər stadionunun daha əlverişli olduğunu deyir. Mütəxəssis istəyinin səbəbini burda təbii ot örtüyünün olması əlaqələndirir. Beləliklə, oyunçuların zədələnmə ehtimalı xeyli azalacaq. Rəhbərlik isə Tovuz seçimində qərarlıdı. Hadisələrin hansı yöndə cərəyan edəcəyini maraqla gözləməyə dəyər. “Kəpəz” hələ ki bu barədə danışıqları təxirə salıb. Klubun mətbuat xidmətinin rəhbəri Azad Mustafayevin qəzetimizə verdiyi məlumata görə, indiyə qədər Gəncə Futbol Akademiyasının açılış mərasiminə köklənibmişlər. Stadionla bağlı məsələ qarşıdakı günlərdə yenidən müzakirə ediləcək.

Sözügedən problemin növbəti qurbanı “Araz-Naxçıvan”dı. Muxtar Respublika təmsilçisi “Dalğa Arena”ya sığınıb. Çünki vaxtilə 1-ci divizonda çıxış edərkən ev oyunlarını keçirdiyi stadion PFL-in tələblərinə cavab vermir. Bu problemi dəfələrlə işıqlandırmışıq. Maraqlıdı ki, aylar ötsə də, hansısa yenilik haqda xəbər almırıq. Bəs nə oldu? Yeni idman qurğusunun tikildiyini də bilirik. Əlbəttə, inşa edilən stadionun bu ərəfədə araya-ərsəyə gətirilməsi gözlənilmir. Əldə etdiyimiz məlumata görə, bunun üçün azı 2 il gözləmək lazımdı. Hətta layihənin reallaşması üçün daha çox vaxt lazım imiş. Məhz buna görə planlarda dəyişiklik edilib. Yəni ümumi layihədə bəzi ixtisarlar edilib. Təmir-bərpa işlərinin görüldüyü köhnə stadion haqda isə Naxçıvan Futbol Federasiyasının sədr müavini Sakit Rzayevdən xəbər aldıq. Onun dediyinə görə, idman qurğusunda görülən işlərə ara verilib. Səbəb isə qış aylarının çox soyuq keçməsiylə bağlıdı. Çox güman, çalışmalar fevraldan sonra başlayacaq və avqusta qədər davam edəcək. Hədəf “Araz-Naxçıvan”ın ev oyunlarını 2024/25 “futbol ili”ndən etibarən əvvəlki arenada keçirməsinə nail olmaqdı.

Növbəti gözlənilməz hadisə isə “Neftçi”nin başına gəlib. Belə ki, Bakıxanov qəsəbəsində yerləşən Futbol Mərkəzindəki stadionun (keçmiş İsmət Qayıbov adına stadion) projektorlarında nasazlıq yaranıb. Bu səbəbdən start götürməli olan seleksiya məşqləri baş tutmayıb. Görəsən, bu problem nədən qaynaqlanıb və aradan qaldırılıbmı? Klubun mətbuat xidmətinin rəhbəri Emin Əfəndini dinləyək: “Bəli, bir neçə gün öncə yol qırağında aparılan təmir-bərpa işləri zamanı stadionun projektorları zərər görmüşdü. Məsələ operativ çalışmalarla həll olundu. Artıq seleksiya məşqləri davam edir”.
Stadion problemindən bəhs edən yazıda “Mehdi Hüseynzadə”yə toxunmamaq günah olardı. Daha əvvəl qəzetimizdə Sumqayıtdakı bu məşhur idman qurğusunun problemlərinə geniş yer vermişdik. Qısaca qeyd edək ki, arenanın inşasıyla bağlı bütün işlər başa çatsa da, PFL-in oyunların keçirilməsiylə bağlı tələblərinə cavab vermədiyindən xeyli dəyişiklik edilməliydi. “Sumqayıt”ın mətbuat xidmətinin rəhbəri Zaur Xudiyevdən aldığımız məlumata görə, işlər artıq yekunlaşmaq üzrədi. Daha dəqiq desək, Misli premyer-liqasının 21-ci turunda “Neftçi”ylə qarşılaşacaq kollektivin rəqibi məhz bu stadionda qəbul etməsi planlaşdırılır. Əlbəttə, bu ehtimal real görünür. Çünki həmin oyun fevralın 2-də keçiriləcək.

KƏNAN BAHADIR