Yeni formatda keçiriləcək 1-ci liqanın startına sayılı günlər qalır. Bəs komandaların, əsasən da bölgə təmsilçilərinin stadionlarının vəziyyəti necədi? Stadionlar oyunları qəbul etməyə hazırdı?

"Football-plus.az" saytının suallarını PFL-in texniki idman direktoru Elgiz Abbasov aydınlaşdırdı:

"Bildiyiniz kimi, yeni futbol ilində tam fərqli 1-ci liqa görəcəyik. Klubların stadionlarına və infrastruktura gəlincə, çempionatda hansı komandaların yer alacağı dəqiqləşdikdən sonra biz tələbləri irəli sürdük və onlar çatışmazlıqları aradan qaldırmaq, yenidənqurma üçün ciddi işlərə başladı. Hər klubun infrastrukturuna son baxışı da keçirdik. Hazırkı durumu ümumi qiymətləndirsək, favoritlərdən olan "Karvan"ın stadionu hazırdı. Ot örtüyü yaxşə səviyyəyə gətirilib, otaqlar hazır vəziyyətdədi, çəkiliş platformaları üçün yerlər ayırılıb, hətta stadionda tablo da quraşdırılmaqdadı. "Difai Ağsu"da vəziyyət normaldı. Ağsu şəhər stadionu oyunlara keçirməyə hazırdı. Mingəçevir şəhər stadionunda sıxıntı çox idi, əsas da hakimlər otağı yararsız vəziyyətdə idi. Amma o məsələ həllini tapıb. Zaqatala Olimpiya İdman Kompleksinin stadionunda da iradlar aradan qaldırılıb. Ən yararsız vəziyyətdə olan Saatlı stadionu idi. Amma onlar iradlarımızdan nəticə çıxararaq qısa zaman kəsiyində stadionda zəruri işləri həyata keçirdilər. Artıq onların da stadionu tələblərimizə cavab verir. Bu işdə stadionun direktoru Aqil Heydərova xüsusi minnətdarlığımızı bildiririk.

Yalnız "Qaradağ Lökbatan"ın stadionunda işlər bitməyib. Buna görə də Lökbatan Olimpiya İdman Kompleksində oyunların keçirilməsinə icazə vermədik. Stadionda təmir işləri aparılacaq. Çatışmazlıqlar aradan qaldırılandan sonra futbol məkanı komandanın sərəncamına veriləcək. Amma hələlik "Qaradağ Lökbatan" ev oyunlarını "Neftçi Futbol Mərkəzi"nin 4-cü ehtiyat meydançasında keçirəcək. Ümumilikdə götürsək, 1-ci liqa təmsilçilərinin stadionları oyunların keçirilməsi üçün yararlıdı".

ABDULLA İSMAYILOĞLU